7. буддхапӯджанапан̃хо

7. ‘‘бханте на̄гасена, бха̄ситампетам̣ татха̄гатена ‘абйа̄ват̣а̄ тумхе, а̄нанда, хотха татха̄гатасса сарӣрапӯджа̄йа̄’ти. пуна ча бхан̣итам̣ –

‘‘‘пӯджетха нам̣ пӯджанийасса дха̄тум̣;

евам̣ кира саггамито гамиссатха̄’ти.

‘‘йади, бханте на̄гасена, татха̄гатена бхан̣итам̣ ‘абйа̄ват̣а̄ тумхе, а̄нанда, хотха татха̄гатасса сарӣрапӯджа̄йа̄’ти, тена хи ‘пӯджетха нам̣ пӯджанийасса дха̄тум̣, евам̣ кара̄ саггамито гамиссатха̄’ти йам̣ вачанам̣, там̣ миччха̄. йади татха̄гатена бхан̣итам̣ ‘пӯджетха нам̣ пӯджанийасса дха̄тум̣, евам̣ кара̄ саггамито гамиссатха̄’ти, тена хи ‘абйа̄ват̣а̄ тумхе а̄нанда, хотха татха̄гатасса сарӣрапӯджа̄йа̄’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘абйа̄ват̣а̄ тумхе, а̄нанда, хотха татха̄гатасса сарӣрапӯджа̄йа̄’ти, пуна ча бхан̣итам̣ ‘пӯджетха нам̣ пӯджанийасса дха̄тум̣, евам̣ кара̄ саггамито гамиссатха̄’ти, тан̃ча пана на саббесам̣ джинапутта̄нам̣ йева а̄раббха бхан̣итам̣ ‘абйа̄ват̣а̄ тумхе, а̄нанда, хотха татха̄гатасса сарӣрапӯджа̄йа̄’ти. акаммам̣ хетам̣, маха̄ра̄джа, джинапутта̄нам̣ йадидам̣ пӯджа̄, саммасанам̣ сан̇кха̄ра̄нам̣, йонисо манасика̄ро, сатипат̣т̣ха̄на̄нупассана̄, а̄рамман̣аса̄рагга̄хо, килесайуддхам̣, садаттхамануйун̃джана̄, етам̣ джинапутта̄нам̣ каран̣ӣйам̣, авасеса̄нам̣ деваманусса̄нам̣ пӯджа̄ каран̣ӣйа̄.

‘‘йатха̄, маха̄ра̄джа, махийа̄ ра̄джапутта̄нам̣ хаттхиассаратхадханутхарулекхамудда̄сиккха̄кхаггамантасути- саммутийуддхайуджджха̄панакирийа̄ каран̣ӣйа̄, авасеса̄нам̣ путхувессасудда̄нам̣ каси ван̣иджджа̄ гораккха̄ каран̣ӣйа̄, евамева кхо, маха̄ра̄джа, акаммам̣ хетам̣ джинапутта̄нам̣ йадидам̣ пӯджа̄, саммасанам̣ сан̇кха̄ра̄нам̣, йонисо манасика̄ро, сатипат̣т̣ха̄на̄нупассана̄, а̄рамман̣аса̄рагга̄хо, килесайуддхам̣, садаттхамануйун̃джана̄, етам̣ джинапутта̄нам̣ каран̣ӣйам̣, авасеса̄нам̣ деваманусса̄нам̣ пӯджа̄ каран̣ӣйа̄.

‘‘йатха̄ ва̄ пана, маха̄ра̄джа, бра̄хман̣ама̄н̣авака̄нам̣ ируведам̣ йаджуведам̣ са̄маведам̣ атхаббан̣аведам̣ лаккхан̣ам̣ итиха̄сам̣ пура̄н̣ам̣ нигхан̣д̣у кет̣убхам̣ аккхараппабхедам̣ падам̣ веййа̄каран̣ам̣ бха̄самаггам̣ уппа̄там̣ супинам̣ нимиттам̣ чхал̣ан̇гам̣ чандагга̄хам̣ сӯрийагга̄хам̣ суккара̄хучаритам̣ ул̣уггахайуддхам̣ [ол̣уггахайуддхам̣ (ка.)] девадундубхиссарам̣ окканти укка̄па̄там̣ бхӯмикаммам̣ [бхӯмикампам̣ (сӣ. пӣ.)] диса̄да̄хам̣ бхумманталиккхам̣ джотисам̣ лока̄йатикам̣ са̄чаккам̣ мигачаккам̣ антарачаккам̣ миссакуппа̄дам̣ сакун̣арутаравитам̣ [сакун̣арутам̣ (сӣ.)] сиккха̄ каран̣ӣйа̄, авасеса̄нам̣ путхувессасудда̄нам̣ каси ван̣иджджа̄ гораккха̄ каран̣ӣйа̄, евамева кхо, маха̄ра̄джа, акаммам̣ хетам̣ джинапутта̄нам̣ йадидам̣ пӯджа̄, саммасанам̣ сан̇кха̄ра̄нам̣, йонисо манасика̄ро, сатипат̣т̣ха̄на̄нупассана̄, а̄рамман̣аса̄рагга̄хо, килесайуддхам̣, садаттхамануйун̃джана̄, етам̣ джинапутта̄нам̣ каран̣ӣйам̣, авасеса̄нам̣ деваманусса̄нам̣ пӯджа̄ каран̣ӣйа̄, тасма̄, маха̄ра̄джа, татха̄гато ‘ма̄ име акамме йун̃джанту, камме име йун̃джантӯ’ти а̄ха ‘абйа̄ват̣а̄ тумхе, а̄нанда, хотха татха̄гатасса сарӣрапӯджа̄йа̄’ти. йадетам̣, маха̄ра̄джа, татха̄гато на бхан̣еййа, паттачӣварампи аттано парийа̄да̄петва̄ бхиккхӯ буддхапӯджам̣ йева кареййу’’нти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

буддхапӯджанапан̃хо саттамо.