9. екантасукханибба̄напан̃хо

9. ‘‘бханте на̄гасена, ким̣ екантасукхам̣ нибба̄нам̣, уда̄ху дуккхена мисса’’нти? ‘‘екантасукхам̣, маха̄ра̄джа, нибба̄нам̣, дуккхена амисса’’нти.

‘‘на майам̣ там̣, бханте на̄гасена, вачанам̣ саддаха̄ма ‘екантасукхам̣ нибба̄на’нти, еваметтха майам̣, бханте на̄гасена, паччема ‘нибба̄нам̣ дуккхена мисса’нти, ка̄ран̣ан̃четтха упалабха̄ма ‘нибба̄нам̣ дуккхена мисса’нти. катамам̣ еттха ка̄ран̣ам̣? йе те, бханте на̄гасена, нибба̄нам̣ парийесанти, тесам̣ диссати ка̄йасса ча читтасса ча а̄та̄по парита̄по т̣ха̄начан̇каманисаджджа̄сайана̄ха̄рапариггахо миддхасса ча упародхо а̄йатана̄нан̃ча пат̣ипӣл̣анам̣ дханадхан̃н̃апийан̃а̄тимиттаппаджаханам̣. йе кечи локе сукхита̄ сукхасамаппита̄, те саббепи пан̃чахи ка̄магун̣ехи а̄йатане раменти брӯхенти, мана̄пикамана̄пикабахувидхасубханимиттена рӯпена чаккхум̣ раменти брӯхенти, мана̄пикамана̄пикагӣтава̄дитабахувидхасубханимиттена саддена сотам̣ раменти брӯхенти, мана̄пикамана̄пикапуппхапхалапаттатачамӯласа̄рабахувидхасубханимиттена гандхена гха̄нам̣ раменти брӯхенти, мана̄пикамана̄пикакхаджджабходжджалеййапеййаса̄йанӣйабахувидхасубханимиттена расена дживхам̣ раменти брухенти, мана̄пикамана̄пикасан̣хасукхумамудумаддавабахувидхасубханимиттена пхассена ка̄йам̣ раменти брӯхенти, мана̄пикамана̄пикакалйа̄н̣апа̄пакасубха̄субхабахувидхавитаккаманасика̄рена манам̣ раменти брӯхенти. тумхе там̣ чаккхусотагха̄надживха̄ка̄йаманобрӯханам̣ ханатха упаханатха, чхиндатха упаччхиндатха, рундхатха упарундхатха. тена ка̄йопи паритапати, читтампи паритапати, ка̄йе паритатте ка̄йикадуккхаведанам̣ ведийати, читте паритатте четасикадуккхаведанам̣ ведайати. нану ма̄ган̣д̣ийопи [ма̄гандийопи (сӣ. пӣ.)] парибба̄джако бхагавантам̣ гарахама̄но евама̄ха ‘бхӯнаху [бхӯтахаччо (пӣ.), бхӯнахаччо (ка.)] саман̣о готамо’ти. идаметтха ка̄ран̣ам̣, йена̄хам̣ ка̄ран̣ена брӯми ‘нибба̄нам̣ дуккхена мисса’’’нти.

‘‘на хи, маха̄ра̄джа, нибба̄нам̣ дуккхена миссам̣, екантасукхам̣ нибба̄нам̣. йам̣ пана твам̣, маха̄ра̄джа, брӯси ‘нибба̄нам̣ дуккха’нти, нетам̣ дуккхам̣ нибба̄нам̣ на̄ма, нибба̄насса пана саччхикирийа̄йа пуббабха̄го есо, нибба̄напарийесанам̣ етам̣, екантасукхам̣ йева, маха̄ра̄джа, нибба̄нам̣, на дуккхена миссам̣. еттха ка̄ран̣ам̣ вада̄ми. аттхи, маха̄ра̄джа, ра̄джӯнам̣ раджджасукхам̣ на̄ма̄’’ти? ‘‘а̄ма, бханте, аттхи ра̄джӯнам̣ раджджасукха’’нти. ‘‘апи ну кхо там̣, маха̄ра̄джа, раджджасукхам̣ дуккхена мисса’’нти? ‘‘на хи, бханте’’ти. ‘‘кисса пана те, маха̄ра̄джа, ра̄джа̄но паччанте купите тесам̣ паччантаниссита̄нам̣ пат̣иседха̄йа амаччехи парин̣а̄йакехи бхат̣ехи балаттхехи паривута̄ пава̄сам̣ гантва̄ д̣ам̣самакасава̄та̄тапапат̣ипӣл̣ита̄ самависаме паридха̄ванти, маха̄йуддхан̃ча каронти, джӣвитасам̣сайан̃ча па̄пун̣антӣ’’ти? ‘‘нетам̣, бханте на̄гасена, раджджасукхам̣ на̄ма, раджджасукхасса парийесана̄йа пуббабха̄го есо, дуккхена, бханте на̄гасена, ра̄джа̄но раджджам̣ парийеситва̄ раджджасукхам̣ анубхаванти, евам̣, бханте на̄гасена, раджджасукхам̣ дуккхена амиссам̣, ан̃н̃ам̣ там̣ раджджасукхам̣, ан̃н̃ам̣ дуккха’’нти. ‘‘евамева кхо, маха̄ра̄джа, екантасукхам̣ нибба̄нам̣, на дуккхена миссам̣. йе пана там̣ нибба̄нам̣ парийесанти, те ка̄йан̃ча читтан̃ча а̄та̄петва̄ т̣ха̄начан̇каманисаджджа̄сайана̄ха̄рам̣ париггахетва̄ миддхам̣ упарундхитва̄ а̄йатана̄ни пат̣ипӣл̣етва̄ ка̄йан̃ча джӣвитан̃ча париччаджитва̄ дуккхена нибба̄нам̣ парийеситва̄ екантасукхам̣ нибба̄нам̣ анубхаванти, нихатапачча̄митта̄ вийа ра̄джа̄но раджджасукхам̣. евам̣, маха̄ра̄джа, екантасукхам̣ нибба̄нам̣, на дуккхена миссам̣, ан̃н̃ам̣ нибба̄нам̣, ан̃н̃ам̣ дуккханти.

‘‘апарампи, маха̄ра̄джа, уттарим̣ ка̄ран̣ам̣ сун̣охи екантасукхам̣ нибба̄нам̣, на дуккхена миссам̣, ан̃н̃ам̣ дуккхам̣, ан̃н̃ам̣ нибба̄нанти. аттхи, маха̄ра̄джа, а̄чарийа̄нам̣ сиппаванта̄нам̣ сиппасукхам̣ на̄ма̄’’ти? ‘‘а̄ма, бханте, аттхи а̄чарийа̄нам̣ сиппаванта̄нам̣ сиппасукха’’нти. ‘‘апи ну кхо там̣, маха̄ра̄джа, сиппасукхам̣ дуккхена мисса’’нти? ‘‘на хи, бханте’’ти. ‘‘кисса пана те, маха̄ра̄джа, а̄чарийа̄ [идам̣ падам̣ сӣ. пӣ. поттхакесу наттхи] а̄чарийа̄нам̣ абхива̄данапаччут̣т̣ха̄нена удака̄харан̣агхарасаммаджджанадантакат̣т̣хамукходака̄нуппада̄нена уччхит̣т̣хапат̣иггахан̣ауччха̄дананаха̄панапа̄дапарикаммена сакачиттам̣ никкхипитва̄ парачитта̄нуваттанена дуккхасеййа̄йа висамабходжанена ка̄йам̣ а̄та̄пентӣ’’ти? ‘‘нетам̣, бханте на̄гасена, сиппасукхам̣ на̄ма, сиппапарийесана̄йа пуббабха̄го есо, дуккхена, бханте на̄гасена, а̄чарийа̄ сиппам̣ парийеситва̄ сиппасукхам̣ анубхаванти, евам̣, бханте на̄гасена, сиппасукхам̣ дуккхена амиссам̣, ан̃н̃ам̣ там̣ сиппасукхам̣, ан̃н̃ам̣ дуккха’’нти. ‘‘евамева кхо, маха̄ра̄джа, екантасукхам̣ нибба̄нам̣, на дуккхена миссам̣. йе пана там̣ нибба̄нам̣ парийесанти, те ка̄йан̃ча читтан̃ча а̄та̄петва̄ т̣ха̄начан̇каманисаджджа̄сайана̄ха̄рам̣ париггахетва̄ миддхам̣ упарундхитва̄ а̄йатана̄ни пат̣ипӣл̣етва̄ ка̄йан̃ча джӣвитан̃ча париччаджитва̄ дуккхена нибба̄нам̣ парийеситва̄ екантасукхам̣ нибба̄нам̣ анубхаванти, а̄чарийа̄ вийа сиппасукхам̣. евам̣, маха̄ра̄джа, екантасукхам̣ нибба̄нам̣, на дуккхена миссам̣, ан̃н̃ам̣ дуккхам̣, ан̃н̃ам̣ нибба̄на’’нти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

екантасукханибба̄напан̃хо навамо.