6. апун̃н̃апан̃хо

6. ‘‘бханте на̄гасена, тумхе бхан̣атха ‘йо аджа̄нанто па̄н̣а̄типа̄там̣ кароти, со балаватарам̣ апун̃н̃ам̣ пасаватӣ’ти. пуна ча бхагавата̄ винайапан̃н̃аттийа̄ бхан̣итам̣ ‘ана̄патти аджа̄нантасса̄’ти. йади, бханте на̄гасена, аджа̄нитва̄ па̄н̣а̄типа̄там̣ каронто балаватарам̣ апун̃н̃ам̣ пасавати, тена хи ‘ана̄патти аджа̄нантасса̄’ти йам̣ вачанам̣, там̣ миччха̄. йади ана̄патти аджа̄нантасса, тена хи ‘аджа̄нитва̄ па̄н̣а̄типа̄там̣ каронто балаватарам̣ апун̃н̃ам̣ пасаватӣ’ти тампи вачанам̣ миччха̄. айампи убхато кот̣ико пан̃хо дуруттаро дуратиккамо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘йо аджа̄нанто па̄н̣а̄типа̄там̣ кароти, со балаватарам̣ апун̃н̃ам̣ пасаватӣ’ти. пуна ча винайапан̃н̃аттийа̄ бхагавата̄ бхан̣итам̣ ‘ана̄патти аджа̄нантасса̄’ти. таттха аттхантарам̣ аттхи. катамам̣ аттхантарам̣? аттхи, маха̄ра̄джа, а̄патти сан̃н̃а̄вимоккха̄, аттхи а̄патти носан̃н̃а̄вимоккха̄. йа̄йам̣, маха̄ра̄джа, а̄патти сан̃н̃а̄вимоккха̄, там̣ а̄паттим̣ а̄раббха бхагавата̄ бхан̣итам̣ ‘ана̄патти аджа̄нантасса̄’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

апун̃н̃апан̃хо чхат̣т̣хо.