3. ад̣д̣хавагго

371. дӣгхӣтикосаладжа̄такам̣ (5-3-1)

110. евам̣бхӯтасса те ра̄джа, а̄гатасса васе [васо (пӣ. ка.)] мама;

аттхи ну кочи парийа̄йо, йо там̣ дуккха̄ памочайе.

111. евам̣бхӯтасса ме та̄та, а̄гатасса васе тава;

наттхи но кочи парийа̄йо, йо мам̣ дуккха̄ памочайе.

112. на̄н̃н̃ам̣ сучаритам̣ ра̄джа, на̄н̃н̃ам̣ ра̄джа субха̄ситам̣;

та̄йате маран̣ака̄ле, евамевитарам̣ дханам̣.

113. аккоччхи мам̣ авадхи мам̣, аджини мам̣ аха̄си ме;

йе ча там̣ упанайханти, верам̣ тесам̣ на саммати.

114. аккоччхи мам̣ авадхи мам̣, аджини мам̣ аха̄си ме;

йе ча там̣ нупанайханти, верам̣ тесӯпасаммати.

115. на хи верена вера̄ни, саммантӣдха куда̄чанам̣;

аверена ча самманти, еса дхаммо санантаноти.

дӣгхӣтикосаладжа̄такам̣ пат̣хамам̣.

372. мигапотакаджа̄такам̣ (5-3-2)

116. ага̄ра̄ паччупетасса, анага̄расса те сато;

саман̣асса на там̣ са̄дху, йам̣ петаманусочаси.

117. сам̣ва̄сена хаве сакка, мануссасса мигасса ва̄;

хадайе джа̄йате пемам̣, на там̣ сакка̄ асочитум̣.

118. матам̣ мариссам̣ роданти, йе руданти лапанти ча;

тасма̄ твам̣ иси ма̄ роди, родитам̣ могхама̄ху санто.

119. родитена хаве брахме, мато пето самут̣т̣хахе;

саббе сан̇гамма рода̄ма, ан̃н̃аман̃н̃асса н̃а̄таке.

120. а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

121. аббахи вата ме саллам̣, йама̄си хадайасситам̣;

йо ме сокапаретасса, путтасокам̣ апа̄нуди.

122. сохам̣ аббӯл̣хасаллосми, вӣтасоко ана̄вило;

на соча̄ми на рода̄ми, тава сутва̄на ва̄сава̄ти.

мигапотакаджа̄такам̣ дутийам̣.

373. мӯсикаджа̄такам̣ (5-3-3)

123. кухим̣ гата̄ каттха гата̄, ити ла̄лаппатӣ джано;

ахамевеко джа̄на̄ми, удапа̄не мӯсика̄ хата̄.

124. йан̃четам̣ [йатхетам̣ (пӣ.), йаветам̣ (ка.), йаметам̣ (каттхачи)] ити чӣти ча, гадрабхова ниваттаси;

удапа̄не мӯсикам̣ хантва̄, йавам̣ бхаккхетумиччхаси.

125. дахаро ча̄си думмедха, пат̣хамуппаттико [пат̣хамуппаттито (сӣ. пӣ.)] сусу;

дӣгхан̃четам̣ [дӣгхаметам̣ (пӣ.)] сама̄саджджа [сама̄паджджа (сйа̄. ка.)], на те дасса̄ми джӣвитам̣.

126. на̄нталиккхабхаванена, на̄н̇гапуттапинена [на̄н̇гапуттасирена (сӣ. сйа̄. пӣ.)] ва̄;

путтена хи паттхайито, силокехи памочито.

127. саббам̣ сутамадхӣйетха, хӣнамуккат̣т̣хамаджджхимам̣;

саббасса аттхам̣ джа̄неййа, на ча саббам̣ пайоджайе;

хоти та̄дисако ка̄ло, йаттха аттха̄вахам̣ сутанти.

мӯсикаджа̄такам̣ татийам̣.

374. чӯл̣адхануггахаджа̄такам̣ (5-3-4)

128. саббам̣ бхан̣д̣ам̣ сама̄да̄йа, па̄рам̣ тин̣н̣оси бра̄хман̣а;

пачча̄гаччха лахум̣ кхиппам̣, мампи та̄рехи да̄нито [да̄нибхо (сйа̄.)].

129. асантхутам̣ мам̣ чирасантхутена, нимӣни бхотӣ аддхувам̣ дхувена;

майа̄пи бхотӣ ниминеййа ан̃н̃ам̣, ито ахам̣ дӯратарам̣ гамиссам̣.

130. ка̄йам̣ ел̣агала̄гумбе [ел̣аган̣агумбе (ка.)], кароти ахуха̄сийам̣;

найӣдха наччагӣтам̣ ва̄ [найидха наччам̣ ва̄ гӣтам̣ ва̄ (сӣ. сйа̄. пӣ.)], та̄л̣ам̣ ва̄ сусама̄хитам̣;

анамхика̄ле [анамхака̄ле (пӣ.)] сусон̣и [суссон̣и (сӣ. сйа̄. пӣ.)], ким̣ ну джаггхаси собхане [собхан̣е (пӣ. ка.)].

131. син̇га̄ла ба̄ла думмедха, аппапан̃н̃оси джамбука;

джӣно маччхан̃ча песин̃ча, капан̣о вийа джха̄йаси.

132. судассам̣ ваджджаман̃н̃есам̣, аттано пана дуддасам̣;

джӣна̄ патин̃ча джа̄ран̃ча, ман̃н̃е тван̃н̃ева [мампи тван̃н̃ева (сӣ. сйа̄.), твампи ман̃н̃ева (пӣ.)] джха̄йаси.

133. еваметам̣ мигара̄джа, йатха̄ бха̄саси джамбука;

са̄ нӯна̄хам̣ ито гантва̄, бхатту хессам̣ васа̄нуга̄.

134. йо харе маттикам̣ тха̄лам̣, кам̣сатха̄лампи со харе;

катан̃чева [катам̣йева (сӣ. сйа̄. пӣ.)] тайа̄ па̄пам̣, пунапевам̣ кариссасӣти.

чӯл̣адхануггахаджа̄такам̣ чатуттхам̣.

375. капотаджа̄такам̣ (5-3-5)

135. ида̄ни кхомхи сукхито арого, никкан̣т̣ако ниппатито капото;

ка̄ха̄ми да̄нӣ хадайасса тут̣т̣хим̣, татха̄химам̣ мам̣саса̄кам̣ балети.

136. ка̄йам̣ бала̄ка̄ сикхино, чорӣ лан̇гхипита̄маха̄;

орам̣ бала̄ке а̄гаччха, чан̣д̣о ме ва̄йасо сакха̄.

137. алан̃хи те джаггхита̄йе, мамам̣ дисва̄на едисам̣;

вилӯнам̣ сӯдапуттена, пит̣т̣хаман̣д̣ена [пит̣т̣хамаддена (сӣ. сйа̄. пӣ.)] маккхитам̣.

138. сунха̄то сувилиттоси, аннапа̄нена таппито;

кан̣т̣хе ча те вел̣урийо, агама̄ ну каджан̇галам̣.

139. ма̄ те митто амитто ва̄, агама̄си каджан̇галам̣;

пин̃чха̄ни таттха ла̄йитва̄, кан̣т̣хе бандханти ват̣т̣анам̣.

140. пунапа̄паджджасӣ самма, сӣлан̃хи тава та̄дисам̣;

на хи ма̄нусака̄ бхога̄, субхун̃джа̄ хонти паккхина̄ти.

капотаджа̄такам̣ пан̃чамам̣.

ад̣д̣хавагго татийо.

тассудда̄нам̣ –

атха ван̣н̣а сасӣла хири лабхате, сумукха̄ виса са̄л̣ийамиттаваро;

атха чакка пала̄са сара̄джа сато, йава ба̄ла капотака паннараса̄ти.

атха ваггудда̄нам̣ –

джӣнан̃ча ван̣н̣ам̣ асамам̣вагуппари, судесита̄ джа̄таканти санти вӣсати [джа̄така пан̃чавӣсати (?)];

махесино брахмачариттамутта-мавоча га̄тха̄ аттхаватӣ субйан̃джана̄ти.

пан̃чаканипа̄там̣ нит̣т̣хитам̣.