8. абхеджджапарисапан̃хо

8. ‘‘бханте на̄гасена, тумхе бхан̣атха ‘татха̄гато абхеджджапарисо’ти, пуна ча бхан̣атха ‘девадаттена екаппаха̄рам̣ пан̃ча бхиккхусата̄ни бхинна̄нӣ’ти. йади, бханте на̄гасена, татха̄гато абхеджджапарисо, тена хи девадаттена екаппаха̄рам̣ пан̃ча бхиккхусата̄ни бхинна̄нӣти йам̣ вачанам̣, там̣ миччха̄. йади девадаттена екаппаха̄рам̣ пан̃ча бхиккхусата̄ни бхинна̄ни, тена хи ‘татха̄гато абхеджджапарисо’ти тампи вачанам̣ миччха̄. айампи убхато кот̣ико пан̃хо тава̄нуппатто, гамбхӣро дуннивет̣хийо, ган̣т̣хитопи ган̣т̣хитаро, еттха̄йам̣ джано а̄ват̣о нивуто овуто пихито парийонаддхо, еттха тава н̃а̄н̣абалам̣ дассехи парава̄десӯ’’ти.

‘‘абхеджджапарисо, маха̄ра̄джа, татха̄гато, девадаттена ча екаппаха̄рам̣ пан̃ча бхиккхусата̄ни бхинна̄ни, тан̃ча пана бхедакасса балена, бхедаке виджджама̄не наттхи, маха̄ра̄джа, абхеджджам̣ на̄ма. бхедаке сати ма̄та̄пи путтена бхиджджати, путтопи ма̄тара̄ бхиджджати, пита̄пи путтена бхиджджати, путтопи питара̄ бхиджджати, бха̄та̄пи бхагинийа̄ бхиджджати, бхагинӣпи бха̄тара̄ бхиджджати, саха̄йопи саха̄йена бхиджджати, на̄ва̄пи на̄на̄да̄русан̇гхат̣ита̄ ӯмивегасампаха̄рена бхиджджати, руккхопи мадхукаппасампаннапхало анилабалавега̄бхихато бхиджджати, суван̣н̣ампи джа̄тимантам̣ [джа̄тарӯпампи (сӣ.)] лохена бхиджджати. апи ча, маха̄ра̄джа, несо адхиппа̄йо вин̃н̃ӯнам̣, неса̄ буддха̄нам̣ адхимутти, несо пан̣д̣ита̄нам̣ чхандо ‘татха̄гато бхеджджапарисо’ти. апи четтха ка̄ран̣ам̣ аттхи, йена ка̄ран̣ена татха̄гато вуччати ‘абхеджджапарисо’ти. катамам̣ еттха ка̄ран̣ам̣? татха̄гатасса, маха̄ра̄джа, катена ада̄нена ва̄ аппийавачанена ва̄ анаттхачарийа̄йа ва̄ асама̄наттата̄йа ва̄ йато куточи чарийам̣ чарантассапи париса̄ бхинна̄ти на сутапуббам̣, тена ка̄ран̣ена татха̄гато вуччати ‘абхеджджапарисо’ти. тайа̄петам̣, маха̄ра̄джа, н̃а̄таббам̣ ‘аттхи кин̃чи наван̇ге буддхавачане сутта̄гатам̣, имина̄ на̄ма ка̄ран̣ена бодхисаттасса катена татха̄гатасса париса̄ бхинна̄’ти? ‘‘наттхи бханте, но четам̣ локе диссати нопи суййати. са̄дху, бханте на̄гасена, еваметам̣ татха̄ сампат̣иччха̄мӣ’’ти.

абхеджджапарисапан̃хо ат̣т̣хамо.

абхеджджавагго дутийо.

имасмим̣ вагге ат̣т̣ха пан̃ха̄.