8. пхассалаккхан̣апан̃хо

8. ра̄джа̄ а̄ха ‘‘бханте на̄гасена, йаттха мановин̃н̃а̄н̣ам̣ уппаджджати, пхассопи ведана̄пи таттха уппаджджатӣ’’ти? ‘‘а̄ма, маха̄ра̄джа, йаттха мановин̃н̃а̄н̣ам̣ уппаджджати, пхассопи таттха уппаджджати, ведана̄пи таттха уппаджджати, сан̃н̃а̄пи таттха уппаджджати, четана̄пи таттха уппаджджати, витаккопи таттха уппаджджати, вича̄ропи таттха уппаджджати, саббепи пхассаппамукха̄ дхамма̄ таттха уппаджджантӣ’’ти.

‘‘бханте на̄гасена, ким̣лаккхан̣о пхассо’’ти? ‘‘пхусаналаккхан̣о, маха̄ра̄джа, пхассо’’ти.

‘‘опаммам̣ карохӣ’’ти. ‘‘йатха̄, маха̄ра̄джа, две мен̣д̣а̄ йуджджхеййум̣, тесу йатха̄ еко мен̣д̣о, евам̣ чаккху дат̣т̣хаббам̣ йатха̄ дутийо мен̣д̣о, евам̣ рӯпам̣ дат̣т̣хаббам̣. йатха̄ тесам̣ саннипа̄то, евам̣ пхассо дат̣т̣хаббо’’ти.

‘‘бхиййо опаммам̣ карохӣ’’ти. ‘‘йатха̄, маха̄ра̄джа, две па̄н̣ӣ ваджджеййум̣, тесу йатха̄ еко па̄н̣и, евам̣ чаккху дат̣т̣хаббам̣. йатха̄ дутийо па̄н̣и, евам̣ рӯпам̣ дат̣т̣хаббам̣. йатха̄ тесам̣ саннипа̄то, евам̣ пхассо дат̣т̣хаббо’’ти.

‘‘бхиййо опаммам̣ карохӣ’’ти. ‘‘йатха̄, маха̄ра̄джа, две самма̄ ваджджеййум̣, тесу йатха̄ еко саммо, евам̣ чаккху дат̣т̣хаббам̣. йатха̄ дутийо саммо, евам̣ рӯпам̣ дат̣т̣хаббам̣. йатха̄ тесам̣ саннипа̄то, евам̣ пхассо дат̣т̣хаббо’’ти.

‘‘каллоси, бханте на̄гасена̄’’ти.

пхассалаккхан̣апан̃хо ат̣т̣хамо.