3. девасаддасуттам̣

82. вуттан̃хетам̣ бхагавата̄, вуттамарахата̄ти ме сутам̣ –

‘‘тайоме, бхиккхаве, девесу девасадда̄ ниччхаранти самайа̄ самайам̣ упа̄да̄йа. катаме тайо? йасмим̣, бхиккхаве, самайе арийаса̄вако кесамассум̣ оха̄ретва̄ ка̄са̄йа̄ни ваттха̄ни аччха̄детва̄ ага̄расма̄ анага̄рийам̣ паббаджджа̄йа четети, тасмим̣ самайе [тасмим̣ бхиккхаве самайе (пӣ. ка.)] девесу девасаддо ниччхарати – ‘есо арийаса̄вако ма̄рена саддхим̣ сан̇га̄ма̄йа чететӣ’ти. айам̣, бхиккхаве, пат̣хамо девесу девасаддо ниччхарати самайа̄ самайам̣ упа̄да̄йа.

‘‘пуна чапарам̣, бхиккхаве, йасмим̣ самайе арийаса̄вако саттаннам̣ бодхипаккхийа̄нам̣ дхамма̄нам̣ бха̄вана̄нуйогамануйутто вихарати, тасмим̣ самайе девесу девасаддо ниччхарати – ‘есо арийаса̄вако ма̄рена саддхим̣ сан̇га̄метӣ’ти. айам̣, бхиккхаве, дутийо девесу девасаддо ниччхарати самайа̄ самайам̣ упа̄да̄йа.

‘‘пуна чапарам̣, бхиккхаве, йасмим̣ самайе арийаса̄вако а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати, тасмим̣ самайе девесу девасаддо ниччхарати – ‘есо арийаса̄вако виджитасан̇га̄мо тамева сан̇га̄масӣсам̣ абхивиджийа аджджха̄васатӣ’ти. айам̣, бхиккхаве, татийо девесу девасаддо ниччхарати самайа̄ самайам̣ упа̄да̄йа. име кхо, бхиккхаве, тайо девесу девасадда̄ ниччхаранти самайа̄ самайам̣ упа̄да̄йа̄’’ти. етаматтхам̣ бхагава̄ авоча. таттхетам̣ ити вуччати –

‘‘дисва̄ виджитасан̇га̄мам̣, самма̄самбуддхаса̄вакам̣;

девата̄пи намассанти, махантам̣ вӣтаса̄радам̣.

‘‘намо те пуриса̄джан̃н̃а, йо твам̣ дуджджайамаджджхабхӯ;

джетва̄на маччуно сенам̣, вимоккхена ана̄варам̣.

‘‘ити хетам̣ намассанти, девата̄ паттама̄насам̣;

тан̃хи тасса на пассанти, йена маччувасам̣ вадже’’ти.

айампи аттхо вутто бхагавата̄, ити ме сутанти. татийам̣.