5. кума̄ракассапаттхераапада̄нам̣

150. ‘‘ито сатасахассамхи, каппе уппаджджи на̄йако;

саббалокахито вӣро, падумуттарана̄мако.

151. ‘‘тада̄хам̣ бра̄хман̣о хутва̄, виссуто ведапа̄рагӯ;

дива̄виха̄рам̣ вичарам̣, аддасам̣ локана̄йакам̣.

152. ‘‘чатусаччам̣ пака̄сентам̣, бодхайантам̣ садевакам̣;

вичиттакатхика̄наггам̣, ван̣н̣айантам̣ маха̄джане.

153. ‘‘тада̄ мудитачиттохам̣, нимантетва̄ татха̄гатам̣;

на̄на̄раттехи ваттхехи, алан̇каритва̄на ман̣д̣апам̣.

154. ‘‘на̄на̄ратанападжджотам̣, сасан̇гхам̣ бходжайим̣ тахим̣;

бходжайитва̄на сатта̄хам̣, на̄наггарасабходжанам̣.

155. ‘‘на̄на̄читтехи [на̄на̄ван̣н̣ехи (сӣ.)] пуппхехи, пӯджайитва̄ саса̄вакам̣ [маха̄вӣрам̣ (ка.)];

нипачча па̄дамӯламхи, там̣ т̣ха̄нам̣ паттхайим̣ ахам̣.

156. ‘‘тада̄ муниваро а̄ха, карун̣екараса̄сайо [карун̣о карун̣а̄лайо (сйа̄.)];

‘пассатхетам̣ диджаварам̣, падума̄наналочанам̣.

157. ‘‘‘пӣтипа̄моджджабахулам̣, самуггататанӯрухам̣;

ха̄самхитависа̄лаккхам̣, мама са̄санала̄ласам̣.

158. ‘‘‘патитам̣ па̄дамӯле ме, ека̄ваттхасума̄насам̣ [екаваттхам̣ сума̄насам̣ (сйа̄. ка.)];

еса паттхети там̣ т̣ха̄нам̣, вичиттакатхикаттанам̣ [вичиттакатхикаттадам̣ (сӣ. пӣ.)].

159. ‘‘‘сатасахассито каппе, окка̄какуласамбхаво;

готамо на̄ма готтена, саттха̄ локе бхависсати.

160. ‘‘‘тасса дхаммесу да̄йа̄до, орасо дхамманиммито;

кума̄ракассапо на̄ма, хессати саттху са̄вако.

161. ‘‘‘вичиттапуппхадусса̄нам̣, ратана̄нан̃ча ва̄хаса̄;

вичиттакатхика̄нам̣ со, аггатам̣ па̄пун̣иссати’.

162. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

163. ‘‘париббхамам̣ бхава̄бхаве [бхава̄ка̄се (сӣ. пӣ.)], ран̇гамаджджхе йатха̄ нат̣о;

са̄кхамигатраджо хутва̄, мигийа̄ куччхимоккамим̣.

164. ‘‘тада̄ майи куччхигате, ваджджхава̄ро упат̣т̣хито;

са̄кхена чатта̄ ме ма̄та̄, нигродхам̣ саран̣ам̣ гата̄.

165. ‘‘тена са̄ мигара̄джена, маран̣а̄ паримочита̄;

париччаджитва̄ сапа̄н̣ам̣ [сам̣па̄н̣ам̣ (сӣ. пӣ.)], мамевам̣ овадӣ тада̄.

166. ‘‘‘нигродхамева севеййа, на са̄кхамупасам̣васе;

нигродхасмим̣ матам̣ сеййо, йан̃че са̄кхамхи джӣвитам̣’.

167. ‘‘тена̄нусит̣т̣ха̄ мигайӯтхапена, ахан̃ча ма̄та̄ ча татхетаре ча [читаре ча (сйа̄.), тассова̄дена (пӣ.), читаре ча тассова̄дам̣ (ка.)];

а̄гамма раммам̣ тусита̄дхива̄сам̣, гата̄ пава̄сам̣ сагхарам̣ йатхева.

168. ‘‘пуно кассапавӣрасса, аттхаментамхи са̄сане;

а̄руйха селасикхарам̣, йун̃джитва̄ джинаса̄санам̣.

169. ‘‘ида̄на̄хам̣ ра̄джагахе, джа̄то сет̣т̣хикуле ахум̣;

а̄паннасатта̄ ме ма̄та̄, паббаджи анага̄рийам̣.

170. ‘‘сагаббхам̣ там̣ видитва̄на, девадаттамупа̄найум̣;

со авоча ‘вина̄сетха, па̄пикам̣ бхиккхуним̣ имам̣’.

171. ‘‘ида̄нипи муниндена, джинена анукампита̄;

сукхинӣ аджанӣ майхам̣, ма̄та̄ бхиккхунупассайе.

172. ‘‘там̣ видитва̄ махӣпа̄ло, косало мам̣ апосайи;

кума̄рапариха̄рена, на̄мена̄хан̃ча кассапо.

173. ‘‘маха̄кассапама̄гамма, ахам̣ кума̄ракассапо;

ваммикасадисам̣ ка̄йам̣, сутва̄ буддхена деситам̣.

174. ‘‘тато читтам̣ вимуччи ме, анупа̄да̄йа саббасо;

па̄йа̄сим̣ дамайитва̄хам̣, етадаггамапа̄пун̣им̣.

175. ‘‘килеса̄ джха̄пита̄ майхам̣…пе… вихара̄ми ана̄саво.

176. ‘‘сва̄гатам̣ вата ме а̄си…пе… катам̣ буддхасса са̄санам̣.

177. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ кума̄ракассапо тхеро има̄ га̄тха̄йо

абха̄ситтха̄ти.

кума̄ракассапаттхерасса̄пада̄нам̣ пан̃чамам̣.

чатувӣсатимам̣ бха̄н̣ава̄рам̣.