2. саббан̃н̃ӯбха̄вапан̃хо

2. ра̄джа̄ а̄ха ‘‘бханте на̄гасена, буддхо саббан̃н̃ӯ саббадасса̄вӣ’’ти? ‘‘а̄ма, маха̄ра̄джа, бхагава̄ саббан̃н̃ӯ саббадасса̄вӣ’’ти. ‘‘атха кисса ну кхо, бханте на̄гасена, са̄вака̄нам̣ анупуббена сиккха̄падам̣ пан̃н̃апесӣ’’ти? ‘‘аттхи пана те маха̄ра̄джа, кочи веджджо, йо имиссам̣ патхавийам̣ саббабхесаджджа̄ни джа̄на̄тӣ’’ти? ‘‘а̄ма, бханте, аттхӣ’’ти. ‘‘ким̣ну кхо, маха̄ра̄джа, со веджджо гила̄накам̣ сампатте ка̄ле бхесаджджам̣ па̄йети, уда̄ху асампатте ка̄ле’’ти? ‘‘сампатте ка̄ле, бханте, гила̄накам̣ бхесаджджам̣ па̄йети, но асампатте ка̄ле’’ти? ‘‘евамева кхо, маха̄ра̄джа, бхагава̄ саббан̃н̃ӯ саббадасса̄вӣ на асампатте ка̄ле са̄вака̄нам̣ сиккха̄падам̣ пан̃н̃а̄пети, сампатте ка̄ле са̄вака̄нам̣ сиккха̄падам̣ пан̃н̃а̄пети йа̄ваджӣвам̣ анатиккаманӣйа’’нти.

‘‘каллоси, бханте на̄гасена̄’’ти.

саббан̃н̃ӯбха̄вапан̃хо дутийо.