9. да̄насуттам̣

98. вуттан̃хетам̣ бхагавата̄, вуттамарахата̄ти ме сутам̣ –

‘‘двема̄ни, бхиккхаве, да̄на̄ни – а̄мисада̄нан̃ча дхаммада̄нан̃ча. етадаггам̣, бхиккхаве, имесам̣ двиннам̣ да̄на̄нам̣ йадидам̣ – дхаммада̄нам̣.

‘‘двеме, бхиккхаве, сам̣вибха̄га̄ – а̄мисасам̣вибха̄го ча дхаммасам̣вибха̄го ча. етадаггам̣, бхиккхаве, имесам̣ двиннам̣ сам̣вибха̄га̄нам̣ йадидам̣ – дхаммасам̣вибха̄го.

‘‘двеме, бхиккхаве, ануггаха̄ – а̄миса̄нуггахо ча дхамма̄нуггахо ча. етадаггам̣, бхиккхаве, имесам̣ двиннам̣ ануггаха̄нам̣ йадидам̣ – дхамма̄нуггахо’’ти. етаматтхам̣ бхагава̄ авоча. таттхетам̣ ити вуччати –

‘‘йама̄ху да̄нам̣ парамам̣ ануттарам̣, йам̣ сам̣вибха̄гам̣ бхагава̄ аван̣н̣айи [аван̣н̣айӣ (сӣ.)];

аггамхи кхеттамхи пасанначитто, вин̃н̃ӯ паджа̄нам̣ ко на йаджетха ка̄ле.

‘‘йе чева бха̄санти сун̣анти чӯбхайам̣, пасанначитта̄ сугатасса са̄сане;

тесам̣ со аттхо парамо висуджджхати, йе аппаматта̄ сугатасса са̄сане’’ти.

айампи аттхо вутто бхагавата̄, ити ме сутанти. навамам̣.