9. уттарикаран̣ӣйапан̃хо

9. ‘‘бханте на̄гасена, тумхе бхан̣атха ‘йам̣ кин̃чи каран̣ӣйам̣ татха̄гатасса, саббам̣ там̣ бодхийа̄ йева мӯле паринит̣т̣хитам̣, наттхи татха̄гатасса уттарим̣ каран̣ӣйам̣, катасса ва̄ патичайо’ти, идан̃ча тема̄сам̣ пат̣исалла̄нам̣ диссати. йади, бханте на̄гасена, йам̣ кин̃чи каран̣ӣйам̣ татха̄гатасса, саббам̣ там̣ бодхийа̄ йева мӯле паринит̣т̣хитам̣, наттхи татха̄гатасса уттарим̣ каран̣ӣйам̣, катасса ва̄ патичайо, тена хи ‘тема̄сам̣ пат̣исаллӣно’ти йам̣ вачанам̣, там̣ миччха̄. йади тема̄сам̣ пат̣исаллӣно, тена хи ‘йам̣ кин̃чи каран̣ӣйам̣, татха̄гатасса, саббам̣ там̣ бодхийа̄ йева мӯле паринит̣т̣хита’нти тампи вачанам̣ миччха̄. наттхи катакаран̣ӣйасса пат̣исалла̄нам̣, сакаран̣ӣйассева пат̣исалла̄нам̣ йатха̄ на̄ма бйа̄дхитассева бхесаджджена каран̣ӣйам̣ хоти, абйа̄дхитасса ким̣ бхесаджджена. чха̄тассева бходжанена каран̣ӣйам̣ хоти, ачха̄тасса ким̣ бходжанена. евамева кхо, бханте на̄гасена, наттхи катакаран̣ӣйасса пат̣исалла̄нам̣, сакаран̣ӣйассева пат̣исалла̄нам̣. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘йам̣ кин̃чи, маха̄ра̄джа, каран̣ӣйам̣ татха̄гатасса, саббам̣ там̣ бодхийа̄ йева мӯле паринит̣т̣хитам̣, наттхи татха̄гатасса уттарим̣ каран̣ӣйам̣, катасса ва̄ патичайо, бхагава̄ ча тема̄сам̣ пат̣исаллӣно, пат̣исалла̄нам̣ кхо, маха̄ра̄джа, бахугун̣ам̣, саббепи татха̄гата̄ пат̣исаллӣйитва̄ саббан̃н̃утам̣ патта̄, там̣ те сукатагун̣амануссаранта̄ пат̣исалла̄нам̣ севанти. йатха̄, маха̄ра̄джа, пурисо ран̃н̃о сантика̄ ладдхаваро пат̣иладдхабхого там̣ сукатагун̣амануссаранто апара̄парам̣ ран̃н̃о упат̣т̣ха̄нам̣ ети. евамева кхо, маха̄ра̄джа, саббепи татха̄гата̄ пат̣исаллӣйитва̄ саббан̃н̃утам̣ патта̄, там̣ те сукатагун̣амануссаранта̄ пат̣исалла̄нам̣ севанти.

‘‘йатха̄ ва̄ пана, маха̄ра̄джа, пурисо а̄туро дуккхито ба̄л̣хагила̄но бхисаккамупасевитва̄ соттхимануппатто там̣ сукатагун̣амануссаранто апара̄парам̣ бхисаккамупасевати. евамева кхо, маха̄ра̄джа, саббепи татха̄гата̄ пат̣исаллӣйитва̄ саббан̃н̃утам̣ патта̄, там̣ те сукатагун̣амануссаранта̄ пат̣исалла̄нам̣ севанти.

‘‘ат̣т̣хавӣсати кхо паниме, маха̄ра̄джа, пат̣исалла̄нагун̣а̄, йе гун̣е самануссаранта̄ [саманупассанта̄ (сӣ. пӣ.)] татха̄гата̄ пат̣исалла̄нам̣ севанти. катаме ат̣т̣хавӣсати? идха, маха̄ра̄джа, пат̣исалла̄нам̣ пат̣исаллӣйама̄нам̣ атта̄нам̣ раккхати, а̄йум̣ вад̣д̣хети, балам̣ дети, ваджджам̣ пидахати, айасамапанети, йасамупанети, аратим̣ винодети, ратимупадахати, бхайамапанети, веса̄раджджам̣ кароти, косаджджамапанети, вӣрийамабхиджанети, ра̄гамапанети, досамапанети, мохамапанети, ма̄нам̣ ниханти, витаккам̣ бхан̃джати, читтам̣ екаггам̣ кароти, ма̄насам̣ снехайати [собхайати (сӣ.)], ха̄сам̣ джанети, гарукам̣ кароти, ла̄бхамуппа̄дайати, намассийам̣ кароти, пӣтим̣ па̄пети, па̄моджджам̣ кароти, сан̇кха̄ра̄нам̣ сабха̄вам̣ дассайати, бхаваппат̣исандхим̣ уггха̄т̣ети, саббаса̄ман̃н̃ам̣ дети. име кхо, маха̄ра̄джа, ат̣т̣хавӣсати пат̣исалла̄нагун̣а̄, йе гун̣е самануссаранта̄ татха̄гата̄ пат̣исалла̄нам̣ севанти.

‘‘апи ча кхо, маха̄ра̄джа, татха̄гата̄ сантам̣ сукхам̣ сама̄паттиратим̣ анубхавитука̄ма̄ пат̣исалла̄нам̣ севанти парийоситасан̇каппа̄. чатӯхи кхо, маха̄ра̄джа, ка̄ран̣ехи татха̄гата̄ пат̣исалла̄нам̣ севанти. катамехи чатӯхи? виха̄рапха̄сута̄йапи, маха̄ра̄джа, татха̄гата̄ пат̣исалла̄нам̣ севанти, анаваджджагун̣абахулата̄йапи татха̄гата̄ пат̣исалла̄нам̣ севанти, асесаарийавӣтхитопи татха̄гата̄ пат̣исалла̄нам̣ севанти, саббабуддха̄нам̣ тхутатхомитаван̣н̣итапасаттхатопи татха̄гата̄ пат̣исалла̄нам̣ севанти. имехи кхо, маха̄ра̄джа, чатӯхи ка̄ран̣ехи татха̄гата̄ пат̣исалла̄нам̣ севанти. ити кхо, маха̄ра̄джа, татха̄гата̄ пат̣исалла̄нам̣ севанти на сакаран̣ӣйата̄йа, на катасса ва̄ патичайа̄йа, атха кхо гун̣ависесадасса̄вита̄йа татха̄гата̄ пат̣исалла̄нам̣ севантӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

уттарикаран̣ӣйапан̃хо навамо.