10. ван̣н̣абхан̣анапан̃хо

10. ‘‘бханте на̄гасена, бха̄ситампетам̣ бхагавата̄ ‘мамам̣ ва̄, бхиккхаве, паре ван̣н̣ам̣ бха̄сеййум̣, дхаммасса ва̄, сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо, на соманассам̣, на четасо уппила̄витаттам̣ каран̣ӣйа’нти пуна ча татха̄гато селасса бра̄хман̣асса йатха̄бхучче ван̣н̣е бхан̃н̃ама̄не а̄нандито сумано уппила̄вито бхиййо уттарим̣ сакагун̣ам̣ пакиттеси –

‘‘‘ра̄джа̄хамасми села̄ти, дхаммара̄джа̄ ануттаро;

дхаммена чаккам̣ ваттеми, чаккам̣ аппат̣иваттийа’нти [ма. ни. 2.399].

‘‘йади, бханте на̄гасена, бхагавата̄ бхан̣итам̣ ‘мамам̣ ва̄, бхиккхаве, паре ван̣н̣ам̣ бха̄сеййум̣, дхаммасса ва̄ сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо, на соманассам̣, на четасо уппила̄витаттам̣ каран̣ӣйа’нти, тена хи селасса бра̄хман̣асса йатха̄бхучче ван̣н̣е бхан̃н̃ама̄не а̄нандито сумано уппила̄вито бхиййо уттарим̣ сакагун̣ам̣ пакиттесӣти йам̣ вачанам̣, там̣ миччха̄. йади селасса бра̄хман̣асса йатха̄бхучче ван̣н̣е бхан̃н̃ама̄не а̄нандито сумано уппила̄вито бхиййо уттарим̣ сакагун̣ам̣ пакиттеси, тена хи ‘мамам̣ ва̄, бхиккхаве, паре ван̣н̣ам̣ бха̄сеййум̣, дхаммасса ва̄ сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо, на соманассам̣, на четасо уппила̄витаттам̣ каран̣ӣйа’нти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘мамам̣ ва̄, бхиккхаве, паре ван̣н̣ам̣ бха̄сеййум̣, дхаммасса ва̄ сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо, на соманассам̣, на четасо уппила̄витаттам̣ каран̣ӣйа’нти. селасса ча бра̄хман̣асса йатха̄бхучче ван̣н̣е бхан̃н̃ама̄не бхиййо уттарим̣ сакагун̣ам̣ пакиттитам̣ –

‘‘‘ра̄джа̄хамасми села̄ти, дхаммара̄джа̄ ануттаро;

дхаммена чаккам̣ ваттеми, чаккам̣ аппат̣иваттийа’нти.

‘‘пат̣хамам̣, маха̄ра̄джа, бхагавата̄ дхаммасса сабха̄васарасалаккхан̣ам̣ сабха̄вам̣ авитатхам̣ бхӯтам̣ таччхам̣ татхаттхам̣ паридӣпайама̄нена бхан̣итам̣ ‘мамам̣ ва̄ бхиккхаве, паре ван̣н̣ам̣ бха̄сеййум̣, дхаммасса ва̄ сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо, на соманассам̣, на четасо уппила̄витаттам̣ каран̣ӣйа’нти. йам̣ пана бхагавата̄ селасса бра̄хман̣асса йатха̄бхучче ван̣н̣е бхан̃н̃ама̄не бхиййо уттарим̣ сакагун̣ам̣ пакиттитам̣ ‘ра̄джа̄хамасми села̄ти, дхаммара̄джа̄ ануттаро’ти там̣ на ла̄бхахету, на йасахету, на аттахету, на паккхахету, на антева̄сикамйата̄йа, атха кхо анукампа̄йа ка̄рун̃н̃ена хитавасена евам̣ имасса дхамма̄бхисамайо бхависсати тин̣н̣ан̃ча ма̄н̣авакасата̄нанти, евам̣ бхиййо уттарим̣ сакагун̣ам̣ бхан̣итам̣ ‘ра̄джа̄хамасми села̄ти, дхаммара̄джа̄ ануттаро’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

ван̣н̣абхан̣анапан̃хо дасамо.