7. маха̄кот̣т̣хикаттхераапада̄нам̣

221. ‘‘падумуттаро на̄ма джино, саббалокавидӯ муни;

ито сатасахассамхи, каппе уппаджджи чаккхума̄.

222. ‘‘ова̄дако вин̃н̃а̄пако, та̄рако саббапа̄н̣инам̣;

десана̄кусало буддхо, та̄реси джанатам̣ бахум̣.

223. ‘‘анукампако ка̄рун̣ико, хитесӣ саббапа̄н̣инам̣;

сампатте титтхийе саббе, пан̃часӣле патит̣т̣хапи.

224. ‘‘евам̣ нира̄кулам̣ а̄си, сун̃н̃атам̣ титтхийехи ча;

вичиттам̣ арахантехи, васӣбхӯтехи та̄дибхи.

225. ‘‘ратана̄нат̣т̣хапан̃н̃а̄сам̣, уггато со маха̄муни;

кан̃чанаггхийасан̇ка̄со, ба̄ттим̣саваралаккхан̣о.

226. ‘‘вассасатасахасса̄ни, а̄йу виджджати та̄ваде;

та̄вата̄ тит̣т̣хама̄но со, та̄реси джанатам̣ бахум̣.

227. ‘‘тада̄хам̣ хам̣саватийам̣, бра̄хман̣о ведапа̄рагӯ;

упечча саббалокаггам̣ [саббаса̄раггам̣ (сӣ.), саттапа̄рагам̣ (пӣ.)], ассосим̣ дхаммадесанам̣.

228. ‘‘тада̄ со са̄вакам̣ вӣро, пабхиннаматигочарам̣;

аттхе дхамме нирутте ча, пат̣ибха̄не ча ковидам̣.

229. ‘‘т̣хапеси етадаггамхи, там̣ сутва̄ мудито ахам̣;

саса̄вакам̣ джинаварам̣, сатта̄хам̣ бходжайим̣ тада̄.

230. ‘‘дуссехаччха̄дайитва̄на, сасиссам̣ буддхиса̄гарам̣ [буддхаса̄гарам̣ (ка.)];

нипачча па̄дамӯламхи, там̣ т̣ха̄нам̣ паттхайим̣ ахам̣.

231. ‘‘тато авоча локагго, ‘пассатхетам̣ диджуттамам̣;

винатам̣ па̄дамӯле ме, камалодарасаппабхам̣.

232. ‘‘‘буддхасет̣т̣хасса [сет̣т̣хам̣ буддхасса (сйа̄. ка.)] бхиккхусса, т̣ха̄нам̣ паттхайате айам̣;

та̄йа саддха̄йа ча̄гена, саддхаммассаванена [тена дхаммассавена (сӣ. пӣ. ка.)] ча.

233. ‘‘‘саббаттха сукхито хутва̄, сам̣саритва̄ бхава̄бхаве;

ана̄гатамхи аддха̄не, лаччхасе там̣ маноратхам̣.

234. ‘‘‘сатасахассито каппе, окка̄какуласамбхаво;

готамо на̄ма готтена, саттха̄ локе бхависсати.

235. ‘‘‘тасса дхаммесу да̄йа̄до, орасо дхамманиммито;

кот̣т̣хико на̄ма на̄мена, хессати саттху са̄вако’.

236. ‘‘там̣ сутва̄ мудито хутва̄, йа̄ваджӣвам̣ тада̄ джинам̣;

меттачитто паричарим̣, сато пан̃н̃а̄сама̄хито.

237. ‘‘тена каммавипа̄кена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

238. ‘‘сата̄нам̣ тӣн̣иккхаттун̃ча, девараджджамака̄райим̣;

сата̄нам̣ пан̃чаккхаттун̃ча, чаккаваттӣ ахосахам̣.

239. ‘‘падесараджджам̣ випулам̣, ган̣ана̄то асан̇кхийам̣;

саббаттха сукхито а̄сим̣, тасса каммасса ва̄хаса̄.

240. ‘‘дуве бхаве сам̣сара̄ми, деватте атха ма̄нусе;

ан̃н̃ам̣ гатим̣ на гаччха̄ми, сучин̣н̣асса идам̣ пхалам̣.

241. ‘‘дуве куле паджа̄йа̄ми, кхаттийе атха бра̄хман̣е;

‘‘нӣче куле на джа̄йа̄ми, сучин̣н̣асса идам̣ пхалам̣.

242. ‘‘паччхиме бхаве сампатте, брахмабандху ахосахам̣;

са̄ваттхийам̣ виппакуле, пачча̄джа̄то махаддхане.

243. ‘‘ма̄та̄ чандаватӣ на̄ма, пита̄ ме ассала̄йано;

йада̄ ме питарам̣ буддхо, винайӣ саббасуддхийа̄.

244. ‘‘тада̄ пасанно сугате, паббаджим̣ анага̄рийам̣;

моггалла̄но а̄чарийо, упаджджха̄ са̄рисамбхаво.

245. ‘‘кесесу чхиджджама̄несу, дит̣т̣хи чхинна̄ самӯлика̄;

нива̄сенто ча ка̄са̄вам̣, арахаттамапа̄пун̣им̣.

246. ‘‘аттхадхамманируттӣсу, пат̣ибха̄не ча ме мати;

пабхинна̄ тена локагго, етадагге т̣хапеси мам̣.

247. ‘‘асандит̣т̣хам̣ вийа̄ка̄сим̣, упатиссена пуччхито;

пат̣исамбхида̄су тена̄хам̣, агго самбуддхаса̄сане.

248. ‘‘килеса̄ джха̄пита̄ майхам̣…пе… вихара̄ми ана̄саво.

249. ‘‘сва̄гатам̣ вата ме а̄си…пе… катам̣ буддхасса са̄санам̣.

250. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ маха̄кот̣т̣хико тхеро има̄ га̄тха̄йо

абха̄ситтха̄ти.

маха̄кот̣т̣хикаттхерасса̄пада̄нам̣ саттамам̣.