11. а̄па̄йикасуттам̣

48. вуттан̃хетам̣ бхагавата̄, вуттамарахата̄ти ме сутам̣ –

‘‘двеме, бхиккхаве, а̄па̄йика̄ нерайика̄ идамаппаха̄йа. катаме две? йо ча абрахмача̄рӣ брахмача̄рипат̣ин̃н̃о, йо ча парипун̣н̣ам̣ парисуддхам̣ брахмачарийам̣ чарантам̣ амӯлакена абрахмачарийена ануддхам̣сети. име кхо, бхиккхаве, две а̄па̄йика̄ нерайика̄ идамаппаха̄йа̄’’ти. етаматтхам̣ бхагава̄ авоча. таттхетам̣ ити вуччати –

‘‘абхӯтава̄дӣ нирайам̣ упети, йо ва̄пи катва̄ на кароми ча̄ха;

убхопи те печча сама̄ бхаванти, нихӣнакамма̄ мануджа̄ параттха.

‘‘ка̄са̄вакан̣т̣ха̄ бахаво, па̄падхамма̄ асан̃н̃ата̄;

па̄па̄ па̄пехи каммехи, нирайам̣ те упападжджаре.

‘‘сеййо айогул̣о бхутто, татто аггисикхӯпамо;

йан̃че бхун̃джеййа дуссӣло, рат̣т̣хапин̣д̣амасан̃н̃ато’’ти.

айампи аттхо вутто бхагавата̄, ити ме сутанти. ека̄дасамам̣.