8. джа̄нанта̄джа̄нантапа̄пакаран̣апан̃хо

8. ра̄джа̄ а̄ха ‘‘бханте на̄гасена, йо джа̄нанто па̄пакаммам̣ кароти, йо аджа̄нанто па̄пакаммам̣ кароти, касса бахутарам̣ апун̃н̃а’’нти? тхеро а̄ха ‘‘йо кхо, маха̄ра̄джа, аджа̄нанто па̄пакаммам̣ кароти, тасса бахутарам̣ апун̃н̃а’’нти. ‘‘тена хи, бханте на̄гасена, йо амха̄кам̣ ра̄джапутто ва̄ ра̄джамаха̄матто ва̄ аджа̄нанто па̄пакаммам̣ кароти, там̣ майам̣ дигун̣ам̣ дан̣д̣ема̄’’ти? ‘‘там̣ ким̣ ман̃н̃аси, маха̄ра̄джа, таттам̣ айогул̣ам̣ а̄диттам̣ сампаджджалитам̣ саджотибхӯтам̣ еко джа̄нанто ган̣хеййа, еко аджа̄нанто ган̣хеййа, катамо [касса (ка.)] балаватарам̣ д̣айхеййа̄’’ти. ‘‘йо кхо, бханте, аджа̄нанто ган̣хеййа, со [тасса (пӣ. ка.)] балаватарам̣ д̣айхеййа̄’’ти. ‘‘евамева кхо, маха̄ра̄джа, йо аджа̄нанто па̄пакаммам̣ кароти, тасса бахутарам̣ апун̃н̃а’’нти.

‘‘каллоси, бханте на̄гасена̄’’ти.

джа̄нанта̄джа̄нантапа̄пакаран̣апан̃хо ат̣т̣хамо.