10. нибба̄нарӯпасан̣т̣ха̄напан̃хо

10. ‘‘бханте на̄гасена, ‘нибба̄нам̣ нибба̄на’нти йам̣ вадеси, сакка̄ пана тасса нибба̄насса рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайиту’’нти? ‘‘аппат̣ибха̄гам̣, маха̄ра̄джа, нибба̄нам̣, на сакка̄ нибба̄насса рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайиту’’нти. ‘‘етампа̄хам̣, бханте на̄гасена, на сампат̣иччха̄ми, йам̣ аттхидхаммасса нибба̄насса рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ апан̃н̃а̄панам̣, ка̄ран̣ена мам̣ сан̃н̃а̄пехӣ’’ти. ‘‘хоту, маха̄ра̄джа, ка̄ран̣ена там̣ сан̃н̃а̄песса̄ми. аттхи, маха̄ра̄джа, маха̄самуддо на̄ма̄’’ти? ‘‘а̄ма, бханте, аттхесо маха̄самуддо’’ти. ‘‘саче там̣, маха̄ра̄джа, кочи евам̣ пуччхеййа ‘киттакам̣, маха̄ра̄джа, маха̄самудде удакам̣, кати пана те сатта̄, йе маха̄самудде пат̣ивасантӣ’ти, евам̣ пут̣т̣хо твам̣, маха̄ра̄джа, кинти тасса бйа̄кареййа̄сӣ’’ти? ‘‘саче мам̣, бханте, кочи евам̣ пуччхеййа ‘киттакам̣, маха̄ра̄джа, маха̄самудде удакам̣, кати пана те сатта̄, йе маха̄самудде пат̣ивасантӣ’ти, тамахам̣, бханте, евам̣ вадеййам̣ ‘апуччхитаббам̣ мам̣ твам̣ амбхо пуриса пуччхаси, неса̄ пуччха̄ кеначи пуччхитабба̄, т̣хапанӣйо есо пан̃хо. авибхатто локаккха̄йикехи маха̄самуддо, на сакка̄ маха̄самудде удакам̣ париминитум̣ сатта̄ ва̄ йе таттха ва̄самупагата̄ти ева̄хам̣ бханте тасса пат̣ивачанам̣ дадеййа’’’нти.

‘‘кисса пана, твам̣ маха̄ра̄джа, аттхидхамме маха̄самудде евам̣ пат̣ивачанам̣ дадеййа̄си, нану виган̣етва̄ [минитва̄ (ка.)] тасса а̄чиккхитаббам̣ ‘еттакам̣ маха̄самудде удакам̣, еттака̄ ча сатта̄ маха̄самудде пат̣ивасантӣ’’ти? ‘‘на сакка̄, бханте, ависайо есо пан̃хо’’ти.

‘‘йатха̄, маха̄ра̄джа, аттхидхамме йева маха̄самудде на сакка̄ удакам̣ париган̣етум̣ [париминитум̣ (ка.)] сатта̄ ва̄ йе таттха ва̄самупагата̄, евамева кхо, маха̄ра̄джа, аттхидхаммассева нибба̄насса на сакка̄ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайитум̣, виган̣еййа, маха̄ра̄джа, иддхима̄ четовасиппатто маха̄самудде удакам̣ татра̄сайе ча сатте, на твева со иддхима̄ четовасиппатто саккун̣еййа нибба̄насса рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайитум̣.

‘‘апарампи, маха̄ра̄джа, уттарим̣ ка̄ран̣ам̣ сун̣охи, аттхидхаммассева нибба̄насса на сакка̄ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайитунти. аттхи, маха̄ра̄джа, девесу арӯпака̄йика̄ на̄ма дева̄’’ти. ‘‘а̄ма, бханте, суййати ‘аттхи девесу арӯпака̄йика̄ на̄ма дева̄’’’ти. ‘‘сакка̄ пана, маха̄ра̄джа, тесам̣ арӯпака̄йика̄нам̣ дева̄нам̣ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайиту’’нти? ‘‘на хи, бханте’’ти. ‘‘тена хи, маха̄ра̄джа, наттхи арӯпака̄йика̄ дева̄’’ти? ‘‘аттхи, бханте, арӯпака̄йика̄ дева̄, на ча сакка̄ тесам̣ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайиту’’нти. ‘‘йатха̄, маха̄ра̄джа, аттхисатта̄нам̣ йева арӯпака̄йика̄нам̣ дева̄нам̣ на сакка̄ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайитум̣, евамева кхо, маха̄ра̄джа, аттхидхаммассева нибба̄насса на сакка̄ рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайиту’’нти.

‘‘бханте на̄гасена, хоту екантасукхам̣ нибба̄нам̣, на ча сакка̄ тасса рӯпам̣ ва̄ сан̣т̣ха̄нам̣ ва̄ вайам̣ ва̄ пама̄н̣ам̣ ва̄ опаммена ва̄ ка̄ран̣ена ва̄ хетуна̄ ва̄ найена ва̄ упадассайитум̣. аттхи пана, бханте, нибба̄насса гун̣ам̣ ан̃н̃ехи анупавит̣т̣хам̣ кин̃чи опамманидассанаматта’’нти? ‘‘сарӯпато, маха̄ра̄джа, наттхи, гун̣ато пана сакка̄ кин̃чи опамманидассанаматтам̣ упадассайиту’’нти. ‘‘са̄дху, бханте на̄гасена, йатха̄хам̣ лабха̄ми нибба̄насса гун̣атопи екадесапаридӣпанаматтам̣, татха̄ сӣгхам̣ брӯхи, нибба̄пехи ме хадайапарил̣а̄хам̣ винайа сӣталамадхуравачанама̄лутена̄’’ти.

‘‘падумасса, маха̄ра̄джа, еко гун̣о нибба̄нам̣ анупавит̣т̣хо, удакасса две гун̣а̄, агадасса тайо гун̣а̄, маха̄самуддасса чатта̄ро гун̣а̄, бходжанасса пан̃ча гун̣а̄, а̄ка̄сасса даса гун̣а̄, ман̣иратанасса тайо гун̣а̄, лохитачанданасса тайо гун̣а̄, саппиман̣д̣асса тайо гун̣а̄, гирисикхарасса пан̃ча гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘падумасса еко гун̣о нибба̄нам̣ анупавит̣т̣хо’ти йам̣ вадеси, катамо падумасса еко гун̣о нибба̄нам̣ анупавит̣т̣хо’’ти? ‘‘йатха̄, маха̄ра̄джа, падумам̣ анупалиттам̣ удакена, евамева кхо, маха̄ра̄джа, нибба̄нам̣ саббакилесехи анупалиттам̣. айам̣, маха̄ра̄джа, падумасса еко гун̣о нибба̄нам̣ анупавит̣т̣хо’’ти.

‘‘бханте на̄гасена, ‘удакасса две гун̣а̄ нибба̄нам̣ анупавит̣т̣ха̄’ти йам̣ вадеси, катаме удакасса две гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, удакам̣ сӣталам̣ парил̣а̄ханибба̄панам̣, евамева кхо, маха̄ра̄джа, нибба̄нам̣ сӣталам̣ саббакилесапарил̣а̄ханибба̄панам̣. айам̣, маха̄ра̄джа, удакасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, удакам̣ килантатаситапипа̄ситагхамма̄бхитатта̄нам̣ джанапасупаджа̄нам̣ пипа̄са̄винайанам̣, евамева кхо, маха̄ра̄джа, нибба̄нам̣ ка̄матан̣ха̄бхаватан̣ха̄вибхаватан̣ха̄пипа̄са̄винайанам̣. айам̣, маха̄ра̄джа, удакасса дутийо гун̣о нибба̄нам̣ анупавит̣т̣хо. име кхо, маха̄ра̄джа, удакасса две гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘агадасса тайо гун̣а̄ нибба̄нам̣ анупавит̣т̣ха̄’ти йам̣ вадеси, катаме агадасса тайо гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, агадо висапӣл̣ита̄нам̣ сатта̄нам̣ пат̣исаран̣ам̣, евамева кхо, маха̄ра̄джа, нибба̄нам̣ килесависапӣл̣ита̄нам̣ сатта̄нам̣ пат̣исаран̣ам̣. айам̣, маха̄ра̄джа, агадасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, агадо рога̄нам̣ антакаро, евамева кхо, маха̄ра̄джа, нибба̄нам̣ саббадуккха̄нам̣ антакарам̣. айам̣, маха̄ра̄джа, агадасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, агадо аматам̣, евамева кхо, маха̄ра̄джа, нибба̄нам̣ аматам̣. айам̣, маха̄ра̄джа, агадасса татийо гун̣о нибба̄нам̣ анупавит̣т̣хо. име кхо, маха̄ра̄джа, агадасса тайо гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘маха̄самуддасса чатта̄ро гун̣а̄ нибба̄нам̣ анупавит̣т̣ха̄’ти йам̣ вадеси, катаме маха̄самуддасса чатта̄ро гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, маха̄самуддо сун̃н̃о саббакун̣апехи, евамева кхо, маха̄ра̄джа, нибба̄нам̣ сун̃н̃ам̣ саббакилесакун̣апехи. айам̣, маха̄ра̄джа, маха̄самуддасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, маха̄самуддо маханто анорапа̄ро, на парипӯрати саббасавантӣхи, евамева кхо, маха̄ра̄джа, нибба̄нам̣ махантам̣ анорапа̄рам̣, на пӯрати саббасаттехи. айам̣, маха̄ра̄джа, маха̄самуддасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, маха̄самуддо маханта̄нам̣ бхӯта̄нам̣ а̄ва̄со, евамева кхо, маха̄ра̄джа, нибба̄нам̣ маханта̄нам̣ араханта̄нам̣ вималакхӣн̣а̄савабалаппаттавасӣбхӯтамаха̄бхӯта̄нам̣ а̄ва̄со. айам̣, маха̄ра̄джа, маха̄самуддасса татийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, маха̄самуддо апаримитавивидхавипулавӣчипуппхасам̣кусумито, евамева кхо, маха̄ра̄джа, нибба̄нам̣ апаримитавивидхавипулапарисуддхавиджджа̄вимуттипуппхасам̣кусумитам̣. айам̣, маха̄ра̄джа, маха̄самуддасса чатуттхо гун̣о нибба̄нам̣ анупавит̣т̣хо. име кхо, маха̄ра̄джа, маха̄самуддасса чатта̄ро гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘бходжанасса пан̃ча гун̣а̄ нибба̄нам̣ анупавит̣т̣ха̄’ти йам̣ вадеси, катаме бходжанасса пан̃ча гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, бходжанам̣ саббасатта̄нам̣ а̄йудха̄ран̣ам̣, евамева кхо, маха̄ра̄джа, нибба̄нам̣ саччхикатам̣ джара̄маран̣ана̄санато а̄йудха̄ран̣ам̣. айам̣, маха̄ра̄джа, бходжанасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, бходжанам̣ саббасатта̄нам̣ балавад̣д̣ханам̣, евамева кхо, маха̄ра̄джа, нибба̄нам̣ саччхикатам̣ саббасатта̄нам̣ иддхибалавад̣д̣ханам̣. айам̣, маха̄ра̄джа, бходжанасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, бходжанам̣ саббасатта̄нам̣ ван̣н̣аджананам̣, евамева кхо, маха̄ра̄джа, нибба̄нам̣ саччхикатам̣ саббасатта̄нам̣ гун̣аван̣н̣аджананам̣. айам̣, маха̄ра̄джа, бходжанасса татийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, бходжанам̣ саббасатта̄нам̣ даратхавӯпасаманам̣, евамева кхо, маха̄ра̄джа, нибба̄нам̣ саччхикатам̣ саббасатта̄нам̣ саббакилесадаратхавӯпасаманам̣. айам̣, маха̄ра̄джа, бходжанасса чатуттхо гун̣о нибба̄нам̣ анупавит̣т̣хо. пуна чапарам̣, маха̄ра̄джа, бходжанам̣ саббасатта̄нам̣ джигхаччха̄дуббалйапат̣ивиноданам̣, евамева кхо, маха̄ра̄джа, нибба̄нам̣ саччхикатам̣ саббасатта̄нам̣ саббадуккхаджигхаччха̄дуббалйапат̣ивиноданам̣. айам̣, маха̄ра̄джа, бходжанасса пан̃чамо гун̣о нибба̄нам̣ анупавит̣т̣хо. име кхо, маха̄ра̄джа, бходжанасса пан̃ча гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘а̄ка̄сасса даса гун̣а̄ нибба̄нам̣ анупавит̣т̣ха̄’ти йам̣ вадеси, катаме а̄ка̄сасса даса гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, а̄ка̄со на джа̄йати, на джӣйати, на мӣйати, на чавати, на уппаджджати, дуппасахо, ачора̄харан̣о, аниссито, вихагагамано, нира̄варан̣о, ананто. евамева кхо, маха̄ра̄джа, нибба̄нам̣ на джа̄йати, на джӣйати, на мӣйати, на чавати, на уппаджджати, дуппасахам̣, ачора̄харан̣ам̣, анисситам̣, арийагаманам̣, нира̄варан̣ам̣, анантам̣. име кхо, маха̄ра̄джа, а̄ка̄сасса даса гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘ман̣иратанасса тайо гун̣а̄ нибба̄нам̣ анупавит̣т̣ха̄’ти йам̣ вадеси, катаме ман̣иратанасса тайо гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, ман̣иратанам̣ ка̄мададам̣, евамева кхо, маха̄ра̄джа, нибба̄нам̣ ка̄мададам̣. айам̣, маха̄ра̄джа, ман̣иратанасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, ман̣иратанам̣ ха̄сакарам̣, евамева кхо, маха̄ра̄джа, нибба̄нам̣ ха̄сакарам̣. айам̣, маха̄ра̄джа, ман̣иратанасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, ман̣иратанам̣ уджджотаттакарам̣, евамева кхо, маха̄ра̄джа, нибба̄нам̣ уджджотаттакарам̣ [уджджотаттхакарам̣ (сӣ. пӣ.), уджджотитаттхакарам̣ (сйа̄.)]. айам̣, маха̄ра̄джа, ман̣иратанасса татийо гун̣о нибба̄нам̣ анупавит̣т̣хо. име кхо, маха̄ра̄джа, ман̣иратанасса тайо гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘лохитачанданасса тайо гун̣а̄ нибба̄нам̣ анупавит̣т̣ха̄’ти йам̣ вадеси, катаме лохитачанданасса тайо гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, лохитачанданам̣ дуллабхам̣, евамева кхо, маха̄ра̄джа, нибба̄нам̣ дуллабхам̣. айам̣, маха̄ра̄джа, лохитачанданасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, лохитачанданам̣ асамасугандхам̣, евамева кхо, маха̄ра̄джа, нибба̄нам̣ асамасугандхам̣. айам̣, маха̄ра̄джа, лохитачанданасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, лохитачанданам̣ саджджанапасаттхам̣ [саббаджанапасаттхам̣ (сйа̄.)], евамева кхо, маха̄ра̄джа, нибба̄нам̣ арийасаджджанапасаттхам̣. айам̣, маха̄ра̄джа, лохитачанданасса татийо гун̣о нибба̄нам̣ анупавит̣т̣хо. име кхо, маха̄ра̄джа, лохитачанданасса тайо гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘саппиман̣д̣асса тайо гун̣а̄ нибба̄нам̣ анупавит̣т̣ха̄’ти йам̣ вадеси, катаме саппиман̣д̣асса тайо гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, саппиман̣д̣о ван̣н̣асампанно, евамева кхо, маха̄ра̄джа, нибба̄нам̣ гун̣аван̣н̣асампаннам̣. айам̣, маха̄ра̄джа, саппиман̣д̣асса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, саппиман̣д̣о гандхасампанно, евамева кхо, маха̄ра̄джа, нибба̄нам̣ сӣлагандхасампаннам̣. айам̣, маха̄ра̄джа, саппиман̣д̣асса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, саппиман̣д̣о расасампанно, евамева кхо, маха̄ра̄джа, нибба̄нам̣ расасампаннам̣. айам̣, маха̄ра̄джа, саппиман̣д̣асса татийо гун̣о нибба̄нам̣ анупавит̣т̣хо. име кхо, маха̄ра̄джа, саппиман̣д̣асса тайо гун̣а̄ нибба̄нам̣ анупавит̣т̣ха̄’’ти.

‘‘бханте на̄гасена, ‘гирисикхарасса пан̃ча гун̣а̄ нибба̄нам̣ анупавит̣т̣ха̄’ти йам̣ вадеси, катаме гирисикхарасса пан̃ча гун̣а̄ нибба̄нам̣ анупавит̣т̣ха̄’’ти? ‘‘йатха̄, маха̄ра̄джа, гирисикхарам̣ аччуггатам̣, евамева кхо, маха̄ра̄джа, нибба̄нам̣ аччугатам̣. айам̣, маха̄ра̄джа, гирисикхарасса пат̣хамо гун̣о нибба̄нам̣ анупавит̣т̣хо. пуна чапарам̣, маха̄ра̄джа, гирисикхарам̣ ачалам̣, евамева кхо, маха̄ра̄джа, нибба̄нам̣ ачалам̣. айам̣, маха̄ра̄джа, гирисикхарасса дутийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, гирисикхарам̣ дурадхирохам̣, евамева кхо, маха̄ра̄джа, нибба̄нам̣ дурадхирохам̣ саббакилеса̄нам̣. айам̣, маха̄ра̄джа, гирисикхарасса татийо гун̣о нибба̄нам̣ анупавит̣т̣хо. пуна чапарам̣, маха̄ра̄джа, гирисикхарам̣ саббабӣджа̄нам̣ авирӯханам̣, евамева кхо, маха̄ра̄джа, нибба̄нам̣ саббакилеса̄нам̣ авирӯханам̣. айам̣, маха̄ра̄джа, гирисикхарасса чатуттхо гун̣о нибба̄нам̣ анупавит̣т̣хо. пуна чапарам̣, маха̄ра̄джа, гирисикхарам̣ анунайаппат̣игхавиппамуттам̣, евамева кхо, маха̄ра̄джа, нибба̄нам̣ анунайаппат̣игхавиппамуттам̣. айам̣, маха̄ра̄джа, гирисикхарасса пан̃чамо гун̣о нибба̄нам̣ анупавит̣т̣хо. име кхо, маха̄ра̄джа, гирисикхарасса пан̃ча гун̣а̄ нибба̄нам̣ анупавит̣т̣ха̄’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

нибба̄нарӯпасан̣т̣ха̄напан̃хо дасамо.