11. ахим̣са̄ниггахапан̃хо

11. ‘‘бханте на̄гасена, бха̄ситампетам̣ бхагавата̄ ‘ахим̣сайам̣ парам̣ локе, пийо хохиси ма̄мако’ти. пуна ча бхан̣итам̣ ‘нигган̣хе ниггаха̄рахам̣, пагган̣хе паггаха̄раха’нти. ниггахо на̄ма, бханте на̄гасена, хаттхаччхедо па̄даччхедо вадхо бандханам̣ ка̄ран̣а̄ ма̄ран̣ам̣ сантативикопанам̣, на етам̣ вачанам̣ бхагавато йуттам̣, на ча бхагава̄ арахати етам̣ вачанам̣ ваттум̣. йади, бханте на̄гасена, бхагавата̄ бхан̣итам̣ ‘ахим̣сайам̣ парам̣ локе, пийо хохиси ма̄мако’’ти, тена хи ‘‘нигган̣хе ниггаха̄рахам̣, пагган̣хе паггаха̄раха’’нти йам̣ вачанам̣, там̣ миччха̄. йади татха̄гатена бхан̣итам̣ ‘‘нигган̣хе ниггаха̄рахам̣, пагган̣хе паггаха̄раха’’нти, тена хи ‘‘ахим̣сайам̣ парам̣ локе, пийо хохиси ма̄мако’’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘ахим̣сайам̣ парам̣ локе, пийо хохиси ма̄мако’ти, бхан̣итан̃ча ‘нигган̣хе ниггаха̄рахам̣, пагган̣хе паггаха̄раха’нти. ‘ахим̣сайам̣ парам̣ локе, пийо хохиси ма̄мако’ти саббесам̣, маха̄ра̄джа, татха̄гата̄нам̣ ануматам̣ етам̣, еса̄ анусит̣т̣хи, еса̄ дхаммадесана̄, дхаммо хи, маха̄ра̄джа, ахим̣са̄лаккхан̣о, сабха̄вавачанам̣ етам̣. йам̣ пана, маха̄ра̄джа, татха̄гато а̄ха ‘нигган̣хе ниггаха̄рахам̣, пагган̣хе паггаха̄раха’нти, бха̄са̄ еса̄, уддхатам̣, маха̄ра̄джа, читтам̣ ниггахетаббам̣, лӣнам̣ читтам̣ паггахетаббам̣. акусалам̣ читтам̣ ниггахетаббам̣, кусалам̣ читтам̣ паггахетаббам̣. айонисо манасика̄ро ниггахетаббо, йонисо манасика̄ро паггахетаббо. миччха̄пат̣ипанно ниггахетаббо, самма̄пат̣ипанно паггахетаббо. анарийо ниггахетаббо арийо паггахетаббо. чоро ниггахетаббо, ачоро паггахетаббо’’ти.

‘‘хоту, бханте на̄гасена, ида̄ни твам̣ пачча̄гатоси мама висайам̣, йамахам̣ пуччха̄ми, со ме аттхо упагато. чоро пана, бханте на̄гасена, нигган̣хантена катхам̣ ниггахетаббо’’ти? ‘‘чоро, маха̄ра̄джа, нигган̣хантена евам̣ ниггахетаббо, парибха̄санӣйо парибха̄ситаббо, дан̣д̣анӣйо дан̣д̣етаббо, пабба̄джанӣйо пабба̄джетаббо, бандханӣйо бандхитаббо, гха̄танӣйо гха̄тетаббо’’ти. ‘‘йам̣ пана, бханте на̄гасена, чора̄нам̣ гха̄танам̣, там̣ татха̄гата̄нам̣ анумата’’нти? ‘‘на хи, маха̄ра̄джа̄’’ти. ‘‘кисса пана чоро ануса̄санӣйо анумато татха̄гата̄на’’нти? ‘‘йо со, маха̄ра̄джа, гха̄тӣйати, на со татха̄гата̄нам̣ ануматийа̄ гха̄тӣйати, сайам̣катена со гха̄тӣйати, апи ча дхамма̄нусит̣т̣хийа̄ ануса̄сӣйати, сакка̄ пана, маха̄ра̄джа, тайа̄ пурисам̣ ака̄ракам̣ анапара̄дхам̣ вӣтхийам̣ чарантам̣ гахетва̄ гха̄тайиту’’нти? ‘‘на сакка̄, бханте’’ти. ‘‘кена ка̄ран̣ена, маха̄ра̄джа̄’’ти? ‘‘ака̄ракатта̄, бханте’’ти. ‘‘евамева кхо, маха̄ра̄джа, на чоро татха̄гата̄нам̣ ануматийа̄ хан̃н̃ати, сайам̣катена со хан̃н̃ати, ким̣ панеттха ануса̄сако кин̃чи досам̣ а̄паджджатӣ’’ти? ‘‘на хи бханте’’ти. ‘‘тена хи, маха̄ра̄джа, татха̄гата̄нам̣ анусит̣т̣хи самма̄нусит̣т̣хи хотӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

ахим̣са̄ниггахапан̃хо ека̄дасамо.