6. ба̄хийаттхераапада̄нам̣

178. ‘‘ито сатасахассамхи, каппе уппаджджи на̄йако;

махаппабхо тилокагго, на̄мена падумуттаро.

179. ‘‘кхиппа̄бхин̃н̃асса бхиккхусса, гун̣ам̣ киттайато муне;

сутва̄ удаггачиттохам̣, ка̄рам̣ катва̄ махесино.

180. ‘‘датва̄ сатта̄хикам̣ да̄нам̣, сасиссасса муне ахам̣;

абхива̄дийа самбуддхам̣, там̣ т̣ха̄нам̣ паттхайим̣ тада̄.

181. ‘‘тато мам̣ бйа̄кари буддхо, ‘етам̣ пассатха бра̄хман̣ам̣;

патитам̣ па̄дамӯле ме, чарийам̣ паччавеккхан̣ам̣ [пасаннанайана̄нанам̣ (сӣ.), пӣнасампаннавеккхан̣ам̣ (сйа̄.), пӣн̣ам̣сам̣ паччавеккхан̣ам̣ (пӣ.)].

182. ‘‘‘хемайан̃н̃опачитан̇гам̣, авада̄татануттачам̣;

паламбабимбатамбот̣т̣хам̣, сетатин̣хасамам̣ диджам̣.

183. ‘‘‘гун̣атха̄мабахутарам̣, самуггататанӯрухам̣;

гун̣огха̄йатанӣбхӯтам̣, пӣтисампхуллита̄нанам̣.

184. ‘‘‘есо паттхайате т̣ха̄нам̣, кхиппа̄бхин̃н̃асса бхиккхуно;

ана̄гате маха̄вӣро, готамо на̄ма хессати.

185. ‘‘‘тасса дхаммесу да̄йа̄до, орасо дхамманиммито;

ба̄хийо на̄ма на̄мена, хессати саттху са̄вако’.

186. ‘‘тада̄ хи тут̣т̣хо вут̣т̣ха̄йа, йа̄ваджӣвам̣ маха̄муне;

ка̄рам̣ катва̄ чуто саггам̣, агам̣ сабхаванам̣ йатха̄.

187. ‘‘девабхӯто мануссо ва̄, сукхито тасса каммуно;

ва̄хаса̄ сам̣саритва̄на, сампаттиманубхомахам̣.

188. ‘‘пуна кассапавӣрасса, аттхаментамхи [аттхан̇гатамхи (сйа̄.)] са̄сане;

а̄руйха селасикхарам̣, йун̃джитва̄ джинаса̄санам̣.

189. ‘‘висуддхасӣло саппан̃н̃о, джинаса̄санака̄рако;

тато чута̄ пан̃ча джана̄, девалокам̣ агамхасе.

190. ‘‘татохам̣ ба̄хийо джа̄то, бха̄рукаччхе пуруттаме;

тато на̄ва̄йа паккхандо [паккханто (сӣ.), пакканто (пӣ.)], са̄гарам̣ аппасиддхийам̣ [аттхасиддхийам̣ (ка.)].

191. ‘‘тато на̄ва̄ абхиджджиттха, гантва̄на катипа̄хакам̣;

тада̄ бхӣсанаке гхоре, патито макара̄каре.

192. ‘‘тада̄хам̣ ва̄йамитва̄на, сантаритва̄ маходадхим̣;

суппа̄дапат̣т̣анаварам̣ [суппа̄рапат̣т̣анаварам̣ (сӣ. пӣ.)], сампатто мандаведхито [мандамедхико (сӣ.), мандаведито (сйа̄.), маддавератам̣ (ка.)].

193. ‘‘да̄ручӣрам̣ нива̄сетва̄, га̄мам̣ пин̣д̣а̄йа па̄висим̣;

тада̄ха со джано тут̣т̣хо, араха̄йамидха̄гато.

194. ‘‘имам̣ аннена па̄нена, ваттхена сайанена ча;

бхесаджджена ча саккатва̄, хесса̄ма сукхита̄ майам̣.

195. ‘‘паччайа̄нам̣ тада̄ ла̄бхӣ, техи саккатапӯджито;

араха̄ханти сан̇каппам̣, уппа̄десим̣ айонисо.

196. ‘‘тато ме читтаман̃н̃а̄йа, чодайӣ пуббадевата̄;

‘на твам̣ упа̄йамагган̃н̃ӯ, куто твам̣ араха̄ бхаве’.

197. ‘‘чодито та̄йа сам̣вигго, тада̄хам̣ парипуччхи там̣;

‘ке ва̄ ете кухим̣ локе, араханто наруттама̄.

198. ‘‘‘са̄ваттхийам̣ косаламандире джино, пахӯтапан̃н̃о варабхӯримедхасо;

со сакйапутто араха̄ ана̄саво, десети дхаммам̣ арахаттапаттийа̄.

199. ‘‘‘тадасса сутва̄ вачанам̣ супӣн̣ито [пӣн̣итва̄ (ка.)], нидхим̣ва ладдха̄ капан̣оти вимхито;

удаггачитто арахаттамуттамам̣, судассанам̣ дат̣т̣хуманантагочарам̣.

200. ‘‘‘тада̄ тато никкхамитва̄на саттхуно [никкхамитуна саттхуварам̣ (сӣ.)], сада̄ джинам̣ пасса̄ми вимала̄нанам̣ [пара̄джинам̣ пасса̄ми камала̄нанам̣ (ка.)];

упечча раммам̣ виджитавхайам̣ ванам̣, дидже апуччхим̣ кухим̣ локанандано.

201. ‘‘‘тато авочум̣ нарадевавандито, пурам̣ павит̣т̣хо асанесана̄йа со;

сасова [паччехи (сӣ. сйа̄.)] кхиппам̣ мунидассануссуко, упечча ванда̄хи тамаггапуггалам̣’.

202. ‘‘татохам̣ туват̣ам̣ гантва̄, са̄ваттхим̣ пурамуттамам̣;

вичарантам̣ тамаддаккхим̣, пин̣д̣аттхам̣ апиха̄гидхам̣.

203. ‘‘паттапа̄н̣им̣ алолаккхам̣, па̄чайантам̣ пӣта̄карам̣ [бха̄джайантам̣ вийа̄матам̣ (сӣ.), джотайантам̣ идха̄матам̣ (сйа̄.), бха̄джайантам̣ идам̣матам̣ (пӣ.)];

сирӣнилайасан̇ка̄сам̣, равидиттихара̄нанам̣.

204. ‘‘там̣ самечча нипачча̄хам̣, идам̣ вачанамабравим̣;

‘купатхе виппанат̣т̣хасса, саран̣ам̣ хохи готама.

205. ‘‘‘па̄н̣асанта̄ран̣аттха̄йа, пин̣д̣а̄йа вичара̄махам̣;

на те дхаммакатха̄ка̄ло, ичча̄ха мунисаттамо’.

206. ‘‘тада̄ пунаппунам̣ буддхам̣, а̄йа̄чим̣ дхаммала̄ласо;

йо ме дхаммамадесеси, гамбхӣрам̣ сун̃н̃атам̣ падам̣.

207. ‘‘тасса дхаммам̣ сун̣итва̄на, па̄пун̣им̣ а̄саваккхайам̣;

париккхӣн̣а̄йуко санто, ахо саттха̄нукампако.

208. ‘‘килеса̄ джха̄пита̄ майхам̣…пе… вихара̄ми ана̄саво.

209. ‘‘сва̄гатам̣ вата ме а̄си…пе… катам̣ буддхасса са̄санам̣.

210. ‘‘пат̣исамбхида̄ чатассо…пе… катам̣ буддхасса са̄санам̣.

211. ‘‘евам̣ тхеро вийа̄ка̄си, ба̄хийо да̄ручӣрийо;

сан̇ка̄ракӯт̣е патито, бхӯта̄вит̣т̣ха̄йа га̄вийа̄.

212. ‘‘аттано пуббачарийам̣, киттайитва̄ маха̄мати;

паринибба̄йи со тхеро [вӣро (сӣ.), дхӣро (сйа̄.)], са̄ваттхийам̣ пуруттаме.

213. ‘‘нагара̄ никкхаманто там̣, дисва̄на исисаттамо;

да̄ручӣрадхарам̣ дхӣрам̣, ба̄хийам̣ ба̄хита̄гамам̣.

214. ‘‘бхӯмийам̣ патитам̣ дантам̣, индакетӯва па̄титам̣;

гата̄йум̣ суккхакилесам̣ [гата̄йу сам̣гатаклесам̣ (сӣ. пӣ.), тада̄йу сан̇ката̄лесам̣ (ка.)], джинаса̄санака̄ракам̣.

215. ‘‘тато а̄мантайӣ саттха̄, са̄ваке са̄сане рате;

‘ган̣хатха нетва̄ [хутва̄ (сйа̄. пӣ. ка.)] джха̄петха, танум̣ сабрахмача̄рино.

216. ‘‘‘тхӯпам̣ каротха пӯджетха, ниббуто со маха̄мати;

кхиппа̄бхин̃н̃а̄намесагго, са̄вако ме вачокаро.

217. ‘‘‘сахассамапи че га̄тха̄, анаттхападасан̃хита̄;

екам̣ га̄тха̄падам̣ сеййо, йам̣ сутва̄ упасаммати.

218. ‘‘‘йаттха а̄по ча патхавӣ, теджо ва̄йо на га̄дхати;

на таттха сукка̄ джотанти, а̄диччо на пака̄сати.

219. ‘‘‘на таттха чандима̄ бха̄ти, тамо таттха на виджджати;

йада̄ ча аттана̄ веди, мунимонена бра̄хман̣о.

220. ‘‘‘атха рӯпа̄ арӯпа̄ ча, сукхадуккха̄ вимуччати’;

иччевам̣ абхан̣ӣ на̄тхо, тилокасаран̣о муни’’.

иттхам̣ судам̣ а̄йасма̄ ба̄хийо тхеро има̄ га̄тха̄йо

абха̄ситтха̄ти.

ба̄хийаттхерасса̄пада̄нам̣ чхат̣т̣хам̣.