6. пин̣д̣апа̄тамахаппхалапан̃хо

6. ‘‘бханте на̄гасена, бха̄ситампетам̣ дхаммасан̇гӣтика̄ракехи тхерехи –

‘‘‘чундасса бхаттам̣ бхун̃джитва̄, камма̄расса̄ти ме сутам̣;

а̄ба̄дхам̣ сампхусӣ дхӣро, паба̄л̣хам̣ ма̄ран̣антика’нти [дӣ. ни. 2.190].

‘‘пуна ча бхагавата̄ бхан̣итам̣ ‘двеме, а̄нанда, пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча. катаме две? йан̃ча пин̣д̣апа̄там̣ парибхун̃джитва̄ татха̄гато ануттарам̣ самма̄самбодхим̣ абхисамбуджджхи, йан̃ча пин̣д̣апа̄там̣ парибхун̃джитва̄ татха̄гато анупа̄дисеса̄йа нибба̄надха̄туйа̄ паринибба̄йати. име две пин̣д̣апа̄та̄ самасамапхала̄ самавипа̄ка̄, ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’ти. йади, бханте на̄гасена, бхагавато чундасса бхаттам̣ бхутта̄висса [бхун̃джитва̄ (сӣ.)] кхаро а̄ба̄дхо уппанно, паба̄л̣ха̄ ча ведана̄ паватта̄ ма̄ран̣антика̄, тена хи ‘двеме, а̄нанда, пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’ти йам̣ вачанам̣, там̣ миччха̄. йади двеме пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча, тена хи бхагавато чундасса бхаттам̣ бхутта̄висса [бхун̃джитва̄ (сӣ.)] кхаро а̄ба̄дхо уппанно, паба̄л̣ха̄ ча ведана̄ паватта̄ ма̄ран̣антика̄ти тампи вачанам̣ миччха̄. ким̣ну кхо, бханте на̄гасена, со пин̣д̣апа̄то висагатата̄йа махаппхало, рогуппа̄даката̄йа махаппхало, а̄йувина̄саката̄йа махаппхало, бхагавато джӣвитахаран̣ата̄йа махаппхало? таттха ме ка̄ран̣ам̣ брӯхи парава̄да̄нам̣ ниггаха̄йа, еттха̄йам̣ джано саммӯл̣хо лобхавасена атибахум̣ кха̄йитена лохитапаккхандика̄ уппанна̄ти. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, дхаммасан̇гӣтика̄ракехи тхерехи –

‘‘‘чундасса бхаттам̣ бхун̃джитва̄, камма̄расса̄ти ме сутам̣;

а̄ба̄дхам̣ сампхусӣ дхӣро, паба̄л̣хам̣ ма̄ран̣антика’нти.

‘‘бхагавата̄ ча бхан̣итам̣ ‘двеме, а̄нанда, пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча. катаме две? йан̃ча пин̣д̣апа̄там̣ парибхун̃джитва̄ татха̄гато ануттарам̣ самма̄самбодхим̣ абхисамбуджджхи, йан̃ча пин̣д̣апа̄там̣ парибхун̃джитва̄ татха̄гато анупа̄дисеса̄йа нибба̄надха̄туйа̄ паринибба̄йати [паринибба̄йи (сӣ.)], име две пин̣д̣апа̄та̄ самасамапхала̄ самавипа̄ка̄, ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’ти.

‘‘со пана пин̣д̣апа̄то бахугун̣о анека̄нисам̣со. девата̄, маха̄ра̄джа, хат̣т̣ха̄ пасаннама̄наса̄ ‘айам̣ бхагавато паччхимо пин̣д̣апа̄то’ти диббам̣ оджам̣ сӯкарамаддаве а̄кирим̣су. тан̃ча пана самма̄па̄кам̣ лахупа̄кам̣ [бахупа̄кам̣ (сӣ.)] манун̃н̃ам̣ бахурасам̣ джат̣т̣хараггитеджасса хитам̣. на, маха̄ра̄джа, татонида̄нам̣ бхагавато кочи ануппанно рого уппанно, апи ча, маха̄ра̄джа, бхагавато пакатидуббале сарӣре кхӣн̣е а̄йусан̇кха̄ре уппанно рого бхиййо абхивад̣д̣хи.

‘‘йатха̄, маха̄ра̄джа, пакатийа̄ джалама̄но агги ан̃н̃асмим̣ упа̄да̄не динне бхиййо паджджалати, евамева кхо, маха̄ра̄джа, бхагавато пакатидуббале сарӣре кхӣн̣е а̄йусан̇кха̄ре уппанно рого бхиййо абхивад̣д̣хи.

‘‘йатха̄ ва̄ пана, маха̄ра̄джа, сото пакатийа̄ сандама̄но абхивут̣т̣хе маха̄мегхе бхиййо махогхо удакава̄хако хоти, евамева кхо, маха̄ра̄джа, бхагавато пакатидуббале сарӣре кхӣн̣е а̄йусан̇кха̄ре уппанно рого бхиййо абхивад̣д̣хи.

‘‘йатха̄ ва̄ пана, маха̄ра̄джа, пакатийа̄ абхисаннадха̄ту куччхи ан̃н̃асмим̣ аджджхохарите бхиййо а̄йамеййа [а̄майеййа (сӣ.)], евамева кхо, маха̄ра̄джа, бхагавато пакатидуббале сарӣре кхӣн̣е а̄йусан̇кха̄ре уппанно рого бхиййо абхивад̣д̣хи, наттхи, маха̄ра̄джа, тасмим̣ пин̣д̣апа̄те досо, на ча тасса сакка̄ досам̣ а̄ропету’’нти.

‘‘бханте на̄гасена, кена ка̄ран̣ена те две пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’’ти? ‘‘дхамма̄нумаджджанасама̄паттивасена, маха̄ра̄джа, те две пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’’ти.

‘‘бханте на̄гасена, катамесам̣ дхамма̄нам̣ анумаджджанасама̄паттивасена те две пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’’ти? ‘‘наваннам̣, маха̄ра̄джа, анупуббавиха̄расама̄паттӣнам̣ ануломаппат̣иломасама̄паджджанавасена те две пин̣д̣апа̄та̄ самасамапхала̄ самавипа̄ка̄ ативийа ан̃н̃ехи пин̣д̣апа̄техи махаппхалатара̄ ча маха̄нисам̣сатара̄ ча̄’’ти.

‘‘бханте на̄гасена, двӣсу йева дивасесу адхиматтам̣ татха̄гато нава̄нупуббавиха̄расама̄паттийо ануломаппат̣иломам̣ сама̄паджджӣ’’ти? ‘‘а̄ма, маха̄ра̄джа̄’’ти. ‘‘аччхарийам̣, бханте на̄гасена, аббхутам̣ бханте на̄гасена. йам̣ имасмим̣ буддхаккхетте асадисам̣ парамада̄нам̣, тампи имехи двӣхи пин̣д̣апа̄техи аган̣итам̣. аччхарийам̣, бханте на̄гасена, аббхутам̣, бханте на̄гасена. йа̄ва маханта̄ нава̄нупуббавиха̄расама̄паттийо, йатра хи на̄ма нава̄нупуббавиха̄расама̄паттивасена да̄нам̣ махаппхалатарам̣ хоти маха̄нисам̣сатаран̃ча. са̄дху, бханте на̄гасена, еваметам̣ татха̄ сампат̣иччха̄мӣ’’ти.

пин̣д̣апа̄тамахаппхалапан̃хо чхат̣т̣хо.