10. аджагаран̇гапан̃хо

10. ‘‘бханте на̄гасена, ‘аджагарасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, аджагаро махатимаха̄ка̄йо бахӯпи дивасе ӯнӯдаро дӣнатаро куччхипӯрам̣ а̄ха̄рам̣ на лабхати, апарипун̣н̣о йева йа̄вадева сарӣрайа̄панаматтакена йа̄пети, евамева кхо, маха̄ра̄джа, йогино йога̄вачарасса бхиккха̄чарийаппасутасса парапин̣д̣амупагатасса парадиннаппа̄т̣икан̇кхисса сайам̣га̄хаппат̣ивиратасса дуллабхам̣ ударапарипӯрам̣ а̄ха̄рам̣, апи ча аттхавасикена кулапуттена чатта̄ро пан̃ча а̄лопе абхун̃джитва̄ авасесам̣ удакена парипӯретаббам̣. идам̣, маха̄ра̄джа, аджагарасса екам̣ ан̇гам̣ гахетаббам̣. бха̄ситампетам̣, маха̄ра̄джа, тхерена са̄рипуттена дхаммасена̄патина̄ –

‘‘‘аллам̣ суккхам̣ ва̄ бхун̃джанто, на ба̄л̣хам̣ сухито сийа̄;

ӯнӯдаро мита̄ха̄ро, сато бхиккху париббадже.

‘‘‘чатта̄ро пан̃ча а̄лопе, абхутва̄ удакам̣ пиве;

алам̣ пха̄су виха̄ра̄йа, пахитаттасса бхиккхуно’’’ти.

аджагаран̇гапан̃хо дасамо.

сӣхавагго пан̃чамо.

тассудда̄нам̣ –

кесарӣ чаккава̄ко ча, пен̣а̄хи гхаракапотако;

улӯко сатапатто ча, ваггули ча джалӯпика̄;

саппо аджагаро чева, вагго тена павуччатӣти.