5. руккхаачетана̄бха̄вапан̃хо

5. ‘‘бханте на̄гасена, бха̄ситампетам̣ татха̄гатена –

‘‘‘ачетанам̣ бра̄хман̣а ассун̣антам̣, джа̄но аджа̄нантамимам̣ пала̄сам̣;

а̄раддхавӣрийо дхувам̣ аппаматто, сукхасеййам̣ пуччхаси кисса хетӯ’ти [джа̄. 1.4.25].

пуна ча бхан̣итам̣ –

‘‘‘ити пханданаруккхопи, та̄ваде аджджхабха̄сатха;

майхампи вачанам̣ аттхи, бха̄радва̄джа сун̣охи ме’ти [джа̄. 1.13.20].

‘‘йади, бханте на̄гасена, руккхо ачетано, тена хи пханданена руккхена бха̄радва̄джена саха саллапитанти йам̣ вачанам̣, там̣ миччха̄. йади пханданена руккхена бха̄радва̄джена саддхим̣ саллапитам̣, тена хи руккхо ачетаноти тампи вачанам̣ миччха̄. айампи убхато кот̣ико пан̃хо тава̄нуппато, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘руккхо ачетано’ти, пханданена ча руккхена бха̄радва̄джена саддхим̣ саллапитам̣, тан̃ча пана вачанам̣ локасаман̃н̃а̄йа бхан̣итам̣. наттхи, маха̄ра̄джа, ачетанасса руккхасса салла̄по на̄ма, апи ча, маха̄ра̄джа, тасмим̣ руккхе адхиваттха̄йа девата̄йетам̣ адхивачанам̣ руккхоти, руккхо саллапатӣти чеса̄ локапан̣н̣атти, йатха̄, маха̄ра̄джа, сакат̣ам̣ дхан̃н̃асса парипӯритам̣ дхан̃н̃асакат̣анти джано вохарати, на ча там̣ дхан̃н̃амайам̣ сакат̣ам̣, руккхамайам̣ сакат̣ам̣, тасмим̣ сакат̣е дхан̃н̃асса пана а̄киритатта̄ дхан̃н̃асакат̣анти джано вохарати, евамева кхо, маха̄ра̄джа, на руккхо саллапати, руккхо ачетано, йа̄ пана тасмим̣ руккхе адхиваттха̄ девата̄, тасса̄ йева там̣ адхивачанам̣ руккхоти, руккхо саллапатӣти чеса̄ локапан̣н̣атти.

‘‘йатха̄ ва̄ пана, маха̄ра̄джа, дадхим̣ мантхайама̄но таккам̣ мантхемӣти вохарати, на там̣ таккам̣, йам̣ со мантхети, дадхим̣ йева со мантхенто таккам̣ мантхемӣти вохарати, евамева кхо, маха̄ра̄джа, на руккхо саллапати, руккхо ачетано. йа̄ пана тасмим̣ руккхе адхиваттха̄ девата̄, тасса̄йева там̣ адхивачанам̣ руккхоти, руккхо саллапатӣти чеса̄ локапан̣н̣атти.

‘‘йатха̄ ва̄ пана, маха̄ра̄джа, асантам̣ са̄дхетука̄мо сантам̣ са̄дхемӣти вохарати, асиддхам̣ сиддханти вохарати, евамеса̄ локасаман̃н̃а̄, евамева кхо, маха̄ра̄джа, на руккхо саллапати, руккхо ачетано. йа̄ пана тасмим̣ руккхе адхиваттха̄ девата̄, тасса̄йева там̣ адхивачанам̣ руккхоти, руккхо саллапатӣти чеса̄ локапан̣н̣атти, йа̄йа, маха̄ра̄джа, локасаман̃н̃а̄йа джано вохарати, татха̄гатопи та̄йева локасаман̃н̃а̄йа сатта̄нам̣ дхаммам̣ десетӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

руккхаачетана̄бха̄вапан̃хо пан̃чамо.