7. па̄папун̃н̃а̄нам̣ аппа̄наппабха̄вапан̃хо

7. ра̄джа̄ а̄ха ‘‘бханте на̄гасена, катарам̣ ну кхо бахутарам̣ пун̃н̃ам̣ ва̄ апун̃н̃ам̣ ва̄’’ти? ‘‘пун̃н̃ам̣ кхо, маха̄ра̄джа, бахутарам̣, апун̃н̃ам̣ тхока’’нти. ‘‘кена ка̄ран̣ена̄’’ти? ‘‘апун̃н̃ам̣ кхо, маха̄ра̄джа, каронто виппат̣иса̄рӣ хоти ‘па̄пакаммам̣ майа̄ ката’нти, тена па̄пам̣ на вад̣д̣хати. пун̃н̃ам̣ кхо, маха̄ра̄джа, каронто авиппат̣иса̄рӣ хоти, авиппат̣иса̄рино па̄моджджам̣ джа̄йати, памудитасса пӣти джа̄йати, пӣтиманасса ка̄йо пассамбхати, пассаддхака̄йо сукхам̣ ведети, сукхино читтам̣ сама̄дхийати, сама̄хито йатха̄бхӯтам̣ паджа̄на̄ти, тена ка̄ран̣ена пун̃н̃ам̣ вад̣д̣хати. пурисо кхо, маха̄ра̄джа, чхиннахаттхапа̄до бхагавато екам̣ уппалахаттхам̣ датва̄ еканавутикаппа̄ни винипа̄там̣ на гаччхиссати. имина̄пи, маха̄ра̄джа, ка̄ран̣ена бхан̣а̄ми ‘пун̃н̃ам̣ бахутарам̣, апун̃н̃ам̣ тхока’’’нти.

‘‘каллоси, бханте на̄гасена̄’’ти.

па̄папун̃н̃а̄нам̣ аппа̄наппабха̄вапан̃хо саттамо.