12. дит̣т̣хигатасуттам̣

49. вуттан̃хетам̣ бхагавата̄, вуттамарахата̄ти ме сутам̣ –

‘‘двӣхи, бхиккхаве, дит̣т̣хигатехи парийут̣т̣хита̄ деваманусса̄ олӣйанти еке, атидха̄ванти еке; чаккхуманто ча пассанти.

‘‘катхан̃ча, бхиккхаве, олӣйанти еке? бхава̄ра̄ма̄, бхиккхаве, деваманусса̄ бхаварата̄ бхавасаммудита̄ тесам̣ бхаваниродха̄йа дхамме десийама̄не читтам̣ на паккхандати на пасӣдати на сантит̣т̣хати на̄дхимуччати. евам̣ кхо, бхиккхаве, олӣйанти еке.

‘‘катхан̃ча, бхиккхаве, атидха̄ванти еке? бхавенева кхо панеке ат̣т̣ӣйама̄на̄ хара̄йама̄на̄ джигуччхама̄на̄ вибхавам̣ абхинанданти – йато кира, бхо, айам̣ атта̄ [сатто (сӣ. ка.)] ка̄йасса бхеда̄ парам̣ маран̣а̄ уччхиджджати винассати на хоти парам̣ маран̣а̄; етам̣ сантам̣ етам̣ пан̣ӣтам̣ етам̣ йа̄тха̄ванти. евам̣ кхо, бхиккхаве, атидха̄ванти еке.

‘‘катхан̃ча, бхиккхаве, чаккхуманто пассанти? идха бхиккху бхӯтам̣ бхӯтато пассати; бхӯтам̣ бхӯтато дисва̄ бхӯтасса ниббида̄йа вира̄га̄йа ниродха̄йа пат̣ипанно хоти. евам̣ кхо, бхиккхаве, чаккхуманто пассантӣ’’ти. етаматтхам̣ бхагава̄ авоча. таттхетам̣ ити вуччати –

‘‘йе [йо (сйа̄. ка.)] бхӯтам̣ бхӯтато дисва̄, бхӯтасса ча атиккамам̣;

йатха̄бхӯте вимуччанти, бхаватан̣ха̄ париккхайа̄.

‘‘са ве [саче (ка. сӣ. сйа̄. пӣ.)] бхӯтапарин̃н̃о, со вӣтатан̣хо бхава̄бхаве;

бхӯтасса вибхава̄ бхиккху, на̄гаччхати пунаббхава’’нти.

айампи аттхо вутто бхагавата̄, ити ме сутанти. два̄дасамам̣.

дутийо вагго нит̣т̣хито.

тассудда̄нам̣ –

две индрийа̄ две тапанӣйа̄, сӣлена апаре дуве;

анотта̄пӣ кухана̄ две ча, сам̣веджанӣйена те даса.

витакка̄ десана̄ виджджа̄, пан̃н̃а̄ дхаммена пан̃чамам̣;

аджа̄там̣ дха̄тусалла̄нам̣, сиккха̄ джа̄гарийена ча;

апа̄йадит̣т̣хийа̄ чева [йева (сӣ. сйа̄.)], ба̄вӣсати пака̄сита̄ти.

дуканипа̄то нит̣т̣хито.