10. иддхибаладассанапан̃хо

10. ‘‘бханте на̄гасена, бха̄ситампетам̣ бхагавата̄ ‘татха̄гатасса кхо, а̄нанда, чатта̄ро иддхипа̄да̄ бха̄вита̄ бахулӣката̄ йа̄нӣката̄ ваттхуката̄ анут̣т̣хита̄ паричита̄ сусама̄раддха̄, со а̄кан̇кхама̄но, а̄нанда, татха̄гато каппам̣ ва̄ тит̣т̣хеййа каппа̄васесам̣ ва̄’ти. пуна ча бхан̣итам̣ ‘ито тин̣н̣ам̣ ма̄са̄нам̣ аччайена татха̄гато паринибба̄йиссатӣ’ти. йади, бханте на̄гасена, бхагавата̄ бхан̣итам̣ ‘татха̄гатасса кхо, а̄нанда, чатта̄ро иддхипа̄да̄ бха̄вита̄…пе… каппа̄васесам̣ ва̄’ти, тена хи тема̄сапариччхедо миччха̄. йади, бханте, татха̄гатена бхан̣итам̣ ‘ито тин̣н̣ам̣ ма̄са̄нам̣ аччайена татха̄гато паринибба̄йиссатӣ’ти, тена хи ‘‘татха̄гатасса кхо, а̄нанда, чатта̄ро иддхипа̄да̄ бха̄вита̄…пе… каппа̄васесам̣ ва̄’ти тампи вачанам̣ миччха̄. наттхи татха̄гата̄нам̣ ат̣т̣ха̄не гаджджитам̣. амогхавачана̄ буддха̄ бхагаванто татхавачана̄ адведжджхавачана̄. айампи убхато кот̣ико пан̃хо гамбхӣро сунипун̣о дунниджджха̄пайо тава̄нуппатто, бхиндетам̣ дит̣т̣хиджа̄лам̣, екам̣се т̣хапайа, бхинда парава̄да’’нти.

‘‘бха̄ситампетам̣, маха̄ра̄джа, бхагавата̄ ‘татха̄гатасса кхо, а̄нанда, чатта̄ро иддхипа̄да̄ бха̄вита̄…пе… каппа̄васесам̣ ва̄’ти, тема̄сапариччхедо ча бхан̣ито, со ча пана каппо а̄йукаппо вуччати. на, маха̄ра̄джа, бхагава̄ аттано балам̣ киттайама̄но евама̄ха, иддхибалам̣ пана маха̄ра̄джа, бхагава̄ парикиттайама̄но евама̄ха ‘татха̄гатасса кхо, а̄нанда, чатта̄ро иддхипа̄да̄ бха̄вита̄…пе… каппа̄васесам̣ ва̄’ти.

‘‘йатха̄, маха̄ра̄джа, ран̃н̃о асса̄джа̄нӣйо бхавеййа сӣгхагати аниладжаво, тасса ра̄джа̄ джавабалам̣ парикиттайанто санегамаджа̄нападабхат̣абалабра̄хман̣агахапатикаамаччаджанамаджджхе евам̣ вадеййа ‘а̄кан̇кхама̄но ме, бхо, айам̣ хайаваро са̄гараджалапарийантам̣ махим̣ анувичаритва̄ кхан̣ена идха̄гаччхеййа̄’ти, на ча там̣ джавагатим̣ тассам̣ париса̄йам̣ дассеййа, виджджати ча со джаво тасса, саматтхо ча со кхан̣ена са̄гараджалапарийантам̣ махим̣ анувичаритум̣. евамева кхо, маха̄ра̄джа, бхагава̄ аттано иддхибалам̣ парикиттайама̄но евама̄ха, тампи тевиджджа̄нам̣ чхал̣абхин̃н̃а̄нам̣ араханта̄нам̣ вималакхӣн̣а̄сава̄нам̣ деваманусса̄нан̃ча маджджхе нисӣдитва̄ бхан̣итам̣ ‘татха̄гатасса кхо, а̄нанда, чатта̄ро иддхипа̄да̄ бха̄вита̄ бахулӣката̄ йа̄нӣката̄ ваттхуката̄ анут̣т̣хита̄ паричита̄ сусама̄раддха̄, со а̄кан̇кхама̄но, а̄нанда, татха̄гато каппам̣ ва̄ тит̣т̣хеййа каппа̄васесам̣ ва̄’ти. виджджати ча там̣, маха̄ра̄джа, иддхибалам̣ бхагавато, саматтхо ча бхагава̄ иддхибалена каппам̣ ва̄ т̣ха̄тум̣ каппа̄васесам̣ ва̄, на ча бхагава̄ там̣ иддхибалам̣ тассам̣ париса̄йам̣ дассети, анаттхико, маха̄ра̄джа, бхагава̄ саббабхавехи, гарахита̄ ча татха̄гатасса саббабхава̄. бха̄ситампетам̣, маха̄ра̄джа, бхагавата̄ ‘сеййатха̄пи, бхиккхаве, аппаматтакопи гӯтхо дуггандхо хоти. евамева кхо ахам̣, бхиккхаве, аппаматтакампи бхавам̣ на ван̣н̣еми антамасо аччхара̄сан̇гха̄таматтампӣ’ти апи ну кхо, маха̄ра̄джа, бхагава̄ саббабхавагатийонийо гӯтхасамам̣ дисва̄ иддхибалам̣ нисса̄йа бхавесу чхандара̄гам̣ кареййа̄’’ти? ‘‘на хи бханте’’ти. ‘‘тена хи, маха̄ра̄джа, бхагава̄ иддхибалам̣ парикиттайама̄но еварӯпам̣ буддхасӣхана̄дамабхинадӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

иддхибаладассанапан̃хо дасамо.

иддхибалавагго пат̣хамо.

имасмим̣ вагге даса пан̃ха̄.