1. витаккасуттам̣

38. вуттан̃хетам̣ бхагавата̄, вуттамарахата̄ти ме сутам̣ –

‘‘татха̄гатам̣, бхиккхаве, арахантам̣ самма̄самбуддхам̣ две витакка̄ бахулам̣ самуда̄чаранти – кхемо ча витакко, павивеко ча [вивеко ча (сйа̄.)]. абйа̄паджджха̄ра̄мо [абйа̄паджджа̄ра̄мо (ка.), абйа̄баджджха̄ра̄мо (?)], бхиккхаве, татха̄гато абйа̄паджджхарато. таменам̣, бхиккхаве, татха̄гатам̣ абйа̄паджджха̄ра̄мам̣ абйа̄паджджхаратам̣ есева витакко бахулам̣ самуда̄чарати – ‘има̄йа̄хам̣ ирийа̄йа на кин̃чи бйа̄ба̄дхеми тасам̣ ва̄ тха̄варам̣ ва̄’ти.

‘‘павивека̄ра̄мо, бхиккхаве, татха̄гато павивекарато. таменам̣, бхиккхаве, татха̄гатам̣ павивека̄ра̄мам̣ павивекаратам̣ есева витакко бахулам̣ самуда̄чарати – ‘йам̣ акусалам̣ там̣ пахӣна’нти.

‘‘тасма̄тиха, бхиккхаве, тумхепи абйа̄паджджха̄ра̄ма̄ вихаратха абйа̄паджджхарата̄. тесам̣ во, бхиккхаве, тумха̄кам̣ абйа̄паджджха̄ра̄ма̄нам̣ вихаратам̣ абйа̄паджджхарата̄нам̣ есева витакко бахулам̣ самуда̄чариссати – ‘има̄йа майам̣ ирийа̄йа на кин̃чи бйа̄ба̄дхема тасам̣ ва̄ тха̄варам̣ ва̄’ти.

‘‘павивека̄ра̄ма̄, бхиккхаве, вихаратха павивекарата̄. тесам̣ во, бхиккхаве, тумха̄кам̣ павивека̄ра̄ма̄нам̣ вихаратам̣ павивекарата̄нам̣ есева витакко бахулам̣ самуда̄чариссати – ‘ким̣ акусалам̣, ким̣ аппахӣнам̣, ким̣ паджаха̄ма̄’’’ти. етаматтхам̣ бхагава̄ авоча. таттхетам̣ ити вуччати –

‘‘татха̄гатам̣ буддхамасайхаса̄хинам̣, дуве витакка̄ самуда̄чаранти нам̣;

кхемо витакко пат̣хамо удӣрито, тато вивеко дутийо пака̄сито.

‘‘тамонудам̣ па̄рагатам̣ махесим̣, там̣ паттипаттам̣ васимам̣ ана̄савам̣;

висантарам̣ [весантарам̣ (сӣ. ка.), виссантарам̣ (пӣ.)] тан̣хаккхайе вимуттам̣, там̣ ве муним̣ антимадехадха̄рим̣;

ма̄ран̃джахам̣ [ма̄раджахам̣ (сйа̄.), ма̄наджахам̣ (сӣ. ка.), ма̄нам̣ джахам̣ (пӣ.)] брӯми джара̄йа па̄рагум̣.

‘‘селе йатха̄ паббатамуддханит̣т̣хито, йатха̄пи пассе джанатам̣ самантато;

татхӯпамам̣ дхаммамайам̣ сумедхо, па̄са̄дама̄руйха самантачаккху;

сока̄ватин̣н̣ам̣ джанатамапетасоко, авеккхати джа̄тиджара̄бхибхӯта’’нти.

айампи аттхо вутто бхагавата̄, ити ме сутанти. пат̣хамам̣.