10. девадаттасуттам̣

89. вуттан̃хетам̣ бхагавата̄, вуттамарахата̄ти ме сутам̣ –

‘‘тӣхи, бхиккхаве, асаддхаммехи абхибхӯто парийа̄динначитто девадатто а̄па̄йико нерайико каппат̣т̣хо атекиччхо. катамехи тӣхи? па̄пиччхата̄йа, бхиккхаве, абхибхӯто парийа̄динначитто девадатто а̄па̄йико нерайико каппат̣т̣хо атекиччхо. па̄памиттата̄йа, бхиккхаве, абхибхӯто парийа̄динначитто девадатто а̄па̄йико нерайико каппат̣т̣хо атекиччхо. сати кхо пана уттарикаран̣ӣйе [уттарим̣ каран̣ӣйе (сйа̄.)] ораматтакена висеса̄дхигамена [висеса̄дхигамена ча (сйа̄. пӣ.)] антара̄ воса̄нам̣ а̄па̄ди. имехи кхо, бхиккхаве, тӣхи асаддхаммехи абхибхӯто парийа̄динначитто девадатто а̄па̄йико нерайико каппат̣т̣хо атекиччхо’’ти. етаматтхам̣ бхагава̄ авоча. таттхетам̣ ити вуччати –

‘‘ма̄ джа̄ту кочи локасмим̣, па̄пиччхо удападжджатха;

тадамина̄пи джа̄на̄тха, па̄пиччха̄нам̣ йатха̄ гати.

‘‘пан̣д̣итоти саман̃н̃а̄то, бха̄витаттоти саммато;

джалам̣ва йасаса̄ ат̣т̣ха̄, девадаттоти виссуто [ме сутам̣ (па̄л̣ийам̣)].

‘‘со пама̄н̣аманучин̣н̣о [пама̄даманучин̣н̣о (ка. сӣ. сйа̄. пӣ.), сама̄наманучин̣н̣о (ат̣т̣ха.)], а̄саджджа нам̣ татха̄гатам̣;

авӣчинирайам̣ патто, чатудва̄рам̣ бхайа̄накам̣.

‘‘адут̣т̣хасса хи йо дуббхе, па̄пакаммам̣ акуббато;

тамева па̄пам̣ пхусати [пхуссети (сйа̄.)], дут̣т̣хачиттам̣ ана̄дарам̣.

‘‘самуддам̣ висакумбхена, йо ман̃н̃еййа падӯситум̣;

на со тена падӯсеййа, бхесма̄ хи удадхи маха̄.

‘‘евамева [еваметам̣ (сйа̄.)] татха̄гатам̣, йо ва̄дена вихим̣сати;

саммаггатам̣ [самаггатам̣ (сӣ. ка.)] сантачиттам̣, ва̄до тамхи на рӯхати.

‘‘та̄дисам̣ миттам̣ куббетха, тан̃ча севеййа пан̣д̣ито;

йасса магга̄нуго бхиккху, кхайам̣ дуккхасса па̄пун̣е’’ти.

айампи аттхо вутто бхагавата̄, ити ме сутанти. дасамам̣.

чатуттхо вагго нит̣т̣хито.

тассудда̄нам̣ –

витакка̄сакка̄расадда, чаваналоке асубхам̣;

дхаммаандхака̄рамалам̣, девадаттена те даса̄ти.