7. сукхапаттхана̄суттам̣

76. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, сукха̄ни паттхайама̄но сӣлам̣ раккхеййа пан̣д̣ито. катама̄ни тӣн̣и? пасам̣са̄ ме а̄гаччхатӯти [а̄гаччхантӯти (сйа̄.)] сӣлам̣ раккхеййа пан̣д̣ито, бхога̄ ме уппаджджантӯти сӣлам̣ раккхеййа пан̣д̣ито, ка̄йасса бхеда̄ парам̣ маран̣а̄ сугатим̣ саггам̣ локам̣ упападжджисса̄мӣти сӣлам̣ раккхеййа пан̣д̣ито. има̄ни кхо, бхиккхаве, тӣн̣и сукха̄ни паттхайама̄но сӣлам̣ раккхеййа пан̣д̣ито’’ти. етаматтхам̣ бхагава̄ авоча. таттхетам̣ ити вуччати –

‘‘сӣлам̣ раккхеййа медха̄вӣ, паттхайа̄но тайо сукхе;

пасам̣сам̣ виттала̄бхан̃ча, печча сагге памоданам̣.

‘‘акаронтопи че па̄пам̣, каронтамупасевати;

сан̇кийо хоти па̄пасмим̣, аван̣н̣о часса рӯхати.

‘‘йа̄дисам̣ куруте миттам̣, йа̄дисам̣ чӯпасевати;

са ве та̄дисако хоти, сахава̄со хи [сахава̄сопи (сӣ. ка.)] та̄дисо.

‘‘севама̄но севама̄нам̣, сампхут̣т̣хо сампхусам̣ парам̣;

саро диддхо кала̄пам̣ва, алиттамупалимпати;

упалепабхайа̄ [упалимпабхайа̄ (ка.)] дхӣро, нева па̄пасакха̄ сийа̄.

‘‘пӯтимаччхам̣ кусаггена, йо наро упанайхати;

куса̄пи пӯти ва̄йанти, евам̣ ба̄лӯпасевана̄.

‘‘тагаран̃ча пала̄сена, йо наро упанайхати;

патта̄пи сурабхи ва̄йанти, евам̣ дхӣрӯпасевана̄.

‘‘тасма̄ паттапут̣ассева [пала̄сапут̣ассева (пӣ. ка.)], н̃атва̄ сампа̄каматтано;

асанте нупасевеййа, санте севеййа пан̣д̣ито;

асанто нирайам̣ ненти, санто па̄пенти суггати’’нти.

айампи аттхо вутто бхагавата̄, ити ме сутанти. саттамам̣.