9. антара̄маласуттам̣

88. вуттан̃хетам̣ бхагавата̄, вуттамарахата̄ти ме сутам̣ –

‘‘тайоме, бхиккхаве, антара̄мала̄ антара̄амитта̄ антара̄сапатта̄ антара̄вадхака̄ антара̄паччаттхика̄. катаме тайо? лобхо, бхиккхаве, антара̄мало антара̄амитто антара̄сапатто антара̄вадхако антара̄паччаттхико. досо, бхиккхаве, антара̄мало антара̄амитто антара̄сапатто антара̄вадхако антара̄паччаттхико. мохо, бхиккхаве, антара̄мало антара̄амитто антара̄сапатто антара̄вадхако антара̄паччаттхико. име кхо, бхиккхаве, тайо антара̄мала̄ антара̄амитта̄ антара̄сапатта̄ антара̄вадхака̄ антара̄паччаттхика̄’’ти. етаматтхам̣ бхагава̄ авоча. таттхетам̣ ити вуччати –

‘‘анаттхаджанано лобхо, лобхо читтаппакопано;

бхайамантарато джа̄там̣, там̣ джано на̄вабуджджхати.

‘‘луддхо аттхам̣ на джа̄на̄ти, луддхо дхаммам̣ на пассати;

андхатамам̣ [андхам̣ тамам̣ (сӣ.)] тада̄ хоти, йам̣ лобхо сахате нарам̣.

‘‘йо ча лобхам̣ пахантва̄на, лобханеййе на луббхати;

лобхо пахӣйате тамха̄, удабиндӯва поккхара̄.

‘‘анаттхаджанано досо, досо читтаппакопано;

бхайамантарато джа̄там̣, там̣ джано на̄вабуджджхати.

‘‘дут̣т̣хо аттхам̣ на джа̄на̄ти, дут̣т̣хо дхаммам̣ на пассати;

андхатамам̣ тада̄ хоти, йам̣ досо сахате нарам̣.

‘‘йо ча досам̣ пахантва̄на, досанеййе на дуссати;

досо пахӣйате тамха̄, та̄лапаккам̣ва бандхана̄.

‘‘анаттхаджанано мохо, мохо читтаппакопано;

бхайамантарато джа̄там̣, там̣ джано на̄вабуджджхати.

‘‘мӯл̣хо аттхам̣ на джа̄на̄ти, мӯл̣хо дхаммам̣ на пассати;

андхатамам̣ тада̄ хоти, йам̣ мохо сахате нарам̣.

‘‘йо ча мохам̣ пахантва̄на, моханеййе на муйхати;

мохам̣ виханти со саббам̣, а̄диччовудайам̣ тама’’нти.

айампи аттхо вутто бхагавата̄, ити ме сутанти. навамам̣.