3. кхӣн̣а̄савасатисаммосапан̃хо

3. ‘‘бханте на̄гасена, аттхи арахато сатисаммосо’’ти? ‘‘вигатасатисаммоса̄ кхо, маха̄ра̄джа, араханто, наттхи араханта̄нам̣ сатисаммосо’’ти. ‘‘а̄паджджеййа пана, бханте, араха̄ а̄патти’’нти? ‘‘а̄ма, маха̄ра̄джа̄’’ти. ‘‘кисмим̣ ваттхусми’’нти? ‘‘кут̣ика̄ре, маха̄ра̄джа, сан̃чаритте, вика̄ле ка̄ласан̃н̃а̄йа, пава̄рите аппава̄ритасан̃н̃а̄йа, анатиритте атириттасан̃н̃а̄йа̄’’ти.

‘‘бханте на̄гасена, тумхе бхан̣атха ‘йе а̄паттим̣ а̄паджджанти, те двӣхи ка̄ран̣ехи а̄паджджанти ана̄дарийена ва̄ аджа̄нанена ва̄’ти. апи ну кхо, бханте, арахато ана̄дарийам̣ хоти, йам̣ араха̄ а̄паттим̣ а̄паджджатӣ’’ти? ‘‘на хи, маха̄ра̄джа̄’’ти.

‘‘йади, бханте на̄гасена, араха̄ а̄паттим̣ а̄паджджати, наттхи ча арахато ана̄дарийам̣, тена хи аттхи арахато сатисаммосо’’ти? ‘‘наттхи, маха̄ра̄джа, арахато сатисаммосо, а̄паттин̃ча араха̄ а̄паджджатӣ’’ти.

‘‘тена хи, бханте, ка̄ран̣ена мам̣ сан̃н̃а̄пехи, ким̣ таттха ка̄ран̣а’’нти? ‘‘двеме, маха̄ра̄джа, килеса̄ локаваджджам̣ пан̣н̣аттиваджджан̃ча̄ти. катамам̣, маха̄ра̄джа, локаваджджам̣? даса акусалакаммапатха̄, идам̣ вуччати локаваджджам̣. катамам̣ пан̣н̣аттиваджджам̣? йам̣ локе аттхи саман̣а̄нам̣ анануччхавикам̣ анануломикам̣, гихӣнам̣ анаваджджам̣. таттха бхагава̄ са̄вака̄нам̣ сиккха̄падам̣ пан̃н̃апети ‘йа̄ваджӣвам̣ анатиккаманӣйа’нти. вика̄лабходжанам̣, маха̄ра̄джа, локасса анаваджджам̣, там̣ джинаса̄сане ваджджам̣. бхӯтага̄мавикопанам̣, маха̄ра̄джа, локасса анаваджджам̣, там̣ джинаса̄сане ваджджам̣. удаке хассадхаммам̣, маха̄ра̄джа, локасса анаваджджам̣, там̣ джинаса̄сане ваджджам̣. ити еварӯпа̄ни еварӯпа̄ни, маха̄ра̄джа, джинаса̄сане ваджджа̄ни, идам̣ вуччати пан̣н̣аттиваджджам̣.

‘‘локаваджджам̣ абхаббо кхӣн̣а̄саво там̣ аджджха̄чаритум̣, йам̣ килесам̣ пан̣н̣аттиваджджам̣, там̣ аджа̄нанто а̄паджджеййа. ависайо, маха̄ра̄джа, екаччасса арахато саббам̣ джа̄нитум̣, на хи тасса балам̣ аттхи саббам̣ джа̄нитум̣. анан̃н̃а̄там̣, маха̄ра̄джа, арахато иттхипуриса̄нам̣ на̄мампи готтампи, маггопи тасса махийа̄ анан̃н̃а̄то; вимуттим̣ йева, маха̄ра̄джа, екаччо араха̄ джа̄неййа; чхал̣абхин̃н̃о араха̄ сакависайам̣ джа̄неййа; саббан̃н̃ӯ, маха̄ра̄джа, татха̄гатова саббам̣ джа̄на̄тӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

кхӣн̣а̄савасатисаммосапан̃хо татийо.