2. дхаммавинайапат̣иччханна̄пат̣иччханнапан̃хо

2. ‘‘бханте на̄гасена, бха̄ситампетам̣ бхагавата̄ ‘татха̄гатаппаведито, бхиккхаве, дхаммавинайо виват̣о вирочати но пат̣иччханно’ти. пуна ча па̄тимоккхуддесо кевалан̃ча винайапит̣акам̣ пихитам̣ пат̣иччханнам̣. йади, бханте на̄гасена, джинаса̄сане йуттам̣ ва̄ паттам̣ ва̄ самайам̣ лабхетха, винайапан̣н̣атти виват̣а̄ собхеййа. кена ка̄ран̣ена? кевалам̣ таттха сиккха̄ сам̣йамо нийамо сӣлагун̣аа̄ча̄рапан̣н̣атти аттхарасо дхаммарасо вимуттирасо. йади, бханте на̄гасена, бхагавата̄ бхан̣итам̣ ‘татха̄гатаппаведито, бхиккхаве, дхаммавинайо виват̣о вирочати но пат̣иччханно’ти, тена хи ‘па̄тимоккхуддесо кевалан̃ча винайапит̣акам̣ пихитам̣ пат̣иччханна’нти йам̣ вачанам̣, там̣ миччха̄. йади па̄тимоккхуддесо кевалан̃ча винайапит̣акам̣ пихитам̣ пат̣иччханнам̣, тена хи ‘татха̄гатаппаведито, бхиккхаве, дхаммавинайо виват̣о вирочати но пат̣иччханно’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘татха̄гатаппаведито, бхиккхаве, дхаммавинайо виват̣о вирочати но пат̣иччханно’ти. пуна ча па̄тимоккхуддесо кевалан̃ча винайапит̣акам̣ пихитам̣ пат̣иччханнам̣, тан̃ча пана на саббесам̣, сӣмам̣ катва̄ пихитам̣.

‘‘тивидхена, маха̄ра̄джа, бхагавата̄ па̄тимоккхуддесо сӣмам̣ катва̄ пихито, пуббака̄нам̣ татха̄гата̄нам̣ вам̣савасена па̄тимоккхуддесо сӣмам̣ катва̄ пихито, дхаммасса гарукатта̄ пихито, бхиккхубхӯмийа̄ гарукатта̄ пихито.

‘‘катхам̣ пуббака̄нам̣ татха̄гата̄нам̣ вам̣савасена па̄тимоккхуддесо сӣмам̣ катва̄ пихито, есо вам̣со, маха̄ра̄джа, саббесам̣ пуббака̄нам̣ татха̄гата̄нам̣ йадидам̣ бхиккхумаджджхе па̄тимоккхуддесо авасеса̄нам̣ пихито. йатха̄, маха̄ра̄джа, кхаттийа̄нам̣ кхаттийама̄йа̄ кхаттийесу йева чарати, еваметам̣ кхаттийа̄нам̣ локасса павен̣ӣ авасеса̄нам̣ пихита̄. евамева кхо, маха̄ра̄джа, есо вам̣со саббесам̣ пуббака̄нам̣ татха̄гата̄нам̣ йадидам̣ бхиккхумаджджхе па̄тимоккхуддесо авасеса̄нам̣ пихито.

‘‘йатха̄ ва̄ пана, маха̄ра̄джа, махийа̄ ган̣а̄ ваттанти, сеййатхидам̣, малла̄ атон̣а̄ паббата̄ дхаммагирийа̄ брахмагирийа̄ нат̣ака̄ наччака̄ лан̇гхака̄ писа̄ча̄ ман̣ибхадда̄ пун̣н̣абаддха̄ чандимасӯрийа̄ сиридевата̄ ка̄лидевата̄, сива̄ васудева̄ гханика̄ асипа̄са̄ бхаддипутта̄ти, тесам̣ тесам̣ рахассам̣ тесу тесу ган̣есу йева чарати, авасеса̄нам̣ пихитам̣. евамева кхо, маха̄ра̄джа, есо вам̣со саббесам̣ пуббака̄нам̣ татха̄гата̄нам̣ йадидам̣ бхиккхумаджджхе па̄тимоккхуддесо авасеса̄нам̣ пихито. евам̣ пуббака̄нам̣ татха̄гата̄нам̣ вам̣савасена па̄тимоккхуддесо сӣмам̣ катва̄ пихито.

‘‘катхам̣ дхаммасса гарукатта̄ па̄тимоккхуддесо сӣмам̣ катва̄ пихито? дхаммо, маха̄ра̄джа, гаруко бха̄рийо, таттха самматтака̄рӣ ан̃н̃ам̣ а̄ра̄дхети, там̣ таттха парампара̄самматтака̄рита̄йа па̄пун̣а̄ти, на там̣ таттха парампара̄самматтака̄рита̄йа па̄пун̣а̄ти, ма̄ ча̄йам̣ са̄радхаммо варадхаммо асамматтака̄рӣнам̣ хаттхагато он̃н̃а̄то аван̃н̃а̄то хӣл̣ито кхӣл̣ито гарахито бхавату, ма̄ ча̄йам̣ са̄радхаммо варадхаммо дуджджанагато он̃н̃а̄то аван̃н̃а̄то хӣл̣ито кхӣл̣ито гарахито бхаватӯти. евам̣ дхаммасса гарукатта̄ па̄тимоккхуддесо сӣмам̣ катва̄ пихито.

‘‘йатха̄, маха̄ра̄джа, са̄раварапавараабхиджа̄таджа̄тимантаратталохитачанданам̣ на̄ма саварапураманугатам̣ он̃н̃а̄там̣ аван̃н̃а̄там̣ хӣл̣итам̣ кхӣл̣итам̣ гарахитам̣ бхавати, евамева кхо, маха̄ра̄джа, ма̄ ча̄йам̣ са̄радхаммо варадхаммо парампара̄асамматтака̄рӣнам̣ хаттхагато он̃н̃а̄то аван̃н̃а̄то хӣл̣ито кхӣл̣ито гарахито бхавату, ма̄ ча̄йам̣ са̄радхаммо варадхаммо дуджджанагато он̃н̃а̄то аван̃н̃а̄то хӣл̣ито кхӣл̣ито гарахито бхаватӯти. евам̣ дхаммасса гарукатта̄ па̄тимоккхуддесо сӣмам̣ катва̄ пихито.

‘‘катхам̣ бхиккхубхӯмийа̄ гарукатта̄ па̄тимоккхуддесо сӣмам̣ катва̄ пихито, бхиккхубха̄во кхо, маха̄ра̄джа, локе атулийо аппама̄н̣о анаггхийо, на сакка̄ кеначи аггха̄петум̣ тулетум̣ париметум̣, ма̄йам̣ еварӯпе бхиккхубха̄ве т̣хито локена самасамо бхаватӯти бхиккхӯнам̣ йева антаре па̄тимоккхуддесо чарати. йатха̄, маха̄ра̄джа, локе варапаварабхан̣д̣ам̣ ваттхам̣ ва̄ аттхаран̣ам̣ ва̄ гаджатуран̇гаратхасуван̣н̣араджатаман̣имутта̄иттхиратана̄дӣни ва̄ виджитакаммасӯра̄ ва̄ [ниджджитакаммасӯра̄ ва̄ (сӣ. пӣ.)] саббе те ра̄джа̄намупагаччханти, евамева кхо, маха̄ра̄джа, йа̄вата̄ локе [локе сиккха̄ (сӣ. пӣ.)] сугата̄гамапарийаттиа̄ча̄расам̣йамасӣласам̣варагун̣а̄, саббе те бхиккхусан̇гхамупагата̄ бхаванти. евам̣ бхиккхубхӯмийа̄ гарукатта̄ па̄тимоккхуддесо сӣмам̣ катва̄ пихито’’ти. ‘‘са̄дху, бханте на̄гасена, еваметам̣ татха̄ сампит̣иччха̄мӣ’’ти.

дхаммавинайапат̣иччханна̄пат̣иччханнапан̃хо дутийо.