11. нибба̄насаччхикаран̣апан̃хо

11. ‘‘бханте на̄гасена, тумхе бхан̣атха ‘нибба̄нам̣ на атӣтам̣, на ана̄гатам̣, на паччуппаннам̣, на уппаннам̣ на ануппаннам̣ на уппа̄данӣйа’нти. идха, бханте на̄гасена, йо кочи самма̄пат̣ипанно нибба̄нам̣ саччхикароти, со уппаннам̣ саччхикароти, уда̄ху уппа̄детва̄ саччхикаротӣ’’ти? ‘‘йо кочи, маха̄ра̄джа, самма̄пат̣ипанно нибба̄нам̣ саччхикароти, со на уппаннам̣ саччхикароти, на уппа̄детва̄ саччхикароти, апи ча, маха̄ра̄джа, аттхеса̄ нибба̄надха̄ту, йам̣ со самма̄пат̣ипанно саччхикаротӣ’’ти.

‘‘ма̄, бханте на̄гасена, имам̣ пан̃хам̣ пат̣иччханнам̣ катва̄ дӣпехи, виват̣ам̣ па̄кат̣ам̣ катва̄ дӣпехи чхандаджа̄то усса̄хаджа̄то, йам̣ те сиккхитам̣, там̣ саббам̣ еттхева̄кира̄хи, еттха̄йам̣ джано саммӯл̣хо виматиджа̄то сам̣сайапаккхандо, бхиндетам̣ антодосасалла’’нти. ‘‘аттхеса̄, маха̄ра̄джа, нибба̄надха̄ту санта̄ сукха̄ пан̣ӣта̄, там̣ самма̄пат̣ипанно джина̄нусит̣т̣хийа̄ сан̇кха̄ре саммасанто пан̃н̃а̄йа саччхикароти. йатха̄, маха̄ра̄джа, антева̄сико а̄чарийа̄нусит̣т̣хийа̄ виджджам̣ пан̃н̃а̄йа саччхикароти, евамева кхо, маха̄ра̄джа, самма̄пат̣ипанно джина̄нусит̣т̣хийа̄ пан̃н̃а̄йа нибба̄нам̣ саччхикароти.

‘‘катхам̣ пана там̣ нибба̄нам̣ дат̣т̣хаббанти? анӣтито нирупаддавато абхайато кхемато сантато сукхато са̄тато пан̣ӣтато сучито сӣталато дат̣т̣хаббам̣.

‘‘йатха̄, маха̄ра̄джа, пурисо бахукат̣т̣хапун̃джена джалитакат̣т̣хитена аггина̄ дайхама̄но ва̄йа̄мена тато мун̃читва̄ нираггикока̄сам̣ пависитва̄ таттха парамасукхам̣ лабхеййа, евамева кхо, маха̄ра̄джа, йо самма̄пат̣ипанно, со йонисо манасика̄рена бйапагатативидхаггисанта̄пам̣ парамасукхам̣ нибба̄нам̣ саччхикароти. йатха̄, маха̄ра̄джа, агги, евам̣ тивидхагги дат̣т̣хаббо; йатха̄ аггигато пурисо, евам̣ самма̄пат̣ипанно дат̣т̣хаббо; йатха̄ нираггикока̄со, евам̣ нибба̄нам̣ дат̣т̣хаббам̣.

‘‘йатха̄ ва̄ пана, маха̄ра̄джа, пурисо ахикуккурамануссакун̣апасарӣравал̣ан̃джакот̣т̣ха̄сара̄сигато кун̣ападжат̣а̄джат̣итантараманупавит̣т̣хо ва̄йа̄мена тато мун̃читва̄ никкун̣апока̄сам̣ пависитва̄ таттха парамасукхам̣ лабхеййа, евамева кхо, маха̄ра̄джа, йо самма̄пат̣ипанно, со йонисо манасика̄рена бйапагатакилесакун̣апам̣ парамасукхам̣ нибба̄нам̣ саччхикароти. йатха̄, маха̄ра̄джа, кун̣апам̣, евам̣ пан̃ча ка̄магун̣а̄ дат̣т̣хабба̄; йатха̄ кун̣апагато пурисо, евам̣ самма̄пат̣ипанно дат̣т̣хаббо; йатха̄ никкун̣апока̄со, евам̣ нибба̄нам̣ дат̣т̣хаббам̣.

‘‘йатха̄ ва̄ пана, маха̄ра̄джа, пурисо бхӣто тасито кампито випарӣтавиббхантачитто ва̄йа̄мена тато мун̃читва̄ дал̣хам̣ тхирам̣ ачалам̣ абхайат̣т̣ха̄нам̣ пависитва̄ таттха парамасукхам̣ лабхеййа, евамева кхо, маха̄ра̄джа, йо самма̄пат̣ипанно, со йонисо манасика̄рена бйапагатабхайасанта̄сам̣ парамасукхам̣ нибба̄нам̣ саччхикароти. йатха̄, маха̄ра̄джа, бхайам̣, евам̣ джа̄тиджара̄бйа̄дхимаран̣ам̣ пат̣ичча апара̄парам̣ паваттабхайам̣ дат̣т̣хаббам̣; йатха̄ бхӣто пурисо, евам̣ самма̄пат̣ипанно дат̣т̣хаббо; йатха̄ абхайат̣т̣ха̄нам̣, евам̣ нибба̄нам̣ дат̣т̣хаббам̣.

‘‘йатха̄ ва̄ пана, маха̄ра̄джа, пурисо килит̣т̣хамалинакалалакаддамадесе патито ва̄йа̄мена там̣ калалакаддамам̣ апава̄хетва̄ парисуддхавималадесамупагантва̄ таттха парамасукхам̣ лабхеййа, евамева кхо, маха̄ра̄джа, йо самма̄пат̣ипанно, со йонисо манасика̄рена бйапагатакилесамалакаддамам̣ парамасукхам̣ нибба̄нам̣ саччхикароти. йатха̄, маха̄ра̄джа, калалам̣, евам̣ ла̄бхасакка̄расилоко дат̣т̣хаббо; йатха̄ калалагато пурисо, евам̣ самма̄пат̣ипанно дат̣т̣хаббо; йатха̄ парисуддхавималадесо, евам̣ нибба̄нам̣ дат̣т̣хаббам̣.

‘‘тан̃ча пана нибба̄нам̣ самма̄пат̣ипанно кинти саччхикароти? йо со, маха̄ра̄джа, самма̄пат̣ипанно, со сан̇кха̄ра̄нам̣ паваттам̣ саммасати. паваттам̣ саммасама̄но таттха джа̄тим̣ пассати джарам̣ пассати бйа̄дхим̣ пассати маран̣ам̣ пассати, на таттха кин̃чи сукхам̣ са̄там̣ пассати а̄дитопи маджджхатопи парийоса̄натопи. со таттха кин̃чи на гайхӯпагам̣ пассати. йатха̄, маха̄ра̄джа, пурисо дивасасантатте айогул̣е джалите татте кат̣хите а̄дитопи маджджхатопи парийоса̄натопи на кин̃чи гайхӯпагам̣ падесам̣ пассати, евамева кхо, маха̄ра̄джа, йо сан̇кха̄ра̄нам̣ паваттам̣ саммасати, со паваттам̣ саммасама̄но таттха джа̄тим̣ пассати джарам̣ пассати бйа̄дхим̣ пассати маран̣ам̣ пассати, на таттха кин̃чи сукхам̣ са̄там̣ пассати а̄дитопи маджджхатопи парийоса̄натопи. со таттха [идам̣ пададвайам̣ сӣ. пӣ. поттхакесу наттхи] на кин̃чи гайхӯпагам̣ пассати, тасса гайхӯпагам̣ апассантасса читте арати сан̣т̣ха̄ти, ка̄йасмим̣ д̣а̄хо оккамати, со ата̄н̣о асаран̣о асаран̣ӣбхӯто бхавесу ниббиндати.

‘‘йатха̄, маха̄ра̄джа, пурисо джалитаджа̄лам̣ махантам̣ аггиккхандхам̣ пависеййа, со таттха ата̄н̣о асаран̣о асаран̣ӣбхӯто аггимхи ниббиндеййа, евамева кхо, маха̄ра̄джа, тасса гайхӯпагам̣ апассантасса читте арати сан̣т̣ха̄ти, ка̄йасмим̣ д̣а̄хо оккамати, со ата̄н̣о асаран̣о асаран̣ӣбхӯто бхавесу ниббиндати.

‘‘тасса паватте бхайадасса̄висса евам̣ читтам̣ уппаджджати ‘сантаттам̣ кхо панетам̣ паваттам̣ сампаджджалитам̣ бахудуккхам̣ бахӯпа̄йа̄сам̣, йади кочи лабхетха аппаваттам̣ етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣хаккхайо вира̄го ниродхо нибба̄на’нти. ити хетам̣ [хитам̣ (сӣ.), хи идам̣ (пӣ.)] тасса аппаватте читтам̣ паккхандати пасӣдати пахам̣сайати тусайати [пахам̣сӣйати кухӣйати (сӣ. пӣ.)]‘пат̣иладдхам̣ кхо ме ниссаран̣а’нти.

‘‘йатха̄, маха̄ра̄джа, пурисо виппанат̣т̣хо видесапаккхандо нибба̄ханамаггам̣ дисва̄ таттха паккхандати пасӣдати пахам̣сайати тусайати [пахам̣сӣйати кухӣйати (сӣ. пӣ.)] ‘пат̣иладдхо ме нибба̄ханамагго’ти, евамева кхо, маха̄ра̄джа, паватте бхайадасса̄висса аппаватте читтам̣ паккхандати пасӣдати пахам̣сайати тусайати [пахам̣сӣйати кухӣйати (сӣ. пӣ.)] ‘пат̣иладдхам̣ кхо ме ниссаран̣а’нти.

‘‘со аппаваттаттха̄йа маггам̣ а̄йӯхати гавесати бха̄вети бахулӣкароти, тасса тадаттхам̣ сати сантит̣т̣хати, тадаттхам̣ вӣрийам̣ сантит̣т̣хати, тадаттхам̣ пӣти сантит̣т̣хати, тасса там̣ читтам̣ апара̄парам̣ манасикарото паваттам̣ саматиккамитва̄ аппаваттам̣ оккамати, аппаваттамануппатто, маха̄ра̄джа, самма̄пат̣ипанно ‘нибба̄нам̣ саччхикаротӣ’ти вуччатӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

нибба̄насаччхикаран̣апан̃хо ека̄дасамо.