9. удакасаттаджӣвапан̃хо

9. ‘‘бханте на̄гасена, имам̣ удакам̣ аггимхи таппама̄нам̣ чиччит̣а̄йати чит̣ичит̣а̄йати садда̄йати бахувидхам̣, ким̣ ну кхо, бханте на̄гасена, удакам̣ джӣвати, ким̣ кӣл̣ама̄нам̣ садда̄йати, уда̄ху ан̃н̃ена пат̣ипӣл̣итам̣ садда̄йатӣ’’ти? ‘‘на хи, маха̄ра̄джа, удакам̣ джӣвати, наттхи удаке джӣво ва̄ сатто ва̄, апи ча, маха̄ра̄джа, аггисанта̄павегасса махантата̄йа удакам̣ чиччит̣а̄йати чит̣ичит̣а̄йати садда̄йати бахувидха’’нти.

‘‘бханте на̄гасена, идхекачче титтхийа̄ удакам̣ джӣватӣти сӣтодакам̣ пат̣иккхипитва̄ удакам̣ та̄петва̄ векатикавекатикам̣ парибхун̃джанти, те тумхе гараханти парибхаванти ‘екиндрийам̣ саман̣а̄ сакйапуттийа̄ джӣвам̣ вихет̣хентӣ’ти, там̣ тесам̣ гарахам̣ парибхавам̣ винодехи апанехи ниччха̄рехӣ’’ти. ‘‘на хи, маха̄ра̄джа, удакам̣ джӣвати, наттхи, маха̄ра̄джа, удаке джӣво ва̄ сатто ва̄, апи ча, маха̄ра̄джа, аггисанта̄павегасса махантата̄йа удакам̣ чиччит̣а̄йати чит̣ичит̣а̄йати садда̄йати бахувидхам̣.

‘‘йатха̄, маха̄ра̄джа, удакам̣ соббхасарасаритадахатал̣а̄какандарападараудапа̄наниннапоккхаран̣игатам̣ ва̄та̄тапавегасса махантата̄йа парийа̄дийати париккхайам̣ гаччхати, апи ну таттха удакам̣ чиччит̣а̄йати чит̣ичит̣а̄йати садда̄йати бахувидха’’нти? ‘‘на хи, бханте’’ти. ‘‘йади, маха̄ра̄джа, удакам̣ джӣвеййа, таттха̄пи удакам̣ садда̄йеййа, имина̄пи, маха̄ра̄джа, ка̄ран̣ена джа̄на̄хи ‘наттхи удаке джӣво ва̄ сатто ва̄, аггисанта̄павегасса махантата̄йа удакам̣ чиччит̣а̄йати чит̣ичит̣а̄йати садда̄йати бахувидха’нти.

‘‘апарампи, маха̄ра̄джа, уттарим̣ ка̄ран̣ам̣ сун̣охи ‘наттхи удаке джӣво ва̄ сатто ва̄, аггисанта̄павегасса махантата̄йа удакам̣ садда̄йатӣ’ти. йада̄ пана, маха̄ра̄джа, удакам̣ тан̣д̣улехи саммисситам̣ бха̄джанагатам̣ хоти пихитам̣ уддхане ат̣хапитам̣, апи ну таттха удакам̣ садда̄йатӣ’’ти? ‘‘на хи, бханте, ачалам̣ хоти сантасанта’’нти. ‘‘там̣ йева пана, маха̄ра̄джа, удакам̣ бха̄джанагатам̣ аггим̣ уджджа̄летва̄ уддхане т̣хапитам̣ хоти, апи ну таттха удакам̣ ачалам̣ хоти сантасанта’’нти? ‘‘на хи, бханте, чалати кхуббхати лул̣ати а̄вилати ӯмиджа̄там̣ хоти, уддхамадхо диса̄видисам̣ гаччхати, уттарати патарати пхен̣ама̄лӣ хотӣти. кисса пана там̣, маха̄ра̄джа, па̄катикам̣ удакам̣ на чалати сантасантам̣ хоти, кисса пана аггигатам̣ чалати кхуббхати лул̣ати а̄вилати ӯмиджа̄там̣ хоти, уддхамадхо диса̄видисам̣ гаччхати, уттарати патарати пхен̣ама̄лӣ хотӣ’’ти? ‘‘па̄катикам̣, бханте, удакам̣ на чалати, аггикатам̣ пана удакам̣ аггисанта̄павегасса махантата̄йа чиччит̣а̄йати чит̣ичит̣а̄йати садда̄йати бахувидха’’нти. ‘‘имина̄пи маха̄ра̄джа, ка̄ран̣ена джа̄на̄хи ‘наттхи удаке джӣво ва̄ сатто ва̄, аггисанта̄павегасса махантата̄йа удакам̣ садда̄йатӣ’ти.

‘‘апарампи, маха̄ра̄джа, уттарам̣ ка̄ран̣ам̣ сун̣охи, наттхи удаке джӣво ва̄ сатто ва̄, аггисанта̄павегасса махантата̄йа удакам̣ садда̄йати. хоти там̣, маха̄ра̄джа, удакам̣ гхаре гхаре удакава̄ракагатам̣ пихита’’нти? ‘‘а̄ма, бханте’’ти. ‘‘апи ну там̣, маха̄ра̄джа, удакам̣ чалати кхуббхати лул̣ати а̄вилати ӯмиджа̄там̣ хоти, уддхамадхо диса̄видисам̣ гаччхати, уттарати патарати пхен̣ама̄лӣ хотӣ’’ти. ‘‘на хи, бханте, ачалам̣ там̣ хоти па̄катикам̣ удакава̄ракагатам̣ удака’’нти.

‘‘сутапуббам̣ пана тайа̄, маха̄ра̄джа, ‘маха̄самудде удакам̣ чалати кхуббхати лул̣ати а̄вилати ӯмиджа̄там̣ хоти, уддхамадхо диса̄видисам̣ гаччхати, уттарати патарати пхен̣ама̄лӣ хоти, уссаккитва̄ оссаккитва̄ [оссаккитва̄’’ти падам̣ сӣ. пӣ. поттхакесу наттхи] вела̄йа пахарати садда̄йати бахувидха’’’нти? ‘‘а̄ма, бханте, сутапуббам̣ етам̣ майа̄ дит̣т̣хапуббан̃ча ‘маха̄самудде удакам̣ хаттхасатампи двепи хаттхасата̄ни гагане уссаккатӣ’’’ти. ‘‘кисса, маха̄ра̄джа, удакава̄ракагатам̣ удакам̣ на чалати на садда̄йати, кисса пана маха̄самудде удакам̣ чалати садда̄йатӣ’’ти? ‘‘ва̄тавегасса махантата̄йа, бханте, маха̄самудде удакам̣ чалати садда̄йати, удакава̄ракагатам̣ удакам̣ агхат̣т̣итам̣ кехичи на чалати на садда̄йатӣ’’ти. ‘‘йатха̄, маха̄ра̄джа, ва̄тавегасса махантата̄йа маха̄самудде удакам̣ чалати садда̄йати евамева аггисанта̄павегасса махантата̄йа удакам̣ садда̄йатӣ’’ти.

‘‘нану, маха̄ра̄джа, бхерипоккхарам̣ суккхам̣ суккхена гочаммена онандхантӣ’’ти? ‘‘а̄ма, бханте’’. ‘‘апи ну, маха̄ра̄джа, бхерийа̄ джӣво ва̄ сатто ва̄ аттхӣ’’ти. ‘‘на хи, бханте’’ти. ‘‘кисса пана, маха̄ра̄джа, бхерӣ садда̄йатӣ’’ти? ‘‘иттхийа̄ ва̄, бханте, пурисасса ва̄ таджджена ва̄йа̄мена̄’’ти. ‘‘йатха̄, маха̄ра̄джа, иттхийа̄ ва̄ пурисасса ва̄ таджджена ва̄йа̄мена бхерӣ садда̄йати, евамева аггисанта̄павегасса махантата̄йа удакам̣ садда̄йати. имина̄пи, маха̄ра̄джа, ка̄ран̣ена джа̄на̄хи ‘наттхи удаке джӣво ва̄ сатто ва̄, аггисанта̄павегасса махантата̄йа удакам̣ садда̄йатӣ’ти.

‘‘майхампи та̄ва, маха̄ра̄джа, тава пуччхитаббам̣ аттхи, евамесо пан̃хо сувиниччхито хоти, ким̣ ну кхо, маха̄ра̄джа, саббехипи бха̄джанехи удакам̣ таппама̄нам̣ садда̄йати, уда̄ху екаччехи йева бха̄джанехи таппама̄нам̣ садда̄йатӣ’’ти? ‘‘на хи, бханте, саббехипи бха̄джанехи удакам̣ таппама̄нам̣ садда̄йати, екаччехи йева бха̄джанехи удакам̣ таппама̄нам̣ садда̄йатӣ’’ти. ‘‘тена хи, маха̄ра̄джа, джахитоси сакасамайам̣, пачча̄гатоси мама висайам̣, наттхи удаке джӣво ва̄ сатто ва̄. йади, маха̄ра̄джа, саббехипи бха̄джанехи удакам̣ таппама̄нам̣ садда̄йеййа, йуттамидам̣ ‘удакам̣ джӣватӣ’ти ваттум̣. на хи, маха̄ра̄джа, удакам̣ двайам̣ хоти, йам̣ садда̄йати, там̣ джӣвати, йам̣ на садда̄йати, там̣ на джӣватӣти. йади, маха̄ра̄джа, удакам̣ джӣвеййа, маханта̄нам̣ хаттхина̄га̄нам̣ уссаннака̄йа̄нам̣ пабхинна̄нам̣ сон̣д̣а̄йа уссин̃читва̄ мукхе паккхипитва̄ куччхим̣ павесайанта̄нам̣, тампи удакам̣ тесам̣ дантантаре чиппийама̄нам̣ садда̄йеййа. хаттхасатика̄пи маха̄на̄ва̄ гарука̄ бха̄рика̄ анекасатасахассабха̄рапарипӯра̄ маха̄самудде вичаранти, та̄хипи чиппийама̄нам̣ удакам̣ садда̄йеййа. махатимаханта̄пи маччха̄ анекасатайоджаникака̄йа̄ тимӣ тимин̇гала̄ тимирапин̇гала̄ аббхантаре нимугга̄ маха̄самудде нива̄сат̣т̣ха̄ната̄йа пат̣ивасанта̄ маха̄удакадха̄ра̄ а̄чаманти дхаманти ча, тесампи там̣ дантантарепи ударантарепи чиппийама̄нам̣ удакам̣ садда̄йеййа. йасма̄ ча кхо, маха̄ра̄джа, еварӯпехи еварӯпехи махантехи пат̣ипӣл̣анехи пат̣ипӣл̣итам̣ удакам̣ на садда̄йати тасма̄пи наттхи удаке джӣво ва̄ сатто ва̄ти, еваметам̣, маха̄ра̄джа, дха̄рехӣ’’ти.

‘‘са̄дху, бханте на̄гасена, доса̄гато пан̃хо ануччхавика̄йа вибхаттийа̄ вибхатто, йатха̄ на̄ма, бханте на̄гасена, махаггхам̣ ман̣иратанам̣ чхекам̣ а̄чарийам̣ кусалам̣ сиккхитам̣ ман̣ика̄рам̣ па̄пун̣итва̄ киттим̣ лабхеййа тхоманам̣ пасам̣сам̣, мутта̄ратанам̣ ва̄ муттикам̣ дуссаратанам̣ ва̄ дуссикам̣, лохитачанданам̣ ва̄ гандхикам̣ па̄пун̣итва̄ киттим̣ лабхеййа тхоманам̣ пасам̣сам̣. евамева кхо, бханте на̄гасена, доса̄гато [деса̄гато (сӣ. пӣ.)] пан̃хо ануччхавика̄йа вибхаттийа̄ вибхатто, еваметам̣ татха̄ сампат̣иччха̄мӣ’’ти.

удакасаттаджӣвапан̃хо навамо.

буддхавагго пат̣хамо.

имасмим̣ вагге нава пан̃ха̄.