7. ман̣иратанан̇гапан̃хо

7. ‘‘бханте на̄гасена, ‘ман̣иратанасса тӣн̣и ан̇га̄ни гахетабба̄нӣ’ти йам̣ вадеси, катама̄ни та̄ни тӣн̣и ан̇га̄ни гахетабба̄нӣ’’ти? ‘‘йатха̄, маха̄ра̄джа, ман̣иратанам̣ екантапарисуддхам̣, евамева кхо, маха̄ра̄джа, йогина̄ йога̄вачарена екантапарисуддха̄джӣвена бхавитаббам̣. идам̣, маха̄ра̄джа, ман̣иратанасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, ман̣иратанам̣ на кеначи саддхим̣ миссӣйати, евамева кхо, маха̄ра̄джа, йогина̄ йога̄вачарена па̄пехи па̄пасаха̄йехи саддхим̣ на мисситаббам̣. идам̣, маха̄ра̄джа, ман̣иратанасса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, ман̣иратанам̣ джа̄тиратанехи йоджӣйати, евамева кхо, маха̄ра̄джа, йогина̄ йога̄вачарена уттамавараджа̄тимантехи саддхим̣ сам̣васитаббам̣, пат̣ипаннакапхалат̣т̣хасеккхапхаласаман̇гӣхи сота̄паннасакада̄га̄миана̄га̄миарахантатевиджджачхал̣абхин̃н̃асаман̣аман̣иратанехи саддхим̣ сам̣васитаббам̣. идам̣, маха̄ра̄джа, ман̣иратанасса татийам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена суттанипа̄те –

‘‘‘суддха̄ суддхехи сам̣ва̄сам̣, каппайавхо патиссата̄;

тато самагга̄ нипака̄, дуккхассантам̣ кариссатха̄’’’ти.

ман̣иратанапан̃хо саттамо.