2. десана̄суттам̣

39. вуттан̃хетам̣ бхагавата̄, вуттамарахата̄ти ме сутам̣ –

‘‘татха̄гатасса, бхиккхаве, арахато самма̄самбуддхасса две дхаммадесана̄ парийа̄йена бхаванти. катама̄ две? ‘па̄пам̣ па̄пакато пассатха̄’ти – айам̣ пат̣хама̄ дхаммадесана̄; ‘па̄пам̣ па̄пакато дисва̄ таттха ниббиндатха вираджджатха вимуччатха̄’ти – айам̣ дутийа̄ дхаммадесана̄. татха̄гатасса, бхиккхаве, арахато самма̄самбуддхасса има̄ две дхаммадесана̄ парийа̄йена бхавантӣ’’ти. етаматтхам̣ бхагава̄ авоча. таттхетам̣ ити вуччати –

‘‘татха̄гатасса буддхасса, саббабхӯта̄нукампино;

парийа̄йавачанам̣ пасса, две ча дхамма̄ пака̄сита̄.

‘‘па̄пакам̣ пассатха четам̣ [чекам̣ (сӣ. пӣ.), чхека̄ (сйа̄.)], таттха ча̄пи вираджджатха;

тато вираттачитта̄се, дуккхассантам̣ кариссатха̄’’ти.

айампи аттхо вутто бхагавата̄, ити ме сутанти. дутийам̣.