1. сет̣т̣хадхаммапан̃хо

1. ‘‘бханте на̄гасена, бха̄ситампетам̣ бхагавата̄ ‘дхаммо хи, ва̄сет̣т̣ха, сет̣т̣хо джанетасмим̣ дит̣т̣хе чева дхамме абхисампара̄йе ча̄’ти. пуна ча ‘упа̄сако гихӣ сота̄панно пихита̄па̄йо дит̣т̣хиппатто вин̃н̃а̄таса̄сано бхиккхум̣ ва̄ са̄ман̣ерам̣ ва̄ путхуджджанам̣ абхива̄дети паччут̣т̣хетӣ’ти. йади, бханте на̄гасена, бхагавата̄ бхан̣итам̣ ‘дхаммо хи, ва̄сет̣т̣ха, сет̣т̣хо джанетасмим̣ дит̣т̣хе чева дхамме абхисампара̄йе ча̄’ти, тена хи ‘упа̄сако гихӣ сота̄панно пихита̄па̄йо дит̣т̣хиппатто вин̃н̃а̄таса̄сано бхиккхум̣ ва̄ са̄ман̣ерам̣ ва̄ путхуджджанам̣ абхива̄дети паччут̣т̣хетӣ’ти йам̣ вачанам̣, там̣ миччха̄. йади ‘упа̄сако гихӣ сота̄панно пихита̄па̄йо дит̣т̣хиппатто вин̃н̃а̄таса̄сано бхиккхум̣ ва̄ са̄ман̣ерам̣ ва̄ путхуджджанам̣ абхива̄дети паччут̣т̣хети’, тена хи ‘дхаммо хи, ва̄сет̣т̣ха, сет̣т̣хо джанетасмим̣ дит̣т̣хе чева дхамме абхисампара̄йе ча̄ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘дхаммо хи, ва̄сет̣т̣ха, сет̣т̣хо джанетасмим̣ дит̣т̣хе чева дхамме абхисампара̄йе ча̄’ти, ‘упа̄сако ча гихӣ сота̄панно пихита̄па̄йо дит̣т̣хиппатто вин̃н̃а̄таса̄сано бхиккхум̣ ва̄ са̄ман̣ерам̣ ва̄ путхуджджанам̣ абхива̄дети паччут̣т̣хети’. таттха пана ка̄ран̣ам̣ аттхи. катамам̣ там̣ ка̄ран̣ам̣?

‘‘вӣсати кхо паниме, маха̄ра̄джа, саман̣асса саман̣акаран̣а̄ дхамма̄ две ча лин̇га̄ни, йехи саман̣о абхива̄данапаччут̣т̣ха̄насама̄нанапӯджана̄рахо хоти. катаме вӣсати саман̣асса саман̣акаран̣а̄ дхамма̄ две ча лин̇га̄ни? сет̣т̣хо [сет̣т̣хабхӯмисайо (сӣ. сйа̄.), сет̣т̣хо йамо (пӣ.)] дхамма̄ра̄мо, агго нийамо, ча̄ро виха̄ро сам̣йамо сам̣варо кханти сораччам̣ екаттачарийа̄ екатта̄бхирати пат̣исалла̄нам̣ хириоттаппам̣ вӣрийам̣ аппама̄до сиккха̄сама̄да̄нам̣ [сиккха̄падха̄нам̣ (сӣ. сйа̄.), сукка̄вада̄нам̣ (ка.)] уддесо парипуччха̄ сӣла̄диабхирати нира̄лайата̄ сиккха̄падапа̄рипӯрита̄, ка̄са̄вадха̄ран̣ам̣, бхан̣д̣убха̄во. име кхо, маха̄ра̄джа, вӣсати саман̣асса саман̣акаран̣а̄ дхамма̄ две ча лин̇га̄ни. ете гун̣е бхиккху сама̄да̄йа ваттати, со тесам̣ дхамма̄нам̣ анӯнатта̄ парипун̣н̣атта̄ сампаннатта̄ саманна̄гататта̄ асеккхабхӯмим̣ арахантабхӯмим̣ оккамати, сет̣т̣хам̣ бхӯмантарам̣ оккамати, арахатта̄саннагатоти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘кхӣн̣а̄савехи со са̄ман̃н̃ам̣ упагато, наттхи ме со самайо’ти [там̣ са̄ман̃н̃а’’нти (?)] арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘аггапарисам̣ со упагато, на̄хам̣ там̣ т̣ха̄нам̣ упагато’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘лабхати со па̄тимоккхуддесам̣ сотум̣, на̄хам̣ там̣ лабха̄ми соту’нти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘со ан̃н̃е пабба̄джети упасампа̄дети джинаса̄санам̣ вад̣д̣хети, ахаметам̣ на лабха̄ми ка̄ту’нти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘аппама̄н̣есу со сиккха̄падесу саматтака̄рӣ, на̄хам̣ тесу ватта̄мӣ’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘упагато со саман̣алин̇гам̣, буддха̄дхиппа̄йе т̣хито, тена̄хам̣ лин̇гена дӯрамапагато’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘‘парӯл̣хакаччхаломо со анан̃джитааман̣д̣ито анулиттасӣлагандхо, ахам̣ пана ман̣д̣анавибхӯсана̄бхирато’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘апи ча, маха̄ра̄джа, ‘йе те вӣсати саман̣акаран̣а̄ дхамма̄ две ча лин̇га̄ни, саббепете дхамма̄ бхиккхусса сам̣виджджанти, со йева те дхамме дха̄рети, ан̃н̃епи таттха сиккха̄пети, со ме а̄гамо сиккха̄панан̃ча наттхӣ’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘йатха̄, маха̄ра̄джа, ра̄джакума̄ро пурохитасса сантике виджджам̣ адхӣйати, кхаттийадхаммам̣ сиккхати, со апарена самайена абхиситто а̄чарийам̣ абхива̄дети паччут̣т̣хети ‘сиккха̄пако ме айа’нти, евамева кхо, маха̄ра̄джа, ‘бхиккху сиккха̄пако вам̣садхаро’ти арахати упа̄сако сота̄панно бхиккхум̣ путхуджджанам̣ абхива̄детум̣ паччут̣т̣ха̄тум̣.

‘‘апи ча, маха̄ра̄джа, имина̄петам̣ парийа̄йена джа̄на̄хи бхиккхубхӯмийа̄ махантатам̣ асамавипулабха̄вам̣. йади, маха̄ра̄джа, упа̄сако сота̄панно арахаттам̣ саччхикароти, двева тасса гатийо бхаванти анан̃н̃а̄ тасмим̣ йева дивасе паринибба̄йеййа ва̄, бхиккхубха̄вам̣ ва̄ упагаччхеййа. ачала̄ хи са̄, маха̄ра̄джа, паббаджджа̄, махатӣ аччуггата̄, йадидам̣ бхиккхубхӯмӣ’’ти. ‘‘н̃а̄н̣агато, бханте на̄гасена, пан̃хо суниббет̣хито балавата̄ атибуддхина̄ тайа̄, на йимам̣ пан̃хам̣ саматтхо ан̃н̃о евам̣ винивет̣хетум̣ ан̃н̃атра тава̄дисена буддхимата̄’’ти.

сет̣т̣хадхаммапан̃хо пат̣хамо.