9. аггаггасаман̣апан̃хо

9. ‘‘бханте на̄гасена, бха̄ситампетам̣ бхагавата̄ ‘а̄сава̄нам̣ кхайа̄ саман̣о хотӣ’ти. пуна ча бхан̣итам̣ –

‘‘‘чатуббхи дхаммехи саман̇гибхӯтам̣, там̣ ве нарам̣ саман̣ам̣ а̄ху локе’ти.

татриме чатта̄ро дхамма̄ кханти аппа̄ха̄рата̄ ративиппаха̄нам̣ а̄кин̃чан̃н̃ам̣. сабба̄ни панета̄ни апариккхӣн̣а̄савасса сакилесассева хонти. йади, бханте на̄гасена, а̄сава̄нам̣ кхайа̄ саман̣о хоти, тена хи ‘чатуббхи дхаммехи саман̇гибхӯтам̣, там̣ ве нарам̣ саман̣ам̣ а̄ху локе’ти йам̣ вачанам̣, там̣ миччха̄. йади чатуббхи дхаммехи саман̇гибхӯто саман̣о хоти, тена хи ‘а̄сава̄нам̣ кхайа̄ саман̣о хотӣ’ти тампи вачанам̣ миччха̄, айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘а̄сава̄нам̣ кхайа̄ саман̣о хотӣ’ти. пуна ча бхан̣итам̣ ‘чатуббхи дхаммехи саман̇гибхӯтам̣, там̣ ве нарам̣ саман̣ам̣ а̄ху локе’ти. тадидам̣, маха̄ра̄джа, вачанам̣ тесам̣ тесам̣ пуггала̄нам̣ гун̣авасена бхан̣итам̣ ‘чатуббхи дхаммехи саман̇гибхӯтам̣, там̣ ве нарам̣ саман̣ам̣ а̄ху локе’ти, идам̣ пана ниравасесавачанам̣ ‘а̄сава̄нам̣ кхайа̄ саман̣о хотӣ’ти.

‘‘апи ча, маха̄ра̄джа, йе кечи килесӯпасама̄йа пат̣ипанна̄, те саббе упа̄да̄йупа̄да̄йа саман̣о кхӣн̣а̄саво аггамаккха̄йати. йатха̄, маха̄ра̄джа, йа̄ни ка̄ничи джаладжатхаладжапуппха̄ни, вассикам̣ тесам̣ аггамаккха̄йати, авасеса̄ни йа̄ни ка̄ничи вивидха̄ни пуппхаджа̄та̄ни, сабба̄ни та̄ни пуппха̄ни йева, упа̄да̄йупа̄да̄йа пана вассикам̣ йева пуппхам̣ джанасса паттхитам̣ пихайитам̣. евамева кхо, маха̄ра̄джа, йе кечи килесӯпасама̄йа пат̣ипанна̄, те саббе упа̄да̄йупа̄да̄йа саман̣о кхӣн̣а̄саво аггамаккха̄йати.

‘‘йатха̄ ва̄ пана, маха̄ра̄джа, саббадхан̃н̃а̄нам̣ са̄ли аггамаккха̄йати, йа̄ ка̄чи авасеса̄ вивидха̄ дхан̃н̃аджа̄тийо, та̄ сабба̄ упа̄да̄йупа̄да̄йа бходжана̄ни сарӣрайа̄пана̄йа, са̄ли йева тесам̣ аггамаккха̄йати. евамева кхо, маха̄ра̄джа, йе кечи килесӯпасама̄йа пат̣ипанна̄, те саббе упа̄да̄йупа̄да̄йа саман̣о кхӣн̣а̄саво аггамаккха̄йатӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

аггаггасаман̣апан̃хо навамо.