7. бхиккхусан̇гхапарихаран̣апан̃хо

7. ‘‘бханте на̄гасена, бха̄ситампетам̣ бхагавата̄ ‘татха̄гатасса кхо, а̄нанда, на евам̣ хоти ‘‘ахам̣ бхиккхусан̇гхам̣ парихарисса̄мӣ’’’ти ва̄, ‘‘мамуддесико бхиккхусан̇гхо’’ти ва̄’ти. пуна ча меттеййасса бхагавато сабха̄вагун̣ам̣ паридӣпайама̄нена бхагавата̄ евам̣ бхан̣итам̣ ‘‘со анекасахассам̣ бхиккхусан̇гхам̣ парихариссати, сеййатха̄пи ахам̣ етарахи анекасатам̣ бхиккхусан̇гхам̣ парихара̄мӣ’’ти. йади, бханте на̄гасена, бхагавата̄ бхан̣итам̣ ‘татха̄гатасса кхо, а̄нанда, на евам̣ хоти ‘‘ахам̣ бхиккхусан̇гхам̣ парихарисса̄мӣ’’ти ва̄, ‘‘мамуддесико бхиккхусан̇гхо’’ти ва̄’ти, тена хи анекасатам̣ бхиккхусан̇гхам̣ парихара̄мӣти йам̣ вачанам̣, там̣ миччха̄. йади татха̄гатена бхан̣итам̣ ‘со анекасахассам̣ бхиккхусан̇гхам̣ парихариссати, сеййатха̄пи ахам̣ етарахи анекасатам̣ бхиккхусан̇гхам̣ парихара̄мӣ’ти, тена хи татха̄гатасса кхо, а̄нанда, на евам̣ хоти ‘ахам̣ бхиккхусан̇гхам̣ парихарисса̄мӣ’ти ва̄, ‘мамуддесико бхиккхусан̇гхо’ти ва̄ти тампи вачанам̣ миччха̄, айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘татха̄гатасса кхо, а̄нанда, на евам̣ хоти ‘‘ахам̣ бхиккхусан̇гхам̣ парихарисса̄мӣ’’ти ва̄, ‘‘мамуддесико бхиккхусан̇гхо’’ти ва̄’ти. пуна ча меттеййасса̄пи бхагавато сабха̄вагун̣ам̣ паридӣпайама̄нена бхагавата̄ бхан̣итам̣ ‘со анекасахассам̣ бхиккхусан̇гхам̣ парихариссати, сеййатха̄пи ахам̣ етарахи анекасатам̣ бхиккхусан̇гхам̣ парихара̄мӣ’ти. етасмин̃ча, маха̄ра̄джа, пан̃хе еко аттхо са̄васесо, еко аттхо ниравасесо. на, маха̄ра̄джа, татха̄гато париса̄йа ануга̄мико, париса̄ пана татха̄гатасса ануга̄мика̄. саммути, маха̄ра̄джа, еса̄ ‘аха’нти ‘мама̄’ти, на параматтхо есо, вигатам̣, маха̄ра̄джа, татха̄гатасса пемам̣, вигато синехо, ‘майха’нтипи татха̄гатасса гахан̣ам̣ наттхи, упа̄да̄йа пана авассайо хоти.

‘‘йатха̄, маха̄ра̄джа, патхавӣ бхӯмат̣т̣ха̄нам̣ сатта̄нам̣ патит̣т̣ха̄ хоти упассайам̣, патхавит̣т̣ха̄ чете сатта̄, на ча маха̄патхавийа̄ ‘майхете’ти апеккха̄ хоти, евамева кхо, маха̄ра̄джа, татха̄гато саббасатта̄нам̣ патит̣т̣ха̄ хоти упассайам̣, татха̄гатат̣т̣ха̄ [татха̄гатапатит̣т̣ха̄ ева (сӣ.)] чете сатта̄, на ча татха̄гатасса ‘майхете’ти апеккха̄ хоти. йатха̄ ва̄ пана, маха̄ра̄джа, махатимаха̄мегхо абхивассанто тин̣аруккхапасуманусса̄нам̣ вуд̣д̣хим̣ дети сантатим̣ анупа̄лети. вут̣т̣хӯпаджӣвино чете сатта̄ саббе, на ча маха̄мегхасса ‘майхете’ти апеккха̄ хоти. евамева кхо, маха̄ра̄джа, татха̄гато саббасатта̄нам̣ кусаладхамме джанети анупа̄лети, саттхӯпаджӣвино чете сатта̄ саббе, на ча татха̄гатасса ‘майхете’ти апеккха̄ хоти. там̣ кисса хету? атта̄нудит̣т̣хийа̄ пахӣнатта̄’’ти.

‘‘са̄дху, бханте на̄гасена, суниббет̣хито пан̃хо бахувидхехи ка̄ран̣ехи, гамбхӣро утта̄нӣкато, ган̣т̣хи бхинно, гаханам̣ агаханам̣ катам̣, андхака̄ро а̄локо като, бхагга̄ парава̄да̄, джинапутта̄нам̣ чаккхум̣ уппа̄дита’’нти.

бхиккхусан̇гхапарихаран̣апан̃хо саттамо.