7. ка̄майогасуттам̣

96. вуттан̃хетам̣ бхагавата̄, вуттамарахата̄ти ме сутам̣ –

‘‘ка̄майогайутто, бхиккхаве, бхавайогайутто а̄га̄мӣ хоти а̄ганта̄ [а̄гантва̄ (сйа̄. ка.)] иттхаттам̣. ка̄майогависам̣йутто, бхиккхаве, бхавайогайутто ана̄га̄мӣ хоти ана̄ганта̄ иттхаттам̣. ка̄майогависам̣йутто, бхиккхаве, бхавайогависам̣йутто араха̄ хоти, кхӣн̣а̄саво’’ти. етаматтхам̣ бхагава̄ авоча. таттхетам̣ ити вуччати –

‘‘ка̄майогена сам̣йутта̄, бхавайогена чӯбхайам̣;

сатта̄ гаччханти сам̣са̄рам̣, джа̄тимаран̣ага̄мино.

‘‘йе ча ка̄ме пахантва̄на, аппатта̄ а̄саваккхайам̣;

бхавайогена сам̣йутта̄, ана̄га̄мӣти вуччаре.

‘‘йе ча кхо чхиннасам̣сайа̄, кхӣн̣ама̄напунаббхава̄;

те ве па̄ран̇гата̄ локе, йе патта̄ а̄саваккхайа’’нти.

айампи аттхо вутто бхагавата̄, ити ме сутанти. саттамам̣.

калйа̄н̣асӣласуттам̣

97. вуттан̃хетам̣ бхагавата̄, вуттамарахата̄ти ме сутам̣ –

‘‘калйа̄н̣асӣло, бхиккхаве, бхиккху калйа̄н̣адхаммо калйа̄н̣апан̃н̃о имасмим̣ дхаммавинайе ‘кевалӣ вуситава̄ уттамапурисо’ти вуччати –

‘‘катхан̃ча, бхиккхаве, бхиккху калйа̄н̣асӣло хоти? идха, бхиккхаве, бхиккху сӣлава̄ хоти, па̄тимоккхасам̣варасам̣вуто вихарати, а̄ча̄рагочарасампанно ан̣уматтесу ваджджесу бхайадасса̄вӣ, сама̄да̄йа сиккхати сиккха̄падесу. евам̣ кхо, бхиккхаве, бхиккху калйа̄н̣асӣло хоти. ити калйа̄н̣асӣло.

‘‘калйа̄н̣адхаммо ча катхам̣ хоти? идха, бхиккхаве, бхиккху саттаннам̣ бодхипаккхийа̄нам̣ дхамма̄нам̣ бха̄вана̄нуйогамануйутто вихарати. евам̣ кхо, бхиккхаве, бхиккху калйа̄н̣адхаммо хоти. ити калйа̄н̣асӣло, калйа̄н̣адхаммо.

‘‘калйа̄н̣апан̃н̃о ча катхам̣ хоти? идха, бхиккхаве, бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати. евам̣ кхо, бхиккхаве, бхиккху калйа̄н̣апан̃н̃о хоти.

‘‘ити калйа̄н̣асӣло калйа̄н̣адхаммо калйа̄н̣апан̃н̃о имасмим̣ дхаммавинайе ‘кевалӣ вуситава̄ уттамапурисо’ти вуччатӣ’’ти. етаматтхам̣ бхагава̄ авоча. таттхетам̣ ити вуччати –

‘‘йасса ка̄йена ва̄ча̄йа, манаса̄ наттхи дуккат̣ам̣;

там̣ ве калйа̄н̣асӣлоти, а̄ху бхиккхум̣ хирӣманам̣ [хирӣматам̣ (сйа̄. ка.)].

‘‘йасса дхамма̄ субха̄вита̄, сатта [патта (саббаттха)] самбодхига̄мино;

там̣ ве калйа̄н̣адхаммоти, а̄ху бхиккхум̣ ануссадам̣.

‘‘йо дуккхасса паджа̄на̄ти, идхева кхайаматтано;

там̣ ве калйа̄н̣апан̃н̃оти, а̄ху бхиккхум̣ ана̄савам̣.

‘‘техи дхаммехи сампаннам̣, анӣгхам̣ чхиннасам̣сайам̣;

аситам̣ саббалокасса, а̄ху саббапаха̄йина’’нти.

айампи аттхо вутто бхагавата̄, ити ме сутанти. ат̣т̣хамам̣.