9. ведана̄лаккхан̣апан̃хо

9. ‘‘бханте на̄гасена, ким̣лаккхан̣а̄ ведана̄’’ти? ‘‘ведайиталаккхан̣а̄, маха̄ра̄джа, ведана̄ анубхаваналаккхан̣а̄ ча̄’’ти.

‘‘опаммам̣ карохӣ’’ти. ‘‘йатха̄, маха̄ра̄джа, кочидева пурисо ран̃н̃о адхика̄рам̣ кареййа, тасса ра̄джа̄ тут̣т̣хо адхика̄рам̣ дадеййа, со тена адхика̄рена пан̃чахи ка̄магун̣ехи самаппито саман̇гибхӯто паричареййа, тасса евамасса ‘майа̄ кхо пуббе ран̃н̃о адхика̄ро като, тасса ме ра̄джа̄ тут̣т̣хо адхика̄рам̣ ада̄си, сва̄хам̣ татонида̄нам̣ имам̣ еварӯпам̣ веданам̣ ведайа̄мӣ’ти.

‘‘йатха̄ ва̄ пана, маха̄ра̄джа, кочидева пурисо кусалам̣ каммам̣ катва̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа, со ча таттха диббехи пан̃чахи ка̄магун̣ехи самаппито саман̇гибхӯто паричареййа, тасса евамасса ‘сва̄хам̣ кхо пуббе кусалам̣ каммам̣ ака̄сим̣, сохам̣ татонида̄нам̣ имам̣ еварӯпам̣ веданам̣ ведайа̄мӣ’ти, евам̣ кхо, маха̄ра̄джа, ведайиталаккхан̣а̄ ведана̄ анубхаваналаккхан̣а̄ ча̄’’ти.

‘‘каллоси, бханте на̄гасена̄’’ти.

ведана̄лаккхан̣апан̃хо навамо.