16. арӯпадхаммававаттха̄надуккарапан̃хо

16. ра̄джа̄ а̄ха ‘‘бханте на̄гасена, дуккарам̣ ну кхо бхагавата̄ ката’’нти? тхеро а̄ха ‘‘дуккарам̣, маха̄ра̄джа, бхагавата̄ ката’’нти. ‘‘ким̣ пана, бханте на̄гасена, бхагавата̄ дуккарам̣ ката’’нти. ‘‘дуккарам̣, маха̄ра̄джа, бхагавата̄ катам̣ имесам̣ арӯпӣнам̣ читтачетасика̄нам̣ дхамма̄нам̣ ека̄рамман̣е ваттама̄на̄нам̣ ваваттха̄нам̣ аккха̄там̣ ‘айам̣ пхассо, айам̣ ведана̄, айам̣ сан̃н̃а̄, айам̣ четана̄, идам̣ читта’’’нти.

‘‘опаммам̣ карохӣ’’ти. ‘‘йатха̄, маха̄ра̄джа, кочидева пурисо на̄ва̄йа маха̄самуддам̣ аджджхога̄хетва̄ хаттхапут̣ена удакам̣ гахетва̄ дживха̄йа са̄йитва̄ джа̄неййа ну кхо, маха̄ра̄джа, со пурисо ‘‘идам̣ ган̇га̄йа удакам̣, идам̣ йамуна̄йа удакам̣, идам̣ ачираватийа̄ удакам̣, идам̣ сарабхуйа̄ удакам̣, идам̣ махийа̄ удака’’’нти? ‘‘дуккарам̣, бханте, джа̄ниту’’нти. ‘‘ито дуккаратарам̣ кхо, маха̄ра̄джа, бхагавата̄ катам̣ имесам̣ арӯпӣнам̣ читтачетасика̄нам̣ дхамма̄нам̣ ека̄рамман̣е ваттама̄на̄нам̣ ваваттха̄нам̣ аккха̄там̣ ‘айам̣ пхассо, айам̣ ведана̄, айам̣ сан̃н̃а̄, айам̣ четана̄, идам̣ читта’’’нти. ‘‘сут̣т̣ху, бханте’’ти ра̄джа̄ аббха̄нумодӣти.

арӯпадхаммававаттха̄надуккарапан̃хо сол̣асамо.

арӯпадхаммававаттха̄навагго саттамо.

имасмим̣ вагге сол̣аса пан̃ха̄.