10. чаккаваттин̇гапан̃хо

10. ‘‘бханте на̄гасена, ‘чаккаваттисса чатта̄ри ан̇га̄ни гахетабба̄нӣ’ти йам̣ вадеси, катама̄ни та̄ни чатта̄ри ан̇га̄ни гахетабба̄нӣ’’ти? ‘‘йатха̄, маха̄ра̄джа, чаккаваттӣ чатӯхи сан̇гахаваттхӯхи джанам̣ сан̇ган̣ха̄ти, евамева кхо, маха̄ра̄джа, йогина̄ йога̄вачарена чатассаннам̣ париса̄нам̣ ма̄насам̣ сан̇гахетаббам̣ ануггахетаббам̣ сампахам̣сетаббам̣. идам̣, маха̄ра̄джа, чаккаваттисса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, чаккаваттисса виджите чора̄ на ут̣т̣хаханти, евамева кхо, маха̄ра̄джа, йогина̄ йога̄вачарена ка̄мара̄габйа̄па̄давихим̣са̄витакка̄ на уппа̄детабба̄. идам̣, маха̄ра̄джа, чаккаваттисса дутийам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена –

‘‘‘витаккӯпасаме ча йо рато, асубхам̣ бха̄вайате [бха̄вайатӣ (сйа̄.) дха. па. 350 дхаммападе] сада̄ сато;

еса кхо бйантика̄хити, еса чхеччхати ма̄рабандхана’нти.

‘‘пуна чапарам̣, маха̄ра̄джа, чаккаваттӣ дивасе дивасе самуддапарийантам̣ маха̄патхавим̣ ануйа̄йати калйа̄н̣апа̄пака̄ни вичинама̄но, евамева кхо, маха̄ра̄джа, йогина̄ йога̄вачарена ка̄йакаммам̣ вачӣкаммам̣ манокаммам̣ дивасе дивасе паччавеккхитаббам̣ ‘ким̣ ну кхо ме имехи тӣхи т̣ха̄нехи анупаваджджасса дивасо вӣтиваттатӣ’ти. идам̣, маха̄ра̄джа, чаккаваттисса татийам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена ан̇гуттараника̄йаваре –

‘катхамбхӯтасса ме раттиндива̄ вӣтиваттантӣти [вӣтипатантӣти (сӣ. пӣ.)] паббаджитена абхин̣хам̣ паччавеккхитабба’нти.

‘‘пуна чапарам̣, маха̄ра̄джа, чаккаваттисса аббхантараба̄хира̄раккха̄ сусам̣вихита̄ хоти, евамева кхо, маха̄ра̄джа, йогина̄ йога̄вачарена аббхантара̄нам̣ ба̄хира̄нам̣ килеса̄нам̣ а̄раккха̄йа сатидова̄рико т̣хапетаббо. идам̣, маха̄ра̄джа, чаккаваттисса чатуттхам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена –

‘сатидова̄рико, бхиккхаве, арийаса̄вако акусалам̣ паджахати кусалам̣ бха̄вети, са̄ваджджам̣ паджахати, анаваджджам̣ бха̄вети, суддхаматта̄нам̣ парихаратӣ’’’ти.

чаккаваттин̇гапан̃хо дасамо.

патхавӣвагго татийо.

тассудда̄нам̣ –

патхавӣ а̄по ча теджо ча, ва̄йо ча паббатена ча;

а̄ка̄со чандасӯрийо ча, сакко ча чаккаваттина̄ти.