2. абйа̄каран̣ӣйапан̃хо

2. ‘‘бханте на̄гасена, бха̄ситампетам̣ бхагавата̄ ‘наттха̄нанда татха̄гатасса дхаммесу а̄чарийамут̣т̣хӣ’ти, пуна ча тхерена ма̄лукйапуттена [ма̄лун̇кйапуттена (сӣ. сйа̄. пӣ.) сам̣. ни. 4.95; а. ни. 1.4.257 пасситаббам̣] пан̃хам̣ пут̣т̣хо на бйа̄ка̄си. есо кхо, бханте на̄гасена, пан̃хо двайанто [двайато (сӣ.)] екантаниссито бхависсати аджа̄нанена ва̄ гуйхакаран̣ена ва̄. йади, бханте на̄гасена, бхагавата̄ бхан̣итам̣ ‘наттха̄нанда татха̄гатасса дхаммесу а̄чарийамут̣т̣хӣ’ти, тена хи тхерасса ма̄лукйапуттасса аджа̄нантена на бйа̄катам̣. йади джа̄нантена на бйа̄катам̣, тена хи аттхи татха̄гатасса дхаммесу а̄чарийамут̣т̣хи. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘наттха̄нанда татха̄гатасса дхаммесу а̄чарийамут̣т̣хӣ’ти, абйа̄като ча тхерена ма̄лукйапуттена пуччхито пан̃хо, тан̃ча пана на аджа̄нантена на гуйхакаран̣ена. чатта̄рима̄ни, маха̄ра̄джа, пан̃хабйа̄каран̣а̄ни. катама̄ни чатта̄ри? екам̣сабйа̄каран̣ӣйо пан̃хо вибхаджджабйа̄каран̣ӣйо пан̃хо пат̣ипуччха̄бйа̄каран̣ӣйо пан̃хо т̣хапанӣйо пан̃хоти.

‘‘катамо ча, маха̄ра̄джа, екам̣сабйа̄каран̣ӣйо пан̃хо? ‘рӯпам̣ аничча’нти екам̣сабйа̄каран̣ӣйо пан̃хо, ‘ведана̄ аничча̄’ти…пе… ‘сан̃н̃а̄ аничча̄’ти…пе… ‘сан̇кха̄ра̄ аничча̄’ти…пе… ‘вин̃н̃а̄н̣ам̣ аничча’’нти екам̣сабйа̄каран̣ӣйо пан̃хо, айам̣ екам̣сабйа̄каран̣ӣйо пан̃хо.

‘‘катамо вибхаджджабйа̄каран̣ӣйо пан̃хо? ‘аниччам̣ пана рӯпа’нти вибхаджджабйа̄каран̣ӣйо пан̃хо, ‘аничча̄ пана ведана̄’ти…пе… ‘аничча̄ пана сан̃н̃а̄’ти…пе… ‘аничча̄ пана сан̇кха̄ра̄’ти…пе… ‘аниччам̣ пана вин̃н̃а̄н̣а’нти вибхаджджабйа̄каран̣ӣйо пан̃хо, айам̣ вибхаджджабйа̄каран̣ӣйо пан̃хо.

‘‘катамо пат̣ипуччха̄бйа̄каран̣ӣйо пан̃хо? ‘ким̣ ну кхо чаккхуна̄ саббам̣ виджа̄на̄тӣ’ти айам̣ пат̣ипуччха̄бйа̄каран̣ӣйо пан̃хо.

‘‘катамо т̣хапанӣйо пан̃хо? ‘сассато локо’ти т̣хапанӣйо пан̃хо, ‘асассато локо’ти. ‘антава̄ локо’ти. ‘анантава̄ локо’ти. ‘антава̄ ча анантава̄ ча локо’ти. ‘невантава̄ на̄нантава̄ локо’ти. ‘там̣ джӣвам̣ там̣ сарӣра’нти. ‘ан̃н̃ам̣ джӣвам̣ ан̃н̃ам̣ сарӣра’нти. ‘хоти татха̄гато парам̣ маран̣а̄’ти. ‘на хоти татха̄гато парам̣ маран̣а̄’ти. ‘хоти ча на ча хоти татха̄гато парам̣ маран̣а̄’ти. ‘нева хоти на на хоти татха̄гато парам̣ маран̣а̄’ти т̣хапанӣйо пан̃хо, айам̣ т̣хапанӣйо пан̃хо.

‘‘бхагава̄, маха̄ра̄джа, тхерасса ма̄лукйапуттасса там̣ т̣хапанӣйам̣ пан̃хам̣ на бйа̄ка̄си. со пана пан̃хо ким̣ ка̄ран̣а̄ т̣хапанӣйо? на тасса дӣпана̄йа хету ва̄ ка̄ран̣ам̣ ва̄ аттхи, тасма̄ со пан̃хо т̣хапанӣйо. наттхи буддха̄нам̣ бхагаванта̄нам̣ ака̄ран̣амахетукам̣ гирамудӣран̣а’’нти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

абйа̄каран̣ӣйапан̃хо дутийо.