12. бхиккхупан̣а̄митапан̃хо

12. ‘‘бханте на̄гасена, бха̄ситампетам̣ бхагавата̄ ‘аккодхано вигатакхилохамасмӣ’ти, пуна ча татха̄гато тхере са̄рипуттамоггалла̄не сапарисе пан̣а̄меси, ким̣ ну кхо, бханте на̄гасена, татха̄гато купито парисам̣ пан̣а̄меси, уда̄ху тут̣т̣хо пан̣а̄меси, етам̣ та̄ва джа̄на̄хи имам̣ на̄ма̄ти? йади, бханте на̄гасена, купито парисам̣ пан̣а̄меси, тена хи татха̄гатасса кодхо аппат̣иваттито, йади тут̣т̣хо пан̣а̄меси, тена хи аваттхусмим̣ аджа̄нантена пан̣а̄мита̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘аккодхано вигатакхилохамасмӣ’ти, пан̣а̄мита̄ ча тхера̄ са̄рипуттамоггалла̄на̄ сапариса̄, тан̃ча пана на копена, идха, маха̄ра̄джа, кочидева пурисо маха̄патхавийа̄ мӯле ва̄ кха̄н̣уке ва̄ па̄са̄н̣е ва̄ кат̣хале ва̄ висаме ва̄ бхӯмибха̄ге кхалитва̄ патати, апи ну кхо, маха̄ра̄джа, маха̄патхавӣ купита̄ там̣ па̄тетӣ’’ти? ‘‘на хи, бханте, наттхи маха̄патхавийа̄ копо ва̄ паса̄до ва̄, анунайаппат̣игхавиппамутта̄ маха̄патхавӣ, сайамева со аласо кхалитва̄ патитоти. евамева кхо, маха̄ра̄джа, наттхи татха̄гата̄нам̣ копо ва̄ паса̄до ва̄, анунайаппат̣игхавиппамутта̄ татха̄гата̄ араханто самма̄самбуддха̄, атха кхо сайам̣ катенева те аттано апара̄дхена пан̣а̄мита̄.

‘‘идха пана, маха̄ра̄джа, маха̄самуддо на матена кун̣апена сам̣васати, йам̣ хоти маха̄самудде матам̣ кун̣апам̣, там̣ кхиппамева ниччхубхати тхалам̣ усса̄рети. апи ну кхо, маха̄ра̄джа, маха̄самуддо купито там̣ кун̣апам̣ ниччхубхатӣ’’ти? ‘‘на хи, бханте, наттхи маха̄самуддасса копо ва̄ паса̄до ва̄, анунайаппат̣игхавиппамутто маха̄самуддо’’ти. ‘‘евамева кхо, маха̄ра̄джа, наттхи татха̄гата̄нам̣ копо ва̄ паса̄до ва̄, анунайаппат̣игхавиппамутта̄ татха̄гата̄ араханто самма̄самбуддха̄, атха кхо сайам̣ катенева те аттано апара̄дхена пан̣а̄мита̄.

‘‘йатха̄, маха̄ра̄джа, патхавийа̄ кхалито патӣйати, евам̣ джинаса̄санаваре кхалито пан̣а̄мӣйати. йатха̄, маха̄ра̄джа, самудде матам̣ кун̣апам̣ ниччхубхӣйати, евам̣ джинаса̄санаваре кхалито пан̣а̄мӣйати. йам̣ пана те, маха̄ра̄джа, татха̄гато пан̣а̄меси, тесам̣ аттхака̄мо хитака̄мо сукхака̄мо висуддхика̄мо ‘евам̣ име джа̄тиджара̄бйа̄дхимаран̣ехи паримуччиссантӣ’ти пан̣а̄месӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

бхиккхупан̣а̄митапан̃хо два̄дасамо.

пан̣а̄митавагго татийо.

имасмим̣ вагге два̄даса пан̃ха̄.