1. иддхикаммавипа̄капан̃хо

1. ‘‘бханте на̄гасена, бха̄ситампетам̣ бхагавата̄ ‘етадаггам̣, бхиккхаве, мама са̄вака̄нам̣ бхиккхӯнам̣ иддхиманта̄нам̣ йадидам̣ маха̄моггалла̄но’ти. пуна ча кира со лагул̣ехи парипотхито бхиннасӣсо сан̃чун̣н̣итат̣т̣химам̣садхаманичхиннапаригатто париниббуто [дхаманимаджджапарикатто (сӣ. пӣ.), дхамманимин̃джапаригатто (сйа̄.)]. йади, бханте на̄гасена, тхеро маха̄моггалла̄но иддхийа̄ кот̣им̣ гато, тена хи лагул̣ехи потхито париниббутоти йам̣ вачанам̣, там̣ миччха̄. йади лагул̣ехи парипотхито париниббуто, тена хи иддхийа̄ кот̣им̣ гатоти тампи вачанам̣ миччха̄. ким̣ на саматтхо иддхийа̄ аттано упагха̄там̣ апанайитум̣, садевакассапи локасса пат̣исаран̣ам̣ бхавитум̣ арахоти? айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘етадаггам̣, бхиккхаве, мама са̄вака̄нам̣ бхиккхӯнам̣ иддхиманта̄нам̣ йадидам̣ маха̄моггалла̄но’ти. а̄йасма̄ ча маха̄моггалла̄но лагул̣ахато париниббуто, тан̃ча пана камма̄дхиггахитена̄’’ти.

‘‘нану, бханте на̄гасена, иддхимато иддхивисайопи каммавипа̄копи две ачинтийа̄, ачинтийена ачинтийам̣ апанайитаббам̣. йатха̄ на̄ма, бханте, кечи пхалака̄ма̄ капиттхена капиттхам̣ потхенти, амбена амбам̣ потхенти, евамева кхо, бханте на̄гасена, ачинтийена ачинтийам̣ потхайитва̄ апанетабба’’нти? ‘‘ачинтийа̄нампи, маха̄ра̄джа, екам̣ адхиматтам̣ балаватарам̣, йатха̄, маха̄ра̄джа, махийа̄ ра̄джа̄но хонти самаджачча̄, самаджачча̄нампи тесам̣ еко саббе абхибхавитва̄ а̄н̣ам̣ паваттети. евамева кхо, маха̄ра̄джа, тесам̣ ачинтийа̄нам̣ каммавипа̄кам̣ йева адхиматтам̣ балаватарам̣, каммавипа̄кам̣ йева саббе абхибхавийа а̄н̣ам̣ паваттети, камма̄дхиггахитасса авасеса̄ кирийа̄ ока̄сам̣ на лабханти.

‘‘идха пана, маха̄ра̄джа, кочи пурисо кисмин̃чидева пакаран̣е апараджджхати, на тасса ма̄та̄ ва̄ пита̄ ва̄ бхагинӣ ва̄ бха̄таро ва̄ сакхӣ ва̄ саха̄йака̄ ва̄ [бхагинибха̄таро ва̄ сакхисаха̄йака̄ ва̄ (сӣ. пӣ. ка.)] та̄йанти, атха кхо ра̄джа̄ йева таттха абхибхавийа а̄н̣ам̣ паваттети. ким̣ таттха ка̄ран̣ам̣? апара̄дхиката̄. евамева кхо, маха̄ра̄джа, тесам̣ ачинтийа̄нам̣ каммавипа̄кам̣ йева адхиматтам̣ балаватарам̣, каммавипа̄кам̣ йева саббе абхибхавийа а̄н̣ам̣ паваттети, камма̄дхиггахитасса авасеса̄ кирийа̄ ока̄сам̣ на лабханти.

‘‘йатха̄ ва̄ пана, маха̄ра̄джа, махийа̄ давад̣а̄хе самут̣т̣хите гхат̣асахассампи удакам̣ на саккоти нибба̄петум̣, атха кхо агги йева таттха абхибхавийа а̄н̣ам̣ паваттети. ким̣ таттха ка̄ран̣ам̣? балавата̄ теджасса. евамева кхо, маха̄ра̄джа, тесам̣ ачинтийа̄нам̣ каммавипа̄кам̣ йева адхиматтам̣ балаватарам̣, каммавипа̄кам̣ йева саббе абхибхавийа а̄н̣ам̣ паваттети, камма̄дхиггахитасса авасеса̄ кирийа̄ ока̄сам̣ на лабханти, тасма̄, маха̄ра̄джа, а̄йасмато маха̄моггалла̄насса камма̄дхиггахитасса лагул̣ехи потхийама̄насса иддхийа̄ саманна̄ха̄ро на̄хосӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

иддхикаммавипа̄капан̃хо пат̣хамо.