5. буддхаавихет̣хакапан̃хо

5. ‘‘бханте на̄гасена, бха̄ситампетам̣ бхагавата̄ ‘пуббе ва̄хам̣ мануссабхӯто сама̄но сатта̄нам̣ авихет̣хакаджа̄тико ахоси’нти. пуна ча бхан̣итам̣ ‘ломасакассапо на̄ма иси сама̄но анекасате па̄н̣е гха̄тайитва̄ ва̄джапеййам̣ маха̄йан̃н̃ам̣ йаджӣ’ти. йади, бханте на̄гасена, бхагавата̄ бхан̣итам̣ ‘пуббе ва̄хам̣ мануссабхӯто сама̄но сатта̄нам̣ авихет̣хакаджа̄тико ахоси’нти, тена хи ‘ломасакассапена исина̄ анекасате па̄н̣е гха̄тайитва̄ ва̄джапеййам̣ маха̄йан̃н̃ам̣ йаджита’нти йам̣ вачанам̣, там̣ миччха̄. йади ‘ломасакассапена исина̄ анекасате па̄н̣е гха̄тайитва̄ ва̄джапеййам̣ маха̄йан̃н̃ам̣ йаджитам̣’, тена хи ‘пуббе ва̄хам̣ мануссабхӯто сама̄но сатта̄нам̣ авихет̣хакаджа̄тико ахоси’нти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘пуббе ва̄хам̣ мануссабхӯто сама̄но сатта̄нам̣ авихет̣хакаджа̄тико ахоси’нти, ‘ломасакассапена исина̄ анекасате па̄н̣е гха̄тайитва̄ ва̄джапеййам̣ маха̄йан̃н̃ам̣ йаджитам̣’, тан̃ча пана ра̄гавасена висан̃н̃ина̄, но сачетанена̄’’ти.

‘‘ат̣т̣химе, бханте на̄гасена, пуггала̄ па̄н̣ам̣ хананти. катаме ат̣т̣ха? ратто ра̄гавасена па̄н̣ам̣ ханати, дут̣т̣хо досавасена па̄н̣ам̣ ханати, мӯл̣хо мохавасена па̄н̣ам̣ ханати, ма̄нӣ ма̄навасена па̄н̣ам̣ ханати, луддхо лобхавасена па̄н̣ам̣ ханати, акин̃чано джӣвикаттха̄йа па̄н̣ам̣ ханати, ба̄ло хассавасена [ан̃н̃а̄н̣авасена (ка. сӣ.)] па̄н̣ам̣ ханати, ра̄джа̄ винайанавасена па̄н̣ам̣ ханати. име кхо, бханте на̄гасена, ат̣т̣ха пуггала̄ па̄н̣ам̣ хананти. па̄катикам̣ йева, бханте на̄гасена, бодхисаттена ката’’нти. ‘‘на, маха̄ра̄джа, па̄катикам̣ бодхисаттена катам̣, йади, маха̄ра̄джа, бодхисатто пакатибха̄вена онамеййа маха̄йан̃н̃ам̣ йаджитум̣, на йимам̣ га̄тхам̣ бхан̣еййа –

‘‘‘сасамуддапарийа̄йам̣, махим̣ са̄гаракун̣д̣алам̣;

на иччхе саха нинда̄йа, евам̣ сейха [сайха (сӣ. пӣ.)] виджа̄нахӣ’ти.

‘‘евам̣ва̄дӣ, маха̄ра̄джа, бодхисатто саха дассанена чандаватийа̄ ра̄джакан̃н̃а̄йа висан̃н̃ӣ ахоси кхиттачитто ратто висан̃н̃ибхӯто а̄кула̄куло туритатурито тена виккхиттабханталул̣итачиттена махатимаха̄пасугха̄тагаларухирасан̃чайам̣ ва̄джапеййам̣ маха̄йан̃н̃ам̣ йаджи.

‘‘йатха̄, маха̄ра̄джа, умматтако кхиттачитто джалитампи джа̄таведам̣ аккамати, купитампи а̄сӣвисам̣ ган̣ха̄ти, маттампи хаттхим̣ упети, самуддампи атӣрадассим̣ паккхандати, чанданикампи ол̣игаллампи омаддати, кан̣т̣ака̄дха̄нампи абхирухати, папа̄тепи патати, асучимпи бхаккхети, наггопи ратхийа̄ чарати, ан̃н̃ампи бахувидхам̣ акирийам̣ кароти. евамева кхо, маха̄ра̄джа, бодхисатто саха дассанена чандаватийа̄ ра̄джакан̃н̃а̄йа висан̃н̃ӣ ахоси кхиттачитто ратто висан̃н̃ибхӯто а̄кула̄куло туритатурито, тена виккхиттабханталул̣итачиттена махатимаха̄пасугха̄тагаларухирасан̃чайам̣ ва̄джапеййам̣ маха̄йан̃н̃ам̣ йаджи.

‘‘кхиттачиттена, маха̄ра̄джа, катам̣ па̄пам̣ дит̣т̣хадхаммепи на маха̄са̄ваджджам̣ хоти, сампара̄йе випа̄кенапи но татха̄. идха, маха̄ра̄джа, кочи умматтако ваджджхама̄паджджеййа, тасса тумхе ким̣ дан̣д̣ам̣ дха̄ретха̄’’ти? ‘‘ко, бханте, умматтакасса дан̣д̣о бхависсати, там̣ майам̣ потха̄петва̄ нӣхара̄пема, есова тасса дан̣д̣о’’ти. ‘‘ити кхо, маха̄ра̄джа, умматтакасса апара̄дхе дан̣д̣опи на бхавати, тасма̄ умматтакасса катепи на досо бхавати сатекиччхо. евамева кхо, маха̄ра̄джа, ломасакассапо иси саха дассанена чандаватийа̄ ра̄джакан̃н̃а̄йа висан̃н̃ӣ ахоси кхиттачитто ратто висан̃н̃ибхӯто висат̣апайа̄то а̄кула̄куло туритатурито, тена виккхиттабханталул̣итачиттена махатимаха̄пасугха̄тагаларухирасан̃чайам̣ ва̄джапеййам̣ маха̄йан̃н̃ам̣ йаджи. йада̄ ча пана пакатичитто ахоси пат̣иладдхассати, тада̄ пунадева паббаджитва̄ пан̃ча̄бхин̃н̃а̄йо ниббаттетва̄ брахмалокӯпаго ахосӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

буддхаавихет̣хакапан̃хо пан̃чамо.