9. саккан̇гапан̃хо

9. ‘‘бханте на̄гасена, ‘саккасса тӣн̣и ан̇га̄ни гахетабба̄нӣ’ти йам̣ вадеси, катама̄ни та̄ни тӣн̣и ан̇га̄ни гахетабба̄нӣ’’ти? ‘‘йатха̄, маха̄ра̄джа, сакко екантасукхасамаппито, евамева кхо, маха̄ра̄джа, йогина̄ йога̄вачарена екантапавивекасукха̄бхиратена бхавитаббам̣. идам̣, маха̄ра̄джа, саккасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, сакко деве дисва̄ пагган̣ха̄ти, ха̄самабхиджанети, евамева кхо, маха̄ра̄джа, йогина̄ йога̄вачарена кусалесу дхаммесу алӣнаматандитам̣ сантам̣ ма̄насам̣ паггахетаббам̣, ха̄самабхиджанетаббам̣, ут̣т̣хахитаббам̣ гхат̣итаббам̣ ва̄йамитаббам̣. идам̣, маха̄ра̄джа, саккасса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, саккасса анабхирати нуппаджджати, евамева кхо, маха̄ра̄джа, йогина̄ йога̄вачарена сун̃н̃а̄га̄ре анабхирати на уппа̄детабба̄. идам̣, маха̄ра̄джа, саккасса татийам̣ ан̇гам̣ гахетаббам̣. бха̄ситампетам̣, маха̄ра̄джа, тхерена субхӯтина̄ –

‘‘‘са̄сане те маха̄вӣра, йато паббаджито ахам̣;

на̄бхиджа̄на̄ми уппаннам̣, ма̄насам̣ ка̄масам̣хита’’’нти.

саккан̇гапан̃хо навамо.