6. чхаддантаджотипа̄ла̄раббхапан̃хо

6. ‘‘бханте на̄гасена, бха̄ситампетам̣ бхагавата̄ чхадданто на̄гара̄джа̄ –

‘‘‘вадхиссаметанти пара̄масанто, ка̄са̄вамаддаккхи дхаджам̣ исӣнам̣;

дуккхена пхут̣т̣хассудапа̄ди сан̃н̃а̄, арахаддхаджо саббхи аваджджхарӯпо’ти.

‘‘пуна ча бхан̣итам̣ ‘джотипа̄лама̄н̣аво сама̄но кассапам̣ бхагавантам̣ арахантам̣ самма̄самбуддхам̣ мун̣д̣акава̄дена саман̣акава̄дена асаббха̄хи пхаруса̄хи ва̄ча̄хи аккоси парибха̄сӣ’ти. йади, бханте на̄гасена, бодхисатто тираччха̄нагато сама̄но ка̄са̄вам̣ абхипӯджайи, тена хи ‘джотипа̄лена ма̄н̣авена кассапо бхагава̄ арахам̣ самма̄самбуддхо мун̣д̣акава̄дена саман̣акава̄дена асаббха̄хи пхаруса̄хи ва̄ча̄хи аккут̣т̣хо парибха̄сито’ти йам̣ вачанам̣, там̣ миччха̄. йади джотипа̄лена ма̄н̣авена кассапо бхагава̄ арахам̣ самма̄самбуддхо мун̣д̣акава̄дена саман̣акава̄дена асаббха̄хи пхаруса̄хи ва̄ча̄хи аккут̣т̣хо парибха̄сито, тена хи ‘чхаддантена на̄гара̄джена ка̄са̄вам̣ пӯджита’нти тампи вачанам̣ миччха̄. йади тираччха̄нагатена бодхисаттена каккхал̣акхаракат̣укаведанам̣ ведайама̄нена луддакена ниваттхам̣ ка̄са̄вам̣ пӯджитам̣, ким̣ мануссабхӯто сама̄но парипаккан̃а̄н̣о парипакка̄йа бодхийа̄ кассапам̣ бхагавантам̣ арахантам̣ самма̄самбуддхам̣ дасабалам̣ локана̄йакам̣ удитодитам̣ джалитабйа̄мобха̄сам̣ паваруттамам̣ павараручирака̄сикака̄са̄вамабхипа̄рутам̣ дисва̄ на пӯджайи? айампи убхато кот̣ико пан̃хо тава̄нуппатто, со тайа̄ нибба̄хитабботи.

‘‘бха̄ситампетам̣, маха̄ра̄джа, бхагавата̄ чхадданто на̄гара̄джа̄ ‘вадхиссаметанти…пе… аваджджхарӯпо’ти. джотипа̄лена ча ма̄н̣авена кассапо бхагава̄ арахам̣ самма̄самбуддхо мун̣д̣акава̄дена саман̣акава̄дена асаббха̄хи пхаруса̄хи ва̄ча̄хи аккут̣т̣хо парибха̄сито, тан̃ча пана джа̄тивасена кулавасена. джотипа̄ло, маха̄ра̄джа, ма̄н̣аво ассаддхе аппасанне куле пачча̄джа̄то, тасса ма̄та̄питаро бхагинибха̄таро да̄сида̄сачет̣акапарива̄ракаманусса̄ брахмадевата̄ брахмагарука̄, те ‘бра̄хман̣а̄ ева уттама̄ павара̄’ти авасесе паббаджите гараханти джигуччханти, тесам̣ там̣ вачанам̣ сутва̄ джотипа̄ло ма̄н̣аво гхат̣ика̄рена кумбхака̄рена саттха̄рам̣ дассана̄йа паккосито евама̄ха ‘ким̣ пана тена мун̣д̣акена саман̣акена дит̣т̣хена̄’ти.

‘‘йатха̄, маха̄ра̄джа, аматам̣ висама̄саджджа титтакам̣ хоти, йатха̄ ча сӣтодакам̣ аггима̄саджджа ун̣хам̣ хоти, евамева кхо, маха̄ра̄джа, джотипа̄ло ма̄н̣аво ассаддхе аппасанне куле пачча̄джа̄то, со кулавасена андхо хутва̄ [со куладжа̄тивасена андхо бхавитва̄ (сйа̄.)] татха̄гатам̣ аккоси парибха̄си.

‘‘йатха̄, маха̄ра̄джа, джалитападжджалито маха̄аггиккхандхо саппабха̄со удакама̄саджджа упахатаппабха̄теджо сӣтало ка̄л̣ако бхавати парипакканиггун̣д̣ипхаласадисо, евамева кхо, маха̄ра̄джа, джотипа̄ло ма̄н̣аво пун̃н̃ава̄ саддхо н̃а̄н̣авипуласаппабха̄со ассаддхе аппасанне куле пачча̄джа̄то, со кулавасена андхо хутва̄ татха̄гатам̣ аккоси парибха̄си, упагантва̄ ча буддхагун̣аман̃н̃а̄йа чет̣акабхӯто вийа ахоси, джинаса̄сане паббаджитва̄ абхин̃н̃а̄ ча сама̄паттийо ча ниббаттетва̄ брахмалокӯпаго ахосӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

чхаддантаджотипа̄ла̄раббхапан̃хо чхат̣т̣хо.