4. маггуппа̄данапан̃хо

4. ‘‘бханте на̄гасена, бха̄ситампетам̣ бхагавата̄ ‘татха̄гато бхиккхаве, арахам̣ самма̄самбуддхо ануппаннасса маггасса уппа̄дета̄’ти. пуна ча бхан̣итам̣ ‘аддасам̣ кхва̄хам̣, бхиккхаве, пура̄н̣ам̣ маггам̣ пура̄н̣ам̣ ан̃джасам̣ пуббакехи самма̄самбуддхехи ануйа̄та’нти. йади, бханте на̄гасена, татха̄гато ануппаннасса маггасса уппа̄дета̄, тена хи ‘аддасам̣ кхва̄хам̣, бхиккхаве, пура̄н̣ам̣ маггам̣ пура̄н̣ам̣ ан̃джасам̣ пуббакехи самма̄самбуддхехи ануйа̄та’нти йам̣ вачанам̣, там̣ миччха̄. йади татха̄гатена бхан̣итам̣ ‘аддасам̣ кхва̄хам̣, бхиккхаве, пура̄н̣ам̣ маггам̣ пура̄н̣ам̣ ан̃джасам̣ пуббакехи самма̄самбуддхехи ануйа̄та’нти, тена хи ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти. бхан̣итан̃ча ‘аддасам̣ кхва̄хам̣, бхиккхаве, пура̄н̣ам̣ маггам̣ пура̄н̣ам̣ ан̃джасам̣ пуббакехи самма̄самбуддхехи ануйа̄та’нти, там̣ двайампи сабха̄вавачанамева, пуббака̄нам̣, маха̄ра̄джа, татха̄гата̄нам̣ антарадха̄нена асати ануса̄саке магго антарадха̄йи, там̣ [со там̣ (сӣ. пӣ. ка.)] татха̄гато маггам̣ луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ пан̃н̃а̄чаккхуна̄ сампассама̄но [саммасама̄но (сӣ. пӣ.)] аддаса пуббакехи самма̄самбуддхехи ануйа̄там̣, там̣ка̄ран̣а̄ а̄ха ‘аддасам̣ кхва̄хам̣, бхиккхаве, пура̄н̣ам̣ маггам̣ пура̄н̣ам̣ ан̃джасам̣ пуббакехи самма̄самбуддхехи ануйа̄та’нти.

‘‘пуббака̄нам̣, маха̄ра̄джа, татха̄гата̄нам̣ антарадха̄нена асати ануса̄саке луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ маггам̣ йам̣ да̄ни татха̄гато сан̃чаран̣ам̣ ака̄си, там̣ка̄ран̣а̄ а̄ха ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти.

‘‘идха, маха̄ра̄джа, ран̃н̃о чаккаваттисса антарадха̄нена ман̣иратанам̣ гирисикхантаре нилӣйати, апарасса чаккаваттисса самма̄пат̣ипаттийа̄ упагаччхати, апи ну кхо там̣, маха̄ра̄джа, ман̣иратанам̣ тасса паката’’нти? ‘‘на хи, бханте, па̄катикам̣ йева там̣ ман̣иратанам̣, тена пана ниббаттита’’нти [ниббаттанти (сӣ. пӣ.)]. ‘‘евамева кхо, маха̄ра̄джа, па̄катикам̣ пуббакехи татха̄гатехи анучин̣н̣ам̣ ат̣т̣хан̇гикам̣ сивам̣ маггам̣ асати ануса̄саке луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ бхагава̄ пан̃н̃а̄чаккхуна̄ сампассама̄но уппа̄деси, сан̃чаран̣ам̣ ака̄си, там̣ка̄ран̣а̄ а̄ха ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти.

‘‘йатха̄ ва̄ пана, маха̄ра̄джа, сантам̣ йева путтам̣ йонийа̄ джанайитва̄ ма̄та̄ ‘джаника̄’ти вуччати, евамева кхо, маха̄ра̄джа, татха̄гато сантам̣ йева маггам̣ луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ пан̃н̃а̄чаккхуна̄ сампассама̄но уппа̄деси, сан̃чаран̣ам̣ ака̄си, там̣ка̄ран̣а̄ а̄ха ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти.

‘‘йатха̄ ва̄ пана, маха̄ра̄джа, кочи пурисо йам̣ кин̃чи нат̣т̣хам̣ пассати, ‘тена там̣ бхан̣д̣ам̣ ниббаттита’нти джано вохарати, евамева кхо, маха̄ра̄джа, татха̄гато сантам̣ йева маггам̣ луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ пан̃н̃а̄чаккхуна̄ сампассама̄но уппа̄деси, сан̃чаран̣ам̣ ака̄си, там̣ка̄ран̣а̄ а̄ха ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’ти.

‘‘йатха̄ ва̄ пана, маха̄ра̄джа, кочи пурисо ванам̣ содхетва̄ бхӯмим̣ нӣхарати, ‘тасса са̄ бхӯмӣ’ти джано вохарати, на чеса̄ бхӯми тена паваттита̄, там̣ бхӯмим̣ ка̄ран̣ам̣ катва̄ бхӯмиса̄мико на̄ма хоти, евамева кхо, маха̄ра̄джа, татха̄гато сантам̣ йева маггам̣ луггам̣ палуггам̣ гӯл̣хам̣ пихитам̣ пат̣иччханнам̣ асан̃чаран̣ам̣ пан̃н̃а̄йа сампассама̄но уппа̄деси, сан̃чаран̣ам̣ ака̄си, там̣ка̄ран̣а̄ а̄ха ‘татха̄гато, бхиккхаве, арахам̣ самма̄самбуддхо ануппаннасса маггасса уппа̄дета̄’’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

маггуппа̄данапан̃хо чатуттхо.