6. мегхан̇гапан̃хо

6. ‘‘бханте на̄гасена, ‘мегхасса пан̃ча ан̇га̄ни гахетабба̄нӣ’ти йам̣ вадеси, катама̄ни та̄ни пан̃ча ан̇га̄ни гахетабба̄нӣ’’ти? ‘‘йатха̄, маха̄ра̄джа, мегхо уппаннам̣ раджоджаллам̣ вӯпасамети, евамева кхо, маха̄ра̄джа, йогина̄ йога̄вачарена уппаннам̣ килесараджоджаллам̣ вӯпасаметаббам̣. идам̣, маха̄ра̄джа, мегхасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, мегхо патхавийа̄ ун̣хам̣ нибба̄пети, евамева кхо, маха̄ра̄джа, йогина̄ йога̄вачарена метта̄бха̄вана̄йа садевако локо нибба̄петаббо. идам̣, маха̄ра̄джа, мегхасса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, мегхо саббабӣджа̄ни вируха̄пети, евамева кхо, маха̄ра̄джа, йогина̄ йога̄вачарена саббасатта̄нам̣ саддхам̣ уппа̄детва̄ там̣ саддха̄бӣджам̣ тӣсу сампаттӣсу ропетаббам̣, диббама̄нусика̄су сукхасампаттӣсу йа̄вапараматтханибба̄насукхасампатти. идам̣, маха̄ра̄джа, мегхасса татийам̣ ан̇гам̣ гахетаббам̣.

‘‘пуна чапарам̣, маха̄ра̄джа, мегхо утуто самут̣т̣хахитва̄ дхаран̣италарухе тин̣аруккхалата̄гумбаосадхиванаппатайо парираккхати, евамева кхо, маха̄ра̄джа, йогина̄ йога̄вачарена йонисо манасика̄рам̣ ниббаттетва̄ тена йонисо манасика̄рена саман̣адхаммо парираккхитаббо, йонисо манасика̄рамӯлака̄ саббе кусала̄ дхамма̄. идам̣, маха̄ра̄джа, мегхасса чатуттхам̣ ан̇гам̣ гахетаббам̣.

‘‘пуна чапарам̣, маха̄ра̄джа, мегхо вассама̄но надитал̣а̄капоккхаран̣ийо кандарападарасарасоббхаудапа̄на̄ни ча парипӯрети удакадха̄ра̄хи, евамева кхо, маха̄ра̄джа, йогина̄ йога̄вачарена а̄гамапарийаттийа̄ дхаммамегхамабхивассайитва̄ адхигамака̄ма̄нам̣ ма̄насам̣ парипӯрайитаббам̣. идам̣, маха̄ра̄джа, мегхасса пан̃чамам̣ ан̇гам̣ гахетаббам̣. бха̄ситампетам̣, маха̄ра̄джа, тхерена са̄рипуттена дхаммасена̄патина̄ –

‘‘‘бодханеййам̣ джанам̣ дисва̄, сатасахассепи йоджане;

кхан̣ена упагантва̄на, бодхети там̣ маха̄мунӣ’’’ти.

мегхан̇гапан̃хо чхат̣т̣хо.