2. кхӣн̣а̄савабха̄вапан̃хо

2. ‘‘бханте на̄гасена, тумхе бхан̣атха ‘йо гихӣ арахаттам̣ патто, две ва̄сса гатийо бхаванти анан̃н̃а̄, тасмим̣ йева дивасе паббаджати ва̄ паринибба̄йати ва̄. на со дивасо сакка̄ атиккамету’нти. саче со, бханте на̄гасена, тасмим̣ дивасе а̄чарийам̣ ва̄ упаджджха̄йам̣ ва̄ паттачӣварам̣ ва̄ на лабхетха, апи ну кхо со араха̄ сайам̣ ва̄ паббаджеййа дивасам̣ ва̄ атиккамеййа, ан̃н̃о кочи араха̄ иддхима̄ а̄гантва̄ там̣ пабба̄джеййа ва̄ паринибба̄йеййа ва̄’’ти? ‘‘на со, маха̄ра̄джа, араха̄ сайам̣ паббаджеййа, сайам̣ паббаджанто тхеййам̣ а̄паджджати, на ча дивасам̣ атиккамеййа, ан̃н̃асса арахантасса а̄гаманам̣ бхавеййа ва̄ на ва̄ бхавеййа, тасмим̣ йева дивасе паринибба̄йеййа̄’’ти. ‘‘тена хи, бханте на̄гасена, арахаттасса сантабха̄во виджахито хоти, йена адхигатасса джӣвитаха̄ро бхаватӣ’’ти.

‘‘висамам̣, маха̄ра̄джа, гихилин̇гам̣, висаме лин̇ге лин̇гадуббалата̄йа арахаттам̣ патто гихӣ тасмим̣ йева дивасе паббаджати ва̄ паринибба̄йати ва̄. несо, маха̄ра̄джа, досо арахаттасса, гихилин̇гассевесо досо йадидам̣ лин̇гадуббалата̄.

‘‘йатха̄, маха̄ра̄джа, бходжанам̣ саббасатта̄нам̣ а̄йупа̄лакам̣ джӣвитараккхакам̣ висамакот̣т̣хасса мандадуббалагахан̣икасса авипа̄кена джӣвитам̣ харати. несо, маха̄ра̄джа, досо бходжанасса, кот̣т̣хассевесо досо йадидам̣ аггидуббалата̄. евамева кхо, маха̄ра̄джа, висаме лин̇ге лин̇гадуббалата̄йа арахаттам̣ патто гихӣ тасмим̣ йева дивасе паббаджати ва̄ паринибба̄йати ва̄. несо, маха̄ра̄джа, досо арахаттасса, гихилин̇гассевесо досо йадидам̣ лин̇гадуббалата̄.

‘‘йатха̄ ва̄ пана, маха̄ра̄джа, париттам̣ тин̣асала̄кам̣ упари гаруке па̄са̄н̣е т̣хапите дуббалата̄йа бхиджджитва̄ патати. евамева кхо, маха̄ра̄джа, арахаттам̣ патто гихӣ тена лин̇гена арахаттам̣ дха̄ретум̣ асакконто тасмим̣ йева дивасе паббаджати ва̄ паринибба̄йати ва̄.

‘‘йатха̄ ва̄ пана, маха̄ра̄джа, пурисо абало дуббало нихӣнаджаччо париттапун̃н̃о махатимаха̄раджджам̣ лабхитва̄ кхан̣ена парипатати паридхам̣сати осаккати, на саккоти иссарийам̣ дха̄ретум̣, евамева кхо, маха̄ра̄джа, арахаттам̣ патто гихӣ тена лин̇гена арахаттам̣ дха̄ретум̣ на саккоти, тена ка̄ран̣ена тасмим̣ йева дивасе паббаджати ва̄ паринибба̄йати ва̄’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

кхӣн̣а̄савабха̄вапан̃хо дутийо.